一年一度的動漫節，除了讓一眾動漫迷瘋狂排隊購買心頭好外，亦是給予年輕人一個創業的好機會，因為每年展覽也會有一些創意地攤，而且主辦機構今年更特設「青年創意創業計劃」，鼓勵年輕人創業，入圍的10個單位，可以先參展後付費，讓年輕人有足夠的資本，製作特色產品，一嘗做生意滋味。
今次上集我們訪問了其中4個單位，在開檔之前準備了什麼，用什麼方法突圍而出，及預計自己的生意額。而8月19日的下集就會幫他們結算，看看那個是大贏家？
布袋有多個size ，還有得索繩，如圖左手繪鉛筆花紋袋的大小約7吋×8吋，適合做NDS 套。價錢由$35起。
為了推銷DIY 形象，她們更推出自製布面筆記簿，售價由$50起。
Phoebe （左）和小米為趕工，整個7月都要回校縫製布袋。
case 1 主攻NDS 手繪布袋
檔主：Phoebe （21歲）
+小米（22歲）
貨品：自製手繪布袋和筆記簿
投資成本：$6,000-$8,000
期望生意額：$15,000
動漫節的創意地攤由8月1日開始至5日，5日租金為$3,800，能入圍「青年創意創業計劃」的各單位，可以在動漫節完結後才支付租金。入圍單位之一，在理大讀design 的Phoebe 和小米，在今年參加動漫節主打自製手繪布袋，並以平價作招徠。她們只得20出頭，年紀輕輕已計劃周詳，原來與她們曾經擺檔賣東西有關。
以往經驗大派用場
小米早在前年已參加過動漫節，那時主要售賣手繪tee ，每件售$60至$80，「反應都ok ，不過由於當時都有唔少呢類手繪tee ，競爭比較大，好彩都冇蝕錢，可以打個和。」至於Phoebe 在05年時，便在年宵擺檔賣雞仔帽，「過年係雞年，我同學校幾個老師同同學一齊設計咗頂雞仔帽，返大陸搵廠造，合共出咗約8千造超過500頂帽，每頂賣$60，出到嚟個反應好好，埋單都賺萬幾蚊。」
她們在這些創業經驗中，明白到賣產品一定要岩timing 和捉客人的心理。「而家好興環保袋，加上啲年輕人好鍾意打機，成日嗱住部NDS 、PSP 周街打，所以今年我哋唔會賣手繪tee ，費事同人爭客，相反手繪布袋應該會比較少有。每年動漫節都會有好多女仔嚟買嘢，所以我哋想賣一啲比較實用，同埋價錢較平嘅產品。所以諗到造幾個唔同size 嘅布袋，細嘅索繩布袋就可以畀佢哋用嚟裝遊戲機，大嘅布袋可以當環保袋用，夠晒實用。」
不過為節省成本，她們也選擇自己縫製布袋，並手繪上圖案。「由於要造幾個size 同顏色，加上數目唔多，如果搵廠幫我哋縫製，價錢一定好貴。所以寧願自己車番，我哋之前去日本旅行買咗啲布料，另外亦會去深水埗買料車袋。整好咗嘅袋會畀客人自選一啲簡單嘅圖案，我哋再畫上去，容易控制成本之餘，DIY 產品會有賣點，客人唔驚會撞款。」
Phoebe 和小米會預先製作些手繪布袋，另還設有一定淨色布袋和多款手繪圖案，任客人選擇，並即場在布袋上畫上圖案。
小米前年也曾在動漫節擺檔賣手繪tee ，可惜反應一般，今年再接再厲。
「為咗令貨品種類多啲，同兼顧賣DIY 貨嘅形象，我哋仲會賣一啲自製布面嘅筆記簿，款式比較簡約，原因係好多女仔都鍾意去無印買呢類簿，我哋自己都係其中之一，就算啲簿價錢唔平，啲人都捨得買，所以覺得會有市場。」現時布袋定價由$35起，而筆記簿則售$50起，每件產品約可賺6至7成盈利。為了動漫節，她們在6月放暑假起，便日做夜做，計劃縫製約50款布袋，以及超過30本筆記簿。「我哋暫時唔會造太大量貨，因為想睇吓啲客鍾意邊類貨，同埋我哋有好多圖案畀客人揀，會接受佢哋訂貨，所以只會造少量貨試市場反應，唔夠先再造。」
琪琪（中）曾參加過本刊舉辦的創業比賽，成功打入五強，在西九龍中心擺檔。
case 3 獨家七彩玻璃瓶
檔主：琪琪(20+歲)
貨品：七彩手工藝啫喱玻璃瓶
投資成本：$8,000
期望生意額：$25,000
本身從事文職的琪琪，是4個單位中有最多創業經驗的一個，她在05年，便參加本刊舉辦的創業比賽，打入五強，在西九龍中心擺檔7日。自06年又試過參加動漫節，今年是她第2次擺動漫節攤檔，每次她都是售賣獨家製作的七彩啫喱玻璃瓶，即是在玻璃瓶中，盛載著七彩的手工藝啫喱，並加入客人自選如Happy Birthday 等祝福字句及一些小飾物。「總之成個產品都係由客人自己去揀，無論係邊個玻璃樽、啫喱顏色，字句同飾物等等，可以話係獨一無二嘅送禮佳品。」
客人可以自選玻璃瓶、啫喱顏色、英文字句及圖案等，甚至可以自行提供喜愛的玻璃瓶。
琪琪憑以往經驗，發現不少人愛買平價及細細件的東西，於是今年再推出電話繩。
前年賺錢今年再擺
琪琪想到這個構思，是因為想做一款禮物，能適用於不同的節日和季節，「我見好多人都鍾意收藏一啲沙樽，我咁岩有朋友識間玻璃廠，就諗到做類似嘅產品，可以放唔同嘅嘢入個玻璃樽度。」她四圍物色材料，後來在網上找到這個手工啫喱，不過琪琪為保密，不肯透露出產地和購買辦法，只表示手工啫喱原本是一種粉狀顏料，可以自行溝成啫喱，有多種顏色選擇，成本甚平。
「初頭啲玻璃樽係靠朋友幫我向廠訂，因為識人，就算一個款訂一打都得，後來我開始四圍收集唔同嘅玻璃樽，好似香水樽、燈泡都得㗎，如果客人自己有個好鍾意嘅樽，都可以提供畀我去造。至於樽入面嘅字句係用人造纖維造，而入面啲裝飾其實係貼紙，所以全部嘅成本都好平。」成本平，定價亦相對便宜，大玻璃瓶賣$80，細如鎖匙扣或電話繩只需$20，產品純利可賺約8成。
琪琪還有一個賣點，就是讓客人即場自選玻璃瓶、啫喱顏色、字句和飾物，成為獨一無二的製成品，大的玻璃瓶需時15至20分鐘，鎖匙扣只需2分鐘就可完成。「喺現場製作玻璃樽，可以吸引唔少人注意，好多客一路睇一路問係咩，問問吓就會有興趣買。」前年擺檔賺了近2萬元，估計今年應相差不遠。
手繪崩耳貓最成功
別看動漫節的創意地攤，檔仔細細，其實識得抓緊機會，也可為日後創業奠下基石，像創作崩耳貓的Eunice ，便是其中一個成功例子。
Eunice於6年前便在動漫節擺地攤，其創作的崩耳貓大受歡迎，短短幾日已賺到超過3萬元，每年租的檔位更愈來愈大，去年已由地攤變為租金達3萬的攤位，更於葵涌開設崩耳貓專門店店鋪，現時月賺約4萬元。今年連續第7年參加動漫節的她，醒一些貼士給各位。
「做生意要有耐性，同埋識得觀察客人需要，好似我頭一次擺地攤，有好多唔同嘅圖畀客人揀，最後總結到啲人最鍾意崩耳貓，然後我先喺呢方面發展。」另外，她又提醒大家不要急著賣清自創貨品，「好多人見啲貨賣唔晒，就會不停降價，咁樣好短視，其實好多人都會嚟搵啲批發貨，好似我之前都係咁被阿貓地攤睇中，揀咗我嘅貨去寄賣，所以如果賣得太平，就未必會有人欣賞。」
Eunice 成功在動漫節打出名堂，再開鋪做生意，現時鋪頭月賺約4萬。
Jessie 經常到深水埗尋寶，購買不同的飾物。
case 3 推廣網上DIY 首飾
檔主：Jessie （23歲）
貨品：Hand made 設計
簡單的飾物
投資成本：$10,000
期望生意額：$20,000
Jessie 主打偏向日本風格的女性飾物，價錢由$20至$100不等。
由於網上以頸鏈最好賣，Jessie 亦會製作頸鏈為主，這條售價暫定$80。
一心想建立自家品牌的Jessie ，早在去年10月已經嘗試在網上創業，自訂「mylittle thing 」品牌，把hand made 飾物，放上yahoo 售賣，現時已賣出超過500件飾物，今次擺動漫展，是希望推廣品牌，吸納客源。「我好鍾意自己整飾物，以前一得閒就會整啲飾物自己戴，後來興網上買賣，咪試吓放上網賣，估唔到反應都幾好，後來愈做愈多，慢慢由兼職變咗而家做正職。」Jessie 所賣的飾物包括頸鏈、手鏈、耳環、電話繩等，售價由$20至$100不等，利潤約為6成，現時她在網上賣飾物平均月入超過5千。以她經驗所得，以頸鏈最好賣，所以會造更多不同款式的頸鏈做主打。
飾物的材料雖然大部分來自深水埗，不過手工一點也不馬虎，而且Jessie 會加入一些新元素。「深水埗汝州街一帶，真係咩材料都有齊，只要逐間慢慢搵，就可以搵到唔少獨特嘅配料。我又會自己買啲水晶膠，喺啲配件上倒模，令佢哋面頭蓋住一層令令哋嘅膠，摸落去又會凸起，出面比較少有。」為推廣品牌，Jessie 也很著重包裝，會自製印有logo 的招牌、咭片等，還會因應客人要求，即場更改頸鏈長度，或把耳環改成夾或磁石款，提供貼身的服務。「如果地攤反應唔好，我可以將啲貨放上網賣，所以都唔使太擔心。」
龐家傑（右）及陳家恩特別設計了以狗仔隊為主題的產品，反映社會現象。
除了狗仔隊，還有一個啤牌系列，tee 價錢暫定$79。
case 4 本地原創主題潮物
檔主：龐家傑(20歲)+陳家恩(19歲)
貨品：以狗仔隊為主題的一系列
產品，包括tee 、cap 帽、貼紙等。
投資成本：$8,000-$10,000
期望生意額：$20,000
今年剛中七畢業的龐家傑和陳家恩，同樣擁有創業經驗，在多年前，曾參加過維園Farm 擺攤位賣飾物，「過陣同朋友玩吓，喺大陸入啲飾物嚟賣，反應麻麻哋，所以今年決定自己design 產品，睇吓自己嘅實力。」他們有感全世界科技發達，人沒有私隱，做什麼都很容易被人偷拍，更會被upload 上網，所以便設計了一個拿著相機的公仔，希望令人反思。「呢個公仔望落好普通，好似一個廁所logo ，其實即係寓意，好多人會喺你唔知情嘅情況下，已經被人偷拍咗。」
他們design 好公仔後，便找廠印製產品。「喺印之前，我哋都問廠嗱咗幾款唔同質料嘅衫，自己試吓熨個公仔上去，睇吓個質素點，最後揀咗成本$20嘅tee ，至於印刷費就要睇數量，暫時計劃印100件左右，印費連tee 成本約要$30。」不過design 產品成本較高，風險又大，為穩陣起見，他們也在大陸購入一些精品，如風扇、筆、鬧鐘等，希望能封蝕本門。
