進入多邊形年代，令全球矚目嘅恐怖遊戲首推《Biohazard 》，但佢變得越嚟越子彈橫飛，想真切感受和式恐怖風味？不得不提以氣氛行先嘅《零》。出乎意料，全新一集搬到高清欠奉嘅Wii ，改為用盡體感操作，要你當支遙控係電筒咁舞，再者班鬼模糊啲有助提高真實感，農曆七月熄晒燈開行音響咁玩，隨時會俾班遊魂野鬼嚇親！
撰文：陳福榮
Model ：Creamy
失驚無神 嚇鬼死人
TECMO 出品嘅《零》，一向名氣不下於《Bio 》同《Silent Hill 》；呢個系列不經不覺嚟到第四集《零
月蝕之面具》。經初步試玩，雖然評級唔係18歲以上先准玩咁激，但驚嚇程度真係唔講得笑，血流披面女鬼為數不少，啲污糟嘢總會失驚無神彈出嚟。平時睇鬼片都要掩眼嘅人，都係唔好熄燈玩咁刺激咯。
a.四名主角三女一男，最索當然係呢位低胸美少女啦。
b.隨時隨地都會有幽靈現身，間屋果然猛到飛起。
c.撞正七孔流血護士，俾佢嚇一嚇真係三魂唔見七魄。
d.月黑風高，一條友潛入鬼屋，唔知話佢有病定勇敢好。
■肉眼睇塊鏡只有自己倒影，但一經相機可能乜都現形。
恐怖感 有增無減
故事話說好多年前有5個嚫妹俾人捉咗，幸得警察救返保住小命，但所有人都神秘失去當時記憶；幾年後其中兩人無故死去，3個死剩種同差人叔叔都認為同當年事件有關，於是聯袂再探朧月島，而玩家則從4人不同視點，重新了解整件慘劇發生。
老任遊戲向以老幼咸宜見稱，但今次冇因為喺Wii 出而減輕驚慄感，單論配樂與鏡頭運用簡直同前作不遑多讓，依然嚇到嗌救命。唔怪得一返貨就俾人掃晒，據知下一批新貨已開始玩預訂！
■喺遊戲初段會有大量教學，唔睇說明書都識玩。
■好似《Bio 》有筆記畀你執，等你了解整件事件。
■咪睇小呢部老爺機，玩家要靠佢捉鬼。
獵殺鬼魂 靠相機
雖然官方冇解釋到今集同舊作有冇關連，但成名道具「射影機」依然健在；咪睇呢部古董相機咁殘舊，其實設計佢嘅人賜予咗無比靈力，連人類雙眼都睇唔到嘅靈體，經過鏡頭通通現形！方法係先令佢哋入鏡兼且對焦，捕捉一定時間令周圍個藍圈儲勁，再按快門就可以迎頭痛擊，原理似足主觀射擊遊戲。當然呢支「槍」並唔係無敵，一來有菲林限制，二來鬼魂越惡防禦力就越高，因此可借助較強力嘅菲林同晶片，強化攻擊力或者對焦時間，概念等同射槍Game 去改槍咁款。
■對準焦鎖定後，就要儲勁捉鬼。
■距離時間掌握唔岩，隨時俾鬼捉番轉頭。
■留意對焦圈，未有鬼蒲頭前冇乜特別顯示。
■鬼魂一經納入鎖定範圍就會變藍。
■好彩重要解謎位係會有綠光閃出，唔使搵唔到咁慘。
光源不定須適應
唔知TECMO 喺咪玩慣靚女，成個《零》系列都係搵美少女做主角。比起頭三集，今次光源同視域就顯得更講究，右手揸住Wiimote 當正係電筒咁搵路行，左手隻「雞髀」則用來移動，雖然調查環境甚至走佬冇以前咁方便，但勝在夠真實。
但開發人員都好理解，如果因為咁麻煩嘅視點而搵唔到解謎方法，繼而令人冇心機玩落去又幾頭痕。所以佢專登喺啲重要地方整定綠色光芒，行埋去長按A 掣就自動調查，咁就唔使擔心睇漏眼冇拎寶物啦。
■遊戲多數時間都只能靠電筒睇路。
■鋼琴有料到！彈吓隨時撞鬼。
價錢：$450
Profile
機種：Wii
廠商：任天堂/ TECMO
類型：AVG
人數：1人
查詢：
i-Gamer （27253338）
地址：深水埗福華街161-175號福仁商場地下G16及G20號舖
