星期日同CoCo 入元朗食飯，途經開心廣場，呢個場本身有3層，鋪頭唔多，加埋地鋪都係得大約20間鋪，主打年輕人市場，但係今次行過，竟然見到有約6、7間吉鋪，呢個場位於大馬路，平時人流唔少，點解會咁多吉鋪？即刻打去租務部問個究竟，負責人同我講：「因為我哋今年轉租，有啲租客唔續約，咪有幾間吉鋪囉，但係都好快有新租客嚟睇鋪，其中有3間都有人傾緊喇。」原來今年初開始轉租，之前個場嘅1樓及2樓鋪位，呎租由$30起，但係今年起就加價到$40起，所以有啲鋪就唔續租。
雖然話加咗價，但租金其實都唔算貴，以1樓105號鋪為例，面積195呎，租金約$8,500，不過冷氣和管理費就貴少少，每呎約$10.7，即係要差唔多$2,000，加埋入場費大約萬零蚊，都算ok 。
相比起鄰近嘅千色廣場，該場租金則由$50起，租金較貴，而開心廣場位處市中心，門口就係巴士站，商場又有多間食肆，人流有保證，唯一缺點係租客一簽就要簽2年死約，比較冒險，不過以位置同租金來看，都幾適合開設時裝或者精品店㗎！
租務熱線：28285128
商場主要賣時裝和精品，仲有多間食肆谷人流。
