又到書展，又是一眾明星書出籠的時候。
猶記得前年Stephy 出繪本，fans 們通宵排隊搶購；到上年剛出道的江若琳推出泳衣寫真，少男們爭住買之餘仲令佢成為新人王。書展，早已成為藝人必爭之地。
雖然香港其中一間大出版社「博益」上年結業，但明星書的數量肯定比上年多。競爭大，就連作家出身的王貽興，今年書展出書都要搞啲新意。除咗自己俾錢去日本拍MV 外，仲要同時裝品牌玩crossover 出限量Tee 。為咗出書，佢仲連幕前工作都停埋，認真係
身博一鋪咯！
王貽興說：「講真，做咗兩年幕前，真係有少少悶，加上今年做完《香港筆跡》，覺得點都要做番啲文學嘢。所以我同公司講，話要忙書展，其他工作全部唔接，喺屋企日寫夜寫咋。」
今年書展，貽興會推出一本長篇小說、一本廣播劇小說及三本散文，分別由三間出版社出版，誇張程度可謂史無前例。
「啲散文好多都係結集番以前啲專欄，只有本小說係從頭寫過嘅。」王貽興說：「不過本小說長達十六七萬字，成六百幾頁。寫咗我兩個月呀！」
為咗力谷呢本長篇小說《幸福在右邊》，貽興仲專登去日本拍咗首MTV ，隨首批小說附送。首歌係由佢喺《香港筆跡》入面嘅拍檔ELLEN 作曲，佢自己負責填詞同埋做MTV 內的男主角。佢話：「首歌梗係唔係我唱啦，係個日本人嚟㗎。今次去到日本拍MTV ，其實係我自己俾錢，雖然已經有好多朋友幫手，又咁好彩搵到sponsor ，都使咗我成十萬！」
令筆者好奇的是，依家喺香港出書，點可能賺到十萬呀？不過貽興話：「我仲會同一個叫HHM 嘅服裝品牌，合作推出08書展限量TEE 。未來我會喺幕前、出書同服裝品牌三線發展。」哦，原來諗到新橋用出書嚟玩crossover ，唔怪之得今年會咁勤力啦！
今年王貽興仲會同一服裝品牌合作，為他的新書推出四款限量版tee 。相中的款式為《幸福在右邊》嘅CONCEPT TEE 。想睇埋另外三款，可到以下網址：
http://www.hhm-crew.com
MTV 的拍照地點位於東京近郊，王貽興說：「最難忘係要租間學校做場景。原來喺日本租學校拍嘢唔貴㗎，一日都係港紙幾百蚊。」
五大新作
書名：《繼續革命》
出版社：皇冠
類型：小說
簡介：王貽興與少爺占903廣播劇文庫版，以少爺占「野仔」組合為藍本，描寫高中學生熱血搖滾的青春組曲。
價錢：$58
書名：《素晴^.^ 日子》
出版社：新人才文化
類型：繪本
簡介：王貽興跟六位職練局設計系畢業生的交流之作，將他在娛樂圈的經歷譜寫成光怪陸離的散文。
價錢：$98
書名：《預冬撈MAN 》
出版社：日閱堂
類型：愛情散文
簡介：爆男人大鑊的愛情工具書，讓女人更明白她們不了解的男人。
價錢：$60
書名：《愛情作孽》
出版社：日閱堂
類型：愛情書信
簡介：王貽興將在各大網站與雜誌解答愛情信箱的文章結集成書。
價錢：$58
書名：《幸福在右邊》
出版社：皇冠
類型：小說
簡介：日劇式愛情故事，以一個喜歡跑步的失聰女孩為主題的愛情故事。
價錢：$128
上年書展江若琳賣性感，今次則一百八十度轉變。全書最sexy 嘅一張相，都只係呢張「
上照」。
江若琳新書《零距離》，其實是她的生活記錄。由小時候的髮型，到家人，以至減肥經歷都有，勝在易睇簡單，fans 們一定鍾意。
江若琳 唔出寫真住
上年書展，江若琳本寫真成為一眾電車男的最愛，令今年書展湧現大量寫真。不過，江若琳今年就唔出寫真，反而出版一本類似將網誌結集成書的散文集。
江若琳說：「我希望透過文字，將我以前減肥嘅經歷，以及屋企人嘅感情；喺完全無修飾之下寫出嚟同大家分享。其中兩篇寫俾媽咪同過咗身的爺爺嘅信，我仲一路寫一路喊！」
睇番佢本新書，其實大部分係佢嘅生活照，文字不多，性感相則欠奉，江若琳說：「寫真舊年先出過，下年先考慮再出啦。」以依家江若琳嘅走勢，講真又使乜心急再出寫真？今年留一留，下年肯定又爆過。
書名：《零距離》
出版社：紅出版
類型：散文+相集
價錢：$68
書中有很多佢同囝囝的合照，不過記者打算叫佢帶埋個仔出嚟做訪問，佢就死都唔肯。
張繼聰 寫日記出書
年年咁多藝人出書，莫非成為藝人後，連文采都會多咗幾分？張繼聰說：「我寫呢本《2.7cm 的花生米》就唔覺得好難啦，因為呢本書本來係我寫俾個仔睇嘅日記。」
張繼聰說，自從佢知道太太懷孕後，就跑去買咗本日記簿，將囝囝出世前的點滴記錄下來，以作為兒子日後的禮物。而書名所說的「2.7cm 」，其實係第一次照超聲波時兒子的身高。
「不過後來寫寫吓，又會諗番自己細個嘅嘢，同埋對家庭嘅想法。所以我覺得呢本書並唔止係寫囝囝，仲寫埋我自己。」
其實呢本書經已推出市面，只係會在書展期間重新宣傳。張繼聰指，自該書出版後，有好多本來不認識他的父母，會在他的網誌內留言。「藝人出書嘅好處，係可以吸納另一個平台的fans 。其實所有媒體平台都係。」
睇番張繼聰呢本書，對家人及兒子之情描寫得十分細緻，文筆更係一眾藝人當中較好的一位，甚至同佢平時寫網誌時一句起兩句止嘅作風不同。初為人父，果然零舍多情懷。
張繼聰談起兒子張瞻時，當堂一臉慈父相。早前本刊影到張瞻入院，問佢依家囝囝健康情況，佢話：「冇事啦，細路仔成日都會病㗎啦。」
書名：《2.7cm 的花生米》
作者：張繼聰
出版社：天行者
類型：散文
價錢：$88
另類選擇
書名：《美麗大學》
作者：張玉珊
出版社：皇冠
類型：美容
簡介：全書分為十一個單元，教授基本的清潔和護膚步驟，還有針對黑眼圈、眼袋、暗瘡等皮膚問題。並會解構各類食物陷阱，提供修身餐單及講解抗衰老的秘訣等。
價錢：$88
書名：《蔡瀾眼中的八婆與美女》
作者：蔡瀾
出版社：皇冠
類型：散文
簡介：蔡瀾一向給人風流的印象，今次他的新作，正是由他親自剖白不同種類的女性。
價錢：$68
書名：《為你下廚》
作者：袁彩雲
出版社：明窗
類型：食譜
簡介：這本其實已是袁彩雲的第三本食譜，不過今次佢挑戰難度，首次教大家煮中菜。
價錢：$88
書中除插畫外，仲有黃翠如嘅靚相。
黃翠如 畫公仔寫遊記
上年黃翠如同蘇民峰幫有線電視拍《40日「峰」狂嘆世界》，回港後感觸良多，所以決定喺今年書展出版《四十日環遊世界》，將佢嘅所見所聞結集成書。
黃翠如說：「其實過次旅程真係好難忘，有好多個第一次。所以決定出書做個紀錄。本書入面仲會講一啲鏡頭前見唔到嘅嘢。今次係我第一次出書，所以好緊張。」
至於呢本書入面，除咗有佢同蘇民峰拍攝節目時嘅相片外，仲有好多黃翠如親手畫嘅插畫。不過問佢應該將呢本書歸類為旅遊、散文定繪本時，佢諗咗一陣，笑住咁話：「我都唔知呀。」咁都得？可能呢啲就係藝人出書嘅優勢。
書名：《四十日環遊世界》
作者：黃翠如
出版社：壹出版
類型：散文+相集＋插畫
價錢：$69
DJ 書繼續多
書名：《陰晴筆定》
作者：森美X 阿徐
出版社：森之出版
類型：詩集
簡介：將兩年來森美在報章刊載過的詩結集成書，據聞森美寫詩有一手，當年佢女朋友都被佢嘅詩感動過。
價錢：待定
書名：《低胸裙戰爭》
作者：卓韻芝
出版社：明窗
類型：散文
簡介：以簡單的文字，剖白心靈點滴。
價錢：$58
書名：《艾粒老爺車》
作者：I Love You Boyz
出版社：青春文化事業
類型：圖片散文集
簡介：以文字及圖片，記述「艾粒」二人的成長紀錄。
價錢：$108
號外：狗仔隊手記
今年書展除咗多明星書外，由狗仔隊親自執筆，細述追訪藝人生活的爆料書亦相繼湧現。其中一本《狗仔隊手記》，更係本刊追蹤組同事「高橋達人」的處女作，絕對有血有汗。
書名：《狗仔隊手記》
作者：高橋達人
出版社：壹出版
類型：散文
價錢：$50
書名：《狗臉的歲月》
作者：李葦
出版社：次文化堂
類型：散文
價錢：$70
