iPhone 3G 機又賣唔到，又日日有人問收幾錢，有間鋪唔想再畀人煩，索性貼紙叫人唔好問。電機兒除咗「寸」同「型」之外，諗唔到其他字形容佢！
仲iPhone 3G ？部機點勁、啲人點瘋狂，乜都講晒喇呱？所以今次係講佢點折墮！
由7月11日開始，先達人人搶入iPhone 3G ，自己喺3仔出唔到機，都要出高價收機返嚟賣。股評人東尼、曾淵滄，至到《蘋果》孫柏文，個個都教大家全世界瘋狂搶貨過陣你好收手㗎啦。但班友硬係唔聽，仲係不停入貨，搞到啲貨堆到將軍澳個堆填區咁高。而家先達啲iPhone 3G 多到冇人買，水貨又就嚟到啦，班友咪要諗計賣去外國散貨咋，散唔晒對住啲機喊都無謂。部機出咗兩個星期多啲啫，個市仲慘過香港股市由三萬二高位插落二萬一點谷底呀！
好多鋪頭怕俾人知佢賣咩價，然後跟住平賣嚟對打，所以都唔標價，惟獨呢間鋪每次劈價都大大隻字貼出嚟畀人知。雖然8GB 隔咗兩日就由$8,700劈到$8,500，但都唔係最平，所以唔怕俾人知。
16GB 由$10,500劈到$9,480都只係幾日嘅事，轉頭仲有人平手賣$9,000添！
初期出現易賺假象
，個個都計過晒數，喺3仔出iPhone 3G 機價連兩年月費最少係8GB $7,450同16GB $8,250，回收價低過呢兩個銀碼，啲客放咗會蝕，又點肯放。出機頭1個星期先達嘅行貨淨機又真係賣到$8,800同$10,500，所以班收機佬都好大方，出到$8,000同$9,000嚟收，一日內轉一轉手就賺到$800同$1,500，搞到個個心都紅晒，於是狂搶機嚟收，咁咪出事咋！
！唔係講笑，已經有人開價$7,580嚟訂就快到港兼解鎖嘅水貨，個價已經算貴，行貨淨機仲賣$8,000幾？等收皮啦！
劈價劈到平手走貨
好喇，到咗第二個星期，全先達都係iPhone 3G ，又開始冇乜客接貨，班友終於知道唔對路，於是即刻開始劈價。8GB 收機收$8,000，頂多賺埋你$300燈油火蠟錢，賣$8,300就算；16GB 仲少人吼，最喪有人$9,000收機就賣番$9,000，但求平手走到貨就算。之前啲機即日脫到手即日賺到錢，而家再冇呢回事，好多鋪砸埋成堆機，成個星期都賣唔走。就幫佢哋計吓，全場大大話話有30間鋪砸咗iPhone 3G 現貨，每間3、4部，即係全先達點都有過百部iPhone 3G 喺度。
死線前賣晒去外國
賣唔到機，唔通班友留埋啲機嚟燒炭咩！好彩佢哋識窿路，仲可以將啲機賣去大陸、泰國、新加坡等冇iPhone 3G 行貨國家，做人哋嘅水貨，但都因太多人爭，個價同留喺香港賣個底價差唔多，旨在快啲甩手咁解。大佬，水貨又傳就嚟到（截稿前未有水貨到港），仲話至少平而家啲行貨淨機千幾，到時唔只香港客轉晒買水貨，批水貨一樣可以賣去外國，呢條係deadline 嚟，班友要喺水貨到之前散晒手上嘅機。
間間鋪都仲講緊高價收iPhone 3G ，但你唔使旨意真係放到$8,200同$9,000，走入去問價至少俾人壓千幾2千，有啲仲話唔收，咁寫個收機價出嚟托咩！
唔會再有高回收價
估唔到今次iPhone 3G 行貨嘅狂潮，最得益竟然係最早上台出機批街客，佢哋用3仔嘅plan 上網比以前平咗之餘，賣部機畀先達友又賣到好價錢，難為班友成日以為自己好醒，點知喺高位接晒火棒。不過，而家個市冧成咁，你岩岩先出機嘅話，就唔使旨意放到咁高價啦，班友頂多肯出$6,500同$7,500嚟收，仲少過你出機嘅總開支，仲要係搭到路賣機去外國嘅鋪頭先肯收喎，搭唔到嘅鋪一概唔收。你夾硬要佢開價？佢咪開$4,000咋，你唔係都放吓話！
電機兒
見盡奸商、騙徒，恃住有幕後高人力撐，唔怕得罪人，有過句講過句！
明哥仔，知你好火滾，但都唔該收番你隻中指。走唔到貨咁冇面，梗係點叫佢都唔肯正面見人啦！
iPhone 蟹血訴語錄
先達唔係個個都有窿路賣iPhone 3G 去外國，賣唔到嘅人就要攬住啲機做大閘蟹。好似呢位阿明，佢就喺最高位8GB $8,000同16GB $9,000嘅時候，收咗3部8GB 同2部16GB ，結果喺鋪擺咗個幾星期，劈價劈到$8,300同$9,000，都係有人問、冇人買。「啲人猛話第一批水貨賣6、7千，我幾部行貨淨機到時都唔知點算！我用$5,000入部8GB N95，都起碼有4、5百賺啦，最多擺2日就走到貨，總之俾3G iPhone 害死啦！」
3G 個免費解鎖軟件一發布，網友即刻傳通街，但話晒唔係正途嘢，我唔會貼條link 出嚟㗎！
水貨遲到因解唔到鎖
iPhone 3G 水貨喺7月11日前已經話會到，點知等了又等，等到報紙寫開頭有得用$5,980訂8GB 間鋪都笠晒水，話冇得訂，仲要退訂畀客，原因就係解唔到鎖，冇人敢入貨住。iPhone 3G 推出前，全世界都吹晒風話佢用嘅2.0firmware 一早俾人破解咗，點知原來破到嘅只係iPhone 2G 所用嘅2.0firmware ，班黑客到iPhone 3G 出機後先知個2.0firmware 同2G 有少少唔同，於是又要再做科研。雖然巴西有人喺出機5日後就宣布解到鎖，但解鎖費要成$2,900，邊個會睬佢！到7月20日，軟解iPhone 2G 解到全球聞名嘅Dev 團隊，終於喺網上免費發布咗3G 嘅解鎖軟件，先達友一收到風，已即刻諗計由美國
緊大批機返嚟，所以有水貨就快到嘅傳聞。
