講乜都假，iPhone 3G 就係iPhone 3G ，題都費事起，因為一句iPhone 3G ，毋須多費唇舌，讀者都會懂得對號入座！
雖然iPhone 3G 在香港首日發售時只得1,500個幸運兒可以率先到手食到頭啖湯，不過4日後已經變天，除繼續有人爭住上台買行貨，水貨亦已經陸續抵港，展開水行爭霸。有冇機在手都可以睇吓呢個世界點樣為iPhone 3G 而瘋；冇機在手不妨參詳一下新舊之別，再決定買行貨定水貨，總之今個星期唔識得用iPhone 3G 展開話題，一定out ！
免費文章
直擊iPhone3G 首賣日用家嗌瘋
能夠成為香港嗱頭籌、做首位iPhone 3G 用家嘅阿賢，7月11日早上9點鐘準時到達尖沙咀海港城首賣日會場，等咗2個幾鐘終於喺半百盞鎂光燈面前正式拆盒，仲喺本刊記者要求下著埋大會印有「Jealous ？」slogan tee ，高舉iPhone 3G 耀武揚威，一副「阿媽我得咗喇」咁款。問阿賢當下心情係點？佢笑笑口話：「好緊張！」因為係香港iPhone 3G 第一個用家？「唔係，係因為有好多記者圍住我。」
9:30am 男多女少
記者9點半鐘到達時已經見到人龍約30多人，以20、30歲男性居多，當中亦有幾位長輩，唔知係潮叔定係幫仔女預先霸個靚位？
iPhone 女侍候
好在有兩位iPhone 女郎大派iPhone 3G 單張，等對眼有番啲focus ，唔使瞌眼
。
買手機送tee
首賣日紀念品包括一件紀念slogan tee ，除咗阿賢身穿的「Jealous ？」之外，仲有「Explore the power of iPhone 」，同「I'm the 1st 」共3款。
10:30am 扮有機
突然有3HK 員工塞咗部白色版iPhone 3G dummy 畀阿賢，畀佢綵排吓一陣面對傳媒時要擺咩pose ，咁都得？
10:45am 等出機
阿賢被安排坐喺面對傳媒嘅櫃位，等啟動儀式開始，言談間透露自己係graphic designer ，專登請半日假嚟排隊，嗱完要即刻返公司show off 。
11:00am 派機陣
一班為數約百人嘅3HK 大隊準備好晒幫客出機，應付之後到夜晚10pm 嘅iPhone 3G 交收簽約工作。
11:15am 真情流露
當3HK 一眾高層舉行完啟動儀式之後，工作人員幫著住迎phone tee 嘅阿賢登記好資料，再喺疊緊羅漢霸靚位影相嘅傳媒前面，正式將部iPhone 3G 黑色版交到主角手上，呢個時候我想講我真係好jealous 咋。
11:20am 10倍大iPhone 引細路
場入面有櫃位畀市民感受iPhone 3G 魔力，吸引唔少大人埋去，小朋友就去玩部比實物大10倍嘅假iPhone 。
幸運兒排隊前對iPhone 3G 期望
開賣首日只係有1,500個名額給網上登記的幸運兒及長期尊貴客戶，有幸見證歷史一刻，唔知班人龍感覺如何？
呢個係宣傳品咋！
姓名：Mike Mac Millan
籌號：40
心水顏色：黑色
「我個個月都平均用成$3,000電話費，今個月8號3HK 打電話畀我話送機，免預繳淨係簽2年約，未用過iPhone 都想試！」
姓名：Doris
籌號：19
心水顏色：白色
「雖然唔太識操作，但就鍾意佢個設計同貪新鮮，仲一早決定咗揀白色。我估3G 上網應該幾快之外，仲想揸車時用佢個AGPS 。」
姓名：Charles
籌號：17
心水顏色：黑色
「我當時即興上網登記抽機，係因為對iPhone 功能有興趣想試吓，估唔到咁好彩抽到。」
世界各地iPhone 3G 首賣情形
全球22個國家同步推出iPhone 3G ，度度都各自各熱鬧，即睇其他國家首日開賣情況！
英國倫敦
爆
真係出師不利，英國倫敦某啲Apple Store 因為網上登記發生技術性問題，令到一班機迷足足等咗超過2個鐘先拎到機，攤凍晒對iPhone 3G 嘅熱情，睇吓呢位笑容牽強嘅後生仔就知咩事，真係肉酸咗啲喎。
日本東京 狂迷紮營霸位
一向鍾意排隊嘅日本人，為咗霸靚位買iPhone ，有人星期二開始就喺鋪頭外紮營。就喺東京時間朝早7am ，日本方面又有倒數儀式同噴煙效果迎接iPhone 3G ，當時已經有過千人排隊買機。最後由一個典型電車男樣後生仔成為日本第一個iPhone 3G 用家。
美國紐約 夾道歡迎
美國AT&T 話咗鎖機，而且之前2G 都有行貨，不過仍然有人連夜等買機，Apple 店員仲會喺門口夾道拍手恭喜第一時間買機嘅fans 。
基本篇iPhone 3G Vs iPhone 2G
見到香港同外國咁多人義無反顧咁首日仆去出iPhone 3G ，仍未行動嘅你，最大可能就係已有部iPhone 2G 。到底新舊機有咩唔同，等我哋由外到內仔細check 一check ，等你決定有冇需要棄舊迎新。
Spec.
制式：3.5G 、3G/ 四頻
屏幕：3.5"（480×320）Multi-Touch
鏡頭：200萬像素
記憶：內置8GB/16GB
備用時間：300小時
使用時間：5小時（3G ）/10小時（2G ）/7小時（播片）/24小時（播歌）
體積：62.1×115.5×12.3mm
重量：133g
查詢：3HK （31623333）
外殼check!
個樣夠型夠潮，係iPhone 2G 一大殺著，Apple 都好正路咁少改為妙，睇睇外形有乜唔同先。
左：2G
右：3G
正面
3G 比2G 闊1.1mm ，亦長0.5mm ，而iPhone 3G 冇視像通話㗎，唔使再搵佢個視像鏡頭！
左：2G
右：3G
機背
3G 轉用咗令面膠殼，拎上手比2G 輕好多，但就少咗2G 金屬殼嘅分量感。
上：3G
下：2G
厚度
論厚度，3G 只比2G 厚0.7mm 。3G 嘅頭尾邊位其實仲薄咗，係彎到機中間先厚啲。
上：3G
下：2G
喇叭
3G 機底過兩個喇叭明顯咗，聲就響啲。隔籬仲多咗兩粒螺絲，想拆機都易啲。
上：3G
下：2G
耳筒
2G 個插孔凹咗落去，只能插專用耳筒，3G 改良咗呢點，插到普通耳筒，好多人讚。
功能check!
iPhone 3G 用咗最新嘅2.0firmware ，同上代比有好多細微功能改進咗，可惜又有啲位依然冇改到。
自動變工程計算機
打直部機時，係部普通計算機，但一打橫部機，就會自動變成計複雜數學嘅工程型。
仍然冇得send MMS
2G 冇得send MMS 已經俾人話咗好耐，3G 繼續冇；就連SMS 功能都冇再執過，照舊唔可以forward 短訊。
改良密碼顯示
2G 打密碼過陣，只會顯示圓點，打錯字都唔知。3G 就改到打字後個字會顯示2秒，然後先變成圓點，減少打錯機會。
2G
3G
新舊手寫輸入比較
2G 本來冇手寫輸入，要用就要裝第三方軟件，寫完個字認到嘅第一個選擇會即刻出現喺文件入面；3G 預載咗手寫板，寫字後右邊會出現4個選擇，你要再篤多次個字。雖然㩒多咗掣，但認字準同快過2G ，而且有聯想字庫。
仍然睇唔到flash
用Safari 上網依然唔支援flash ，睇親有flash 嘅網頁都會得個問號圖案喺度。
中級篇 鍊盡iPhone 3G 性能
講到iPhone 3G 最矚目嘅新增功能，始終係3G 同GPS 衛星定位，我哋梗係要試盡呢兩樣嘢畀大家睇啦。
iPhone 3G 1/5格
Nokia N733/7格
SE K610i 2/5格
Motorola V3X 3/5格
Samsung i4583/7格
LG Viewty 2/4格
HTC Touch Dual 2/4格
iPhone 3G 接收力最弱
有網友埋怨iPhone 3G 接收差，我哋分別用iPhone 3G 同其他6大brand 3G 機插上3HK 嘅3G SIM 咭，喺本集團大廈最難接收嘅死位嚟試接收3G ，結果iPhone 3G 係最弱！
試3.5G 上網
Steve Jobs 親自測試時，iPhone 3G 個3.5G 快過2G 嘅EDGE 約3倍，所以我哋就用iPhone 2G 分別行EDGE 同WiFi 嚟同iPhone 3G 嘅3.5G 比試，再搵一部行到現今最快7.2MB 3.5G 嘅LG KF700嚟做參考，上3個網頁睇吓邊樣完整load 完嘅速度最快。結果發現iPhone 3G 並不比WiFi 差太多，甚至追得上7.2MB 高速連線！
一打開Google Map ，之後㩒左下角個定位掣，就會搵到你置身嘅位置。
然後喺路線入面輸入你要去嘅目的地，當然地址愈仔細，導航路線就愈準確啦！
Google Map 確定有道路連接所在地同目的地後，就會喺地圖上畫出路徑，畀你揸車跟住行。
仲可以打開條路徑嘅詳細資料嚟睇，有齊由邊條街去邊條街、距離同車程等，畀你心中有數幾時到。
GPS 定位示範
iPhone 3G 嘅GPS 勁在同時支援GPS 同AGPS ，可以直接接收由衛星發射嘅訊號，亦可以先由衛星發射訊號去手機機站，再透過手機網絡或WiFi 傳送訊號去你部機，即刻試畀你睇。
地底都定到位 普通GPS 喺地底就好難收到訊號，但iPhone 3G 就連喺地鐵都定到位，呢樣就有賴AGPS 幫忙。
相片geo-tagging iPhone 3G 仲有geo-tagging 功能，即係影相時幫你記錄埋定位資料喺相片file 入面，每次影相時都會彈個掣出嚟問你定唔定位。
落海定唔到 定位功能梗唔可以幫你定埋飛機航線，所以如果你無聊到話想由北角去紐約，佢就會話搵唔到兩個位置嘅行車路線。
冇3D 地圖 同另一熱門導航軟件Map King 相比，Google Map 就係冇主觀角度3D 地圖顯示方式，睇落去悶咗少少。
GPS 咩得咩唔得
iPhone 3G 嘅GPS 同Google Map 仲有其他優點同缺點，即畀你睇埋。
App Store 購物初體驗
前面試咗iPhone 3G 最大路嘅function ，不過部機其實仲有一個更強大嘅功能，就係App Store ！iPhone 2G 雖然都有個installer 愛嚟安裝軟件，但始終唔係正途工具，App Store 就提供咗一個平台畀我哋，可以好正統好簡單咁免費下載或購買各式各樣嘅軟件，去幫iPhone 3G 增值。
Step1 將iPhone 3G 駁電腦上App Store 嘅話，只要好似平時咁打開iTunes 後，自動login 完就會見到menu 個iTunes Store 一欄，click 入去就有好多軟件分類畀你揀。
Step2 搵到心水軟件後，㩒價錢隔籬個buy app 掣就搞掂，跟住iTunes 就會下載所買嘅軟件落你部iPhone 3G 度，兼夾安裝埋。
Step3 安裝完後，就可以喺資料庫嘅應用程式欄入面見到你裝咗啲咩軟件，包冇走雞。
唔駁電腦，直接由iPhone 3G 上網入App Store 買嘢都得，不過每次login 都要自己再打一次密碼。
買app step by step
現有app 推介
好可惜由於版權所限，香港仲未可以好似外國iTunes Store 咁上網買到歌、租到戲，但唔緊要，App Store 仲可以買game 玩。
必試motion game 頭炮Super Monkey Ball
世嘉專程為iPhone 3G 示範motion gaming 功能而寫嘅game ，你控制隻馬騮走完條九曲十三彎嘅路去到終點，冇跌落海就畀你過關，簡單就簡單啲，但又幾襟玩喎，搭車時過手癮最岩。US$9.99（約$77.9）
操控方式就係咁兩隻手平揸部機，向上下左右傾斜部機，水平sensor 感應到後隻馬騮就識跟住向過個方向走。不過個sensor 始終冇PS3手掣嘅6軸咁勁，所以唔可以做出拋高、跳起嘅動作。
隨街搵friend facebook
唔使再介紹啦呱？淨係想話你知App Store 已經有得免費下載，過啲對親電腦都要上一上嘅人，而家可以連出街嘅時間都唔放過，用iPhone 3G 上埋，
實啲friends update 咗啲乜。
捽碟捽
芒MixMeister Scratch
MC 仁會唔會好似佢前老死Edison 咁鍾意iPhone 就唔知，但你有咗iPhone 3G ，免費下載埋呢個程式，就可以扮MC 仁捽碟，里面仲有唔少歌你揀，捽到個芒發滾都得。
肥牛牛喬布斯？Moo
最無聊推介，打開個程式就係得隻牛喺度叫，點篤點捽佢都再冇反應，真係唔知有乜用，咁嘅無聊程式，梗係免費啦。
先達即日$8,800賣淨機
睇完咁多iPhone 3G 功能，你買唔買，其實已經心中有數，跟住就要追實個市況啦，因為7月11日傍晚時間，先達已經有行貨淨機賣。先達班友一早就總動員上網登記買機，博抽中喺首賣gala 出機，又有啲抽中嘅幸運兒主動接洽佢哋賣籌，所以佢哋最後真係買到10幾部現貨返先達賣（唔會畀3HK SIM 咭你，但有單），最貴有人開價16GB $16,000，至平都要8GB $8,800同16GB $11,800，但一樣好快俾人掃晒，瘋狂程度唔輸蝕得過首賣gala 。因為先達友出機都要現兜兜畀機價加預繳，仲要簽兩年約兼畀月費，計番條數佢哋開個價都唔算好狼死。截至星期一（14/7）中午，先達仍未有水貨抵達，反而行貨16GB 淨機價微跌$1,000至$10,800，8GB 價仍不變；估計水貨最快星期二（15/7）抵港，約賣$6,000。但最抵買嘅途徑就係搵個美國親戚去AT&T 幫你買機返香港，即刻計畀你睇有幾抵！
7月11日晚上7點，仲有人喺3仔個gala 排緊隊出機之際，頭兩部iPhone 3G 淨機就喺先達開賣，真係快手，機價8GB $8,800同16GB $11,800。
$3,041即出淨iPhone 3G
左計右計，8GB iPhone 3G 根本只值US$199（約$1,552），點都唔值炒上$8,800！其實只要你有位美國親友幫你一把，$3,041就可以買得到！
原來你去美國AT&T 買iPhone 3G 時，雖然講明要簽2年約，但精到痺嘅美國華僑一早睇到AT&T 的條款講明，但凡毀約只需付罰款US$175（約$1,365）即可了事。計一計數，8GB iPhone 3G 只需US$199加8%消費稅，再加US$175毀約費就可以得到淨機1部，總數US$390，即港幣$3,041；16GBiPhone 3G 都只係$3,883，去先達用$8,800買機？你個腦唔係有問題吓嘩？
只要去AT&T 官網睇吓「iPhone Terms and Conditions 」，清楚講明毀約賠款US$175，有圖為證唔係吹水㗎！網址：
http://www.wireless.att.c ... erms.jsp#iPhone
至於firmware 2.0的解鎖方法，連YouTube 都有片教埋你點做，保證電腦白癡都搞得掂，請讀者自己自行上網搵啦！
Firmware 2.0被解鎖一早已經係舊聞，不過主流iPhone 2G 用家都係偏好1.1.4，所以在香港冇乜人提過。
鎖都解埋！
有人會話，美國AT&T 批iPhone 3G 講明有SIM lock ，$3,041買到都得物冇所用。你咁講就錯晒，首先，iPhone 3G 的firmware 2.0早在3月推出時已經被解鎖兼jailbreak 埋，所以用家唔使擔心iPhone 3G 的SIM lock 會搞到你冇機用！
2G 可升級至2.0
iPhone 2G 想玩firmware 2.0嘅App Store 等功能都得，因Apple 已推出官方升級軟件畀人免費更新，iPod Touch 用家要升級就要畀US$9.95（約$77.6）。不過，香港大部分嘅iPhone 2G 都解過鎖，唔可以循正常途徑升級，一升就會變磚，除非你部2G 之前冇crack 過，否則唔好亂升級呀！
志雲iPhone 3G 飯局
《志雲飯局》一向由陳總拍板揀人做訪問，今次iPhone 3G 成為當紅炸子雞，勁到掉轉頭邀請陳總坐低來個飯局，唔講飲唔講食，淨係講吓新舊iPhone 之別。陳總自iPhone 上年6月推出後一直使用至今，在15分鐘的飯局上已經有4個miss call 同2個unread mesg.，證明陳總使用iPhone 的次數一定比別人更多，更有資格講iPhone 。
iPhone 經驗值：進階（1年零1個月）
買唔買iPhone 3G ：買
雖然陳總鐵定會買iPhone 3G ，不過佢唔會經3HK 買行貨上台，反而一早託美國朋友帶第一水新機到港，原來最醒就係佢，$3,041就買得到！
iPhone 3G 上網唔夠快
始終iPhone 3G 比舊iPhone 的最大分別是流動上網速度，所以立即邀請陳總試試3G上網，陳總亦二話不說立即登入tvb.com ，因為多圖同多字，可以試到上網速度。「坦白講，我都係覺得iPhone 3G 上網唔夠快，比起我用notebook 經WiFi 連接慢；講send email ，iPhone 亦不及Blackberry 快及有鍵盤的方便。」說時更立即從褲袋拎出他的Blackberry 。或者你會笑陳總咪要拎好多嘢出街？但係以陳總身份，有助手跟身，拎更多都只係助手拎，就自然會拎晒對佢最方便嘅嘢出街啦。
最讚SMS 手寫輸入
關於iPhone 3G 推出前的新聞，陳總一直最關心iPhone 3G 內置的手寫中文輸入法，事關陳總用得iPhone 最多的功能係send 中文SMS ，最想比較舊iPhone 的非官方手寫軟件HWpen 及iPhone 3G 內置的官方手寫軟件之別。「新版個反應快咗，而且寫得好順，辨識力加強咗之餘仲有埋以前冇嘅聯想字庫，方便！不過而家用緊2G 的手寫輸入法可同時認到繁簡體，反而iPhone 3G 唔可以，有點遜色。」記者約陳總訪問時都收過他的SMS ，證明佢真係好迷SMS 。
iPhone 3G 唔受潮
返回飯局話題，年初陳總邀請呂方做《志雲飯局》嘉賓時便送了他一部iPod Touch為見面禮，假如要將iPhone 3G 作為禮物，佢又最想送畀邊個呢？「暫時諗唔到送畀邊個喎，通常會花一星期時間去諗送甚麼禮物給嘉賓。不過iPhone 3G 這類潮物只適合在未推出前送畀人，或推出後一個星期內送畀人至感受到潮味，太遲至送就冇晒潮味！」陳總說話果然有玄機。
陳總對iPhone 3G 有幾著迷？第一時間將自己部iPhone 同iPhone 3G 秤上手作360度環迴仔細審視。「3G 同2G 對我來說分別不是太大，不過單睇3G 版比舊版slim 、輕啲，感覺有少少似iPod Touch 。」
當陳總初次試用iPhone 3G 登入
http://tvb.com時，居然有蝦碌事件發生，部iPhone 3G 突然上唔到網，之前記者明明試過上網冇問題，可能因為網絡問題吧，陳總試咗幾次先上到。
AGPS又係必試功能，經Google Map 定位發現自己身處灣仔時，看見那幅衛星俯覽圖時高興到笑出聲，不過重點係圖中屬於陳總的黃色iPhone 膠笠（紅圈），證明佢好錫機。
試新版中文手寫輸入法時，記者八卦吓佢會寫啲乜，原來係個「交」字，莫非陳總係高登人？原來佢用聯想字庫接了個「通」字，其實佢係想寫「交通」二字，幾驚佢想寫iPhone 3G 好「交」。
等第3代iPhone
星界用家iPhone 3G 追揸沽
Rosemary
iPhone 經驗值：中階，玩過但未曾擁有
買唔買iPhone 3G ：唔買
Rosemary一直有用開Mac 同iPod ，可以話係半個Apple 迷，惟獨揀手機一直鍾情Nokia 。「iPhone 3G 夠薄，去ball 時放入clutch bag 都唔阻碇，不過之前玩過第一代iPhone ，send SMS 唔夠方便，例如唔可以forward 等小問題；而且3G 版相機冇upgrade 到，亦冇加補光燈，我會期待將來影相會再進一步嘅第三代iPhone 。」
Rosemary 成日影相，固然對相機有要求，試機時即席反客為主以攝影師做model 試相，期望遲吓有機會出第3代iPhone 時，個200萬像素相機質素再高啲。
8GB 就夠用
Kama
iPhone 經驗值：未曾接觸
買唔買iPhone 3G ：買
「未真正用過iPhone 之下，一試發覺反應好快，介面啲icon 又勁得意，雖然自己整咗長gel 甲較難篤芒，但係仍然好鍾意機背黑殼夠靚夠grand 。平時都會用手機聽歌同影相，但用量唔算多，所以8GB 已經夠用，唔使要16GB 咁多。」
好多女仔都好似Kama 咁整咗gel 甲，篤芒係冇咁方便，但係為咗部靚機，篤慢啲都唔拘啦。
唔使再偷偷摸摸
Donald
iPhone 經驗值：進階（已用iPhone 近1年）
買唔買iPhone 3G ：買咗
「用開過部係2G 水貨，上唔到iTunes upgrade 不特止，本身上網都唔快，感覺好似得物無所用。3G 就唔同，一來係行貨可以名正言順上iTunes store ，等埋位前上網速度又爽啲。不過更希望iPhone 遲啲可以send MMS 同直接download YouTube 片，同埋等緊iTunes store 有歌賣就最fit 。」
艾粒二子為iPhone 3G 首日開賣會MC ，亦同時睇中白色版仲即席登記嗱機走，臨行前Donald 同記者講：「邊有男人會用視像㗎，係女人先話要用！」
