而家先達大把鋪頭擺晒黑白iPhone 3G 實機出嚟等你買，仲日日跌價，使鬼好似出機日啲狂迷咁樣排隊搶購。
iPhone 3G 出咗個幾星期，你瘋狂完未？
瘋完就應該冷靜落嚟，睇清楚市況，決定幾時入手、咩價位入手、買行貨定水貨先最明智。梗係啦，而家先達啲行貨淨機多到冇人接，間間鋪都鬥劈價散貨，出機當日即時用萬幾蚊買嘅人真係要呻笨咋！咁究竟iPhone 3G 唔上台、買淨機嘅話應該值幾錢？行貨可以跌到幾多？水貨嚟埋後最平又可以賣幾多，今期電機兒就為你分析。
香港行貨淨機成本之謎
截至上星期五（19/7），仍未有水貨iPhone 3G 流入先達，鋪頭賣緊嘅淨機都係來自3仔嘅行貨，佢哋都係以
機手法從3仔取貨，而成本分別係$7,450（8GB ）及$8,250（16GB ），所以定價都徘徊喺$8,800（8GB ）及$9,800（16GB ）左右。所以大家點等都好，先達啲行貨淨機一定平唔過$7,450同$8,250。而呢個定價亦極少香港人肯買，寧願上3仔都唔益先達班友啦，買家多數係首22個發售國以外嘅人居多，例如中國（用唔到3G 都當2G 機咁用）、泰國、巴西等地區人士，當地冇iPhone 3G ，惟有向香港埋手。
機辦法不外乎向最平月費方向埋手，以最平$188月費為例，$188×24=$4,512，加機價$2,938（8GB ）或$3,738（16GB ），成本就分別係$7,450及$8,250。
16GB 行貨淨機，由$11,800跌落$10,500，之後再俾人劈落$9,800。
呢頭仲有鋪賣到$9,000嚟頂爛市，只差幾日，$11,800時買咗嘅人喊都無謂。
美國水貨淨機成本$5,057
上期《Ketchup 》提過，美國有人用$3,041就可以
到部淨8GB iPhone 3G ，方法係以機價US$199+8.25%消費稅加US$175毀約費而計出嚟。電機兒咁精就梗係立即搵美國位表妹幫拖
機返港啦，點知呢條橋涉及當地一啲走後門的秘密渠道至做到，普通美國市民出機時候除準備soical security card 同住址證明外，亦要用信用咭畀錢，仲要簽一份附有特別條款嘅合約，呢部分連官網都冇列出嚟，合約指當你出iPhone 3G 後要終止合約嘅話，AT&T 會透過信用咭收番US$400差價，即係你都要畀8GB US$599（$5,057連稅）同16GB US$699（$5,902連稅）嚟買機。
現時AT&T 同3仔都要人上台先買到iPhone 3G ，唔同嘅係遲吓AT&T 有淨機賣，3仔就一早講明冇。
美國水貨平過$5,980先合理
幫班正途水貨佬的入貨價計一計數，計埋運費、解鎖費、人工、燈油火蠟，先達之前有人開價8GB $5,980同16GB $6,980訂水貨，其實都仲有$500賺，呢個利潤同其他手機的利潤相比唔算少，可以叫做幾好賺添！亦因此，所有貴過呢個價嘅水貨，都可以視之為吊高嚟賣嘅炒價，唔好買。而且據電機兒所知，剛才提過過批8GB $3,041後門貨將於本週抵達先達，批發價約$4,000，到時零售賣幾多就各安天命，估計不過$5,000，不過電機兒爆晒啲入貨成本價畀讀者知，真係冒住生命危險㗎！
美國AT&T 雖然公布咗iPhone 3G 有淨機賣，機價係8GB US$599同16GB US$699，但截至目前為止，一般人仲未可以就咁於AT&T 門市買淨機，一定要連上台簽約先出到機。
早喺iPhone 3G 未出之前，先達已經有鋪頭貼晒紙話可以預訂水貨，8GB 開價$5,980，可以想像到日後水貨最多都係賣差唔多價錢。
上台仲要諗啲乜？
假如閣下對3仔個台唔抗拒，又接受到過4個出iPhone 3G 嘅月費plan ，咁始終係上台買機最直接同穩陣嘅，但心急出機嘅你仲有兩點要考慮。
其實目前仲未有iPhone 3G 用嘅installer ，不過開發iPhone 2G installer 嘅團隊已經預告晒就嚟會出。
1.玩installer 有冇保養？
iPhone3G 新增App Store 功能，其一目的係要人循正當途徑免費或畀錢買第三方軟件，但iPhone 玩家太習慣自己透過installer 安裝軟件，要裝installer 落iPhone3G 就要先jailbreak ，咁樣3仔隨時可以話你改咗機而唔提供保養。問過3仔sales ，佢哋話冇裝咗installer 嘅iPhone 3G 喺手，唔知部機實質變成點，暫時判斷唔到仲會唔會有保養。先達友就教路，只要拎去整機前hard reset 部機，3仔就唔會知你改過機。
因為iPhone 3G 個勢，旺角嘅3仔門市特登延長營業時間到11點半，隔籬閂晒鋪佢都唔閂，但就冇iPhone 3G 現貨賣，咁開到咁夜把鬼咩。
2.點樣最快喺門市買機？
而家走入3仔門市問可否即刻出iPhone 3G ，sales 多數都話唔得，最快嘅途徑仲係上網登記等佢哋通知。但查實有唔少網友都話撞彩去多幾間門市問吓，都可能立即買到現貨，唔使等（最多人見過銅鑼灣區門市有現貨）。都係搵唔到現貨嘅話，舊有3仔客戶仲可以試吓扭計，話你想cut 台，如果即刻出到iPhone 3G 就唔cut 啦，有網友試過話work 。
電機兒
見盡奸商、騙徒，恃住有幕後高人力撐，唔怕得罪人，有過句講過句！
