滕滕心情甚靚，一個人睇鞋都睇到笑咪咪。
熱戀中嘅男女係咪一定要由朝到晚糖黐豆？對於滕麗名、郭政鴻呢pair 嚟講，答案係No ！話晒兩人都曾經滄海，可能更加相信有私人空間更加能維繫感情，實行「自由」戀愛。
對32歲滕麗名嚟講，以前同魏駿傑拍拖，百分百係個跟得女友。無論行街、食飯，甚至送機，兩個都形影不離。但咁又點，拍咗九年咪又係分手收場。
回復單身嘅滕麗名，死口唔認同郭政鴻拍拖之餘，仲要感受吓自由自在嘅樂趣。上周二（15日）黃昏，滕滕喺中環安蘭街單拖逛名店，逛完一間又一間，都唔知幾自在。最後，滕滕入咗Christian Louboutin ，呢間鞋舖一對鞋閒閒哋四、五千元。見佢喺間舖度行上行落，試咗成個鐘都冇收穫。不過，滕滕睇嚟一啲都冇失望，笑咪咪走人。或者佢真係學識享受過程，不計收穫啦。
睇睇吓鞋，滕滕忽然對鏡自摸，都話做藝人嘅多多少少有啲自戀啦。
滕滕逛咗成粒鐘，一直有兩位sales 貼身服侍，可惜終於係搞搞震冇幫襯。
