好多香港人讀書好功利，讀law 梗係要做律師，但我響大學讀法律就鍾意咗英文，畢業後走去教書添，因為我覺得做任何事interest 最重要。不過呢個interest ，唔係指利息，而係興趣。
由細到大，師長父母話唔讀好書會冇前途，咁我就好畀心機讀書，入咗香港大學讀法律。研究法例、案件時，要了解佢哋背後嘅法律意義，我當每單case 好似一部單元劇，每刨熟一套劇，啲英文就愈進步，覺得好有滿足感，就響呢個時候培養到學英文嘅興趣。
唔做律師去教書
到咗做實習，幫人搞樓宇按揭、買樓賣樓等，悶到不得了。當時並未搵到人生目標，不過會諗讀得法律，順理成章會做律師，畢業後，就迫自己考埋律師公會執照，的起個心肝返份律師工。但返工前個心好沉重，因為好驚成世只係同人做按揭，真係會悶死我！卒之埋門一腳，有律師唔做，反而走咗去中學教英文。教書嗰陣冇晒啲沉重感，嗰一刻我知道做緊自己鍾意嘅嘢，亦好肯定教英文一定開心過做律師。
為咗要令學生對英文有興趣，教書時我會從潮流話題入手，好似有個學生好鍾意睇NBA ，我除咗同佢傾吓波經，仲會介紹佢睇英文台，聽吓啲評述員點講波，從而學識英文生字同文法。電視台用嘅係美式英語，我就同佢講美式同英式英語用法嘅分別。好多學生同我講話因為咁英文易讀咗，教到佢哋知識，嗰種成功感真係非筆墨所能形容！
蕭愷一雖然冇做補習天王，但就同出版社合作出書。「本書叫人用個『F 』字開始學英文，唔係鼓勵學生講粗口，反而寓意大家從日常生活入手。」
開blog 成為點擊王
儲咗一年錢之後，我就去咗英國進修英文，但班學生好唔捨得我，仲話以後英文有問題唔知點算？所以響07年開咗個blog （hk.myblog.yahoo.com/siu82english ）畀佢哋問我英文，可以即時交流，而每星期仲會為佢哋做一個專題，好似研究thank you 同thanks 用法上有乜分別咁。為咗唔想太過刻板，我會用自己部傻瓜機拍埋video 放上blog ，令佢哋易明啲。
估唔到個blog 咁受歡迎，直至上個月，短短一年已超過98萬人次嚟瀏覽，可能我教英文冇俾學校嘅教材框住，會用生活化嘅例子講解，學英文都有趣啲，所以吸引到好多學生上嚟睇。結果個blog 吸引到啲出版商搵我出書，亦有補習學校搵我去教英文，證明我嘅教學方法有效，俾人認同點會唔開心！個blog 最大得著，令我知道同班學生嘅距離冇遠到。
既然大家都對我教嘅英文咁有興趣，我亦好掛住班學生，所以去咗英國一年就決定返香港，我冇選擇做一年搵一百萬嘅補習天王，但揀咗去一間可以任我編排及統籌課程嘅學校教書，響8月開始教我自主嘅course 。我知道即使社會地位有幾高，同搵到幾多錢都好，都比唔上用自己嘅心機去教學生嚟得更有意義同有趣！滿足感有錢都買唔到！
蕭愷一 25歲
英文科老師
