萬眾期待由美國蘋果公司推出的iPhone 3G 手機，明日正式在港公開發售，最初有指每部機只售1,000多港元，引起全球騷動，不過現時香港的行貨入場費並不便宜，代理商和記旗下的3香港推出的iPhone 3G 機價連綑綁月費，最少要花近8,000元才能率先擁有這部潮物。
娛樂圈一班潮人兼追捧新科技電話的明星如黎明、麥浚龍（Juno ）、徐濠縈及陳志雲等，也對這部潮物蠢蠢欲動，希望第一時間擁有。其中黎明自93年起為和記拍攝手機廣告，雙方關係良好，他已獲電訊公司答允送贈數部iPhone 3G ，女友樂基兒相信也因而受惠。不過也有圈中人包括梁詠琪（GiGi ）、薛凱琪及黃偉文等大唱反調，表示對這部全球熱捧的iPhone 3G 沒興趣。採訪：林妃
《和記阿May 情 94年》
黎明自93年起為和記拍攝了10多輯手提電話廣告，與電訊商關係良好。
喜一機走天涯
黎明：我而家都用緊2G 嘅iPhone ，除咗外形好睇同夠薄之外，最方便係可以收e-mail ，阿Mark （雷頌德）成日會e-mail 衞蘭同衞詩啲歌嘅demo 畀我，咁我喺外地可以即刻download 嚟聽。另外睇相又可以拉闊拉大嚟睇，像真度又高，影相都好靚。至於3G 嘅iPhone ，有電訊公司會送幾部畀我，我希望呢款iPhone 上網可以更加快，部機又可以帶去美國、韓國同日本用，一機走天涯，相當方便。
《99年》
《00年》
資料圖片
《必買iPhone 3G 》
繼續挑戰蘋果
徐濠縈：我之前用5,000幾蚊買咗部2G 嘅iPhone ，不過用了一陣就壞咗，最慘就係電話啲歌乜都冇晒，reset 都唔得，不過我唔會灰心，我會再買佢個3G 行貨版，不過要等佢價錢回落先，第二、三水先會買，始終電子嘢等佢穩定先買，因為自己一直係PC 人，想繼續挑戰蘋果，始終佢功能集於一身。
方便潮遊日本
Juno ：之前2G 嘅iPhone 一出，我有個美國朋友已經送咗畀我，但係我用咗一陣就冇用，因為我唔慣冇keypad 嘅電話，好易成日㩒錯掣。今次我想買3G 機最主要原因係我成日去日本，咁就唔使換電話，我會揀黑色。不過我要考慮價錢，因為今次呢部機係sell 震撼價平，如果超過7,000蚊就要考慮一下先。
Donald 、少爺占
孖寶同揀白色
Donald ：我而家有兩部電話，其中一部係iPhone ，我已經託人幫我訂最新過部3G ，會買白色。我而家呢部係水貨，有時要upgrade 一啲程式可能會死機，所以我好想要3G 呢部。而且3G 又可以隨時上到網，方便我有時喺街都可以check 到e-mail ，最大好處係去日本唔使換機。
少爺占：我都叫咗人幫我訂白色，其實我一向都唔追新機，之前都冇用iPhone ，但Apple 其他產品我都有用，今次呢部3G 有得打電話又可以上網同當iPod ，真係好方便。
多用途機岩用
古天樂：蘋果iPhone 嘅2G 電話我已經有一部，因為3G 去日本可以用到，所以我都買番一部，不過而家香港只出得500部，未必可以即時買到，我可能叫朋友幫我喺外地買，其實電話係潮流嘢，真係好難追得貼，不過蘋果iPhone 嘅3G 係一部多用途手機，幾岩我用。
軟件多夠得意
陳志雲：我用咗iPhone （2G ）都有一段時間，佢有好多小玩意軟件可以download ，我覺得幾得意。嚟緊出新一代iPhone （3G ）我都會買，已經一早託朋友幫我訂。
黃偉文、黎堅惠
《唔買iPhone 3G 》
嫌Touch Screen 麻煩
黃偉文：我對佢冇feel ，因為自己用慣咗另一個牌子，已經用慣用熟操作介面，個理論等於用緊PC 同Mac 機，所以唔會轉，之前已經喺朋友手上用過touch screen 手機，覺得好麻煩，相信我會亂咁mistouch 。而且我唔覺得iPhone 特別靚仔同醜樣，其實手機近七至八年嚟已經喺設計上冇特別突破，總知唔覺得佢視覺上肉酸。不過如果好好功能，7,000幾蚊都唔算貴，我用緊過部都要呢個價。
學操作System 費時
黎堅惠：之前已經玩過朋友嘅iPhone ，少少難用，太sensitive ，尤其係我啲有小朋友嘅媽咪，加上iPhone 係另一個system ，要由頭學過嘅話，又要投資過時間。不過Apple 出嘅產品，強項永遠都係靚，潮物一定貴，係要飲頭啖湯嘅，就要畀一個溢價。
綑綁上台唔平
梁詠琪：目前我已經擁有一部iPhone 2G 電話啦！我覺得2G 手機嘅功能已經足夠我用，冇必要再花錢去買3G ，加上而家喺香港買3G 一定要上台，計埋上台價，其實架機唔平。我之前買iPhone 2G 主要係嗱嚟聽歌。
靜心等待口碑
何韻詩：暫時我未有打算買，因為而家用緊嘅手機功能都OK ，至於代表潮流嘅iPhone 3G ，等推出之後聽吓口碑再決定買唔買。
唔崇尚新科技
薛凱琪：我知iPhone 有3G 新電話，呢排身邊好多朋友都提過，但我唔太崇尚新科技，冇乜呢方面嘅觸覺，通常都係朋友試過，睇吓好唔好自己先決定買唔買，所以冇特別搶購。同埋上次我出席Nokia 活動，廣告商送咗兩部電話畀我，有排用啦。
