《四葉草》之〈盛裝舞步愛作戰〉剛剛播完，34D 趙碩之同32A 龔嘉欣相嗌唔好口，反而劇中飾演Miss Mandy 的索模Mandy Lieu 吸水最實際，一場商場show 打個白鴿轉已袋4萬，做電視講到明想開拓水源：「唔只演戲，仲想唱埋歌賺多啲錢。」
Mandy 跟台灣靚仔陳柏霖熱戀一年，男友由人氣偶像被打落為幫女友挽手袋的脹爆觀音兵，難得Mandy 恨錢卻唔恨做葉翠翠，忠於愛情的Mandy 勁冧：「我鍾意佢幫我拎手袋，搭的士佢仲會開埋車門添！」港男真係要學嘢。
雖然只係客串，但樣靚身材正的Mandy Lieu 一出場即砌低一班十八廿二的四葉女，四葉仔同許志安齊齊讚佢最索。
Profile ：
年齡：23
身高：170cm
三圍：32B 、24、34
03年Mandy 由馬來西亞來香港簽約成為Elite 旗下model 。拍攝當日氣溫33度，Mandy 曬足一個下晝都冇怨言，果然專業。
手袋黨
上年10月，本刊拍到陳柏霖同Mandy 喺蘇豪區食意大利菜，之後柏霖埋單、拉凳兼幫Mandy 拎埋手袋，體貼到暈。
Leslie Kee 圖片
同Mandy 拍拖前，曾有翻版金城武之稱嘅柏霖替新加坡攝影師Leslie Kee 為南亞海嘯賑災拍寫真照，當時柏霖靚仔兼身形fit 到漏。
《壹週刊》圖片
不顧身世
上年5月剛開始拍拖，陳柏霖同Mandy 已經打得火熱，旁若無人，在尖沙咀海港城行街，突然壯士上身，抱起Mandy 猛fing ，沐浴愛河的陳柏霖已不顧身世，忽然暴肥。
Mandy 話已見過陳柏霖家長，未來奶奶仲勁錫Mandy ，每次到台灣對方都請佢大吃大喝，當佢未來新抱咁款。
撐趙碩之
Mandy 自爆曾被幾位四葉女孤立：「可能佢哋以為我唔識講中文，初初都唔同我傾偈，到第二個星期我撩佢哋玩，傾吓買衫買袋先同佢哋熟啲。」Mandy 唔想搞是搞非，仲話最鍾意犯眾憎的大咪趙碩之：「佢上圍好勁呀，羨慕死我，我會叫佢送本寫真畀我添。」
Mandy的父親是美國人，媽咪係馬來西亞華僑，鬼妹仔唔怕緋聞，上年佢公開跟台灣型男陳柏霖拍拖後，帶挈她多撈，最勁一個月接十幾個騷，每個騷收平均4萬，她說：「唔著泳衣收4萬，著泳衣我要收double 添。」
嫁硬柏霖
Mandy 跟陳柏霖常被影到好似「連體嬰」咁拍拖行街。「佢喺香港會住我屋企。我信天主教，佢跟我去教堂見主，就好似見家長咁咋。（天主教徒唔准婚前性行為？）聖經都冇咁講……唔講咁多，總之佢滿足到我啦。」
不過陳柏霖同Mandy 拍拖後型男跌watt ，又幫Mandy 拎手袋，十足觀音兵，偏偏Mandy 話最愛呢種男人，「我鍾意呀，總之細心嘢佢做齊，我哋晚晚一齊打NDSL ，又一齊煮飯。佢脾氣好好，係我結婚對象。」
雖然Mandy 開口維護，但有傳聞陳柏霖早前要被壓價才接拍到日劇《東京鐵塔》，有傳Mandy 更要「貼」仔。「佢經濟冇問題唔使靠我養，你哋都影過佢同我食飯啦，係佢埋單㗎！我唔係貪錢過種人，冇樓冇鑽石都冇所謂，最緊要佢錫我。」有仔錫又搵到錢做上家，當然乜都冇所謂啦！
Mandy 唔吼有錢仔，合作拍《四葉草3》的葉翠翠卻傳被廣州酒店度假村老闆黃生包起，Mandy 點睇？「我唔覺喎，都唔見有人車佢開工，人哋嘅嘢我唔comment 喇！」
學Leah Dizon
在馬來西亞出世的Mandy ，03年來港做model ，同星爺合作過生力啤廣告，又在古巨基的《The Magic Moments 》演唱會合跳過芭蕾舞。
喺香港唔憂做，下一步Mandy 話要殺入日本。上年佢仲向日本模特兒公司自薦拍廣告，逗留3個月接了4個平面及電視廣告，又被電視台綜藝節目邀請做嘉賓，佢話想好似Leah Dizon 咁成功。「過邊興混血兒，我覺得自己一定有市場。」
Mandy 話日本工作好適合自己：「佢哋有晒planning 先開始影，model 遲到要扣錢，OT 就加錢，我試過搭錯車遲到30分鐘，扣咗幾千蚊港紙。開工前會一齊食飯，大魚大肉好開心㗎。」
Leah Dizon
在日本第1個廣告是Blaun-e 染髮劑，酬勞唔透露，但Mandy 話同香港差唔多。
