香港衰空氣唔好,多國精英運動員捨港取澳,移船澳門集訓

北京奧運仲有一個月多 就揭幕，全國上下都話we are ready ，但香港未 到獎牌，就先輸一仗畀澳門。

國家 奧運代表隊不日殺到，不過唔係 香港，而係去澳門 。

唔少國家奧運健兒去北京參賽前，會先到澳門集訓，主要係為適應時差、氣候呀咁。外交界消息透露，來自英國、葡萄牙、巴西、科威特、阿根廷以及俄羅斯等多國約近800幾位運動員，最快7月底就會登陸澳門，進行最後操練。

港體育場館輸幾班

點解外國精英選擇澳門而唔係香港落腳呢？有外交官同八方解謎團，話部份健兒唔直接去北京集訓，係因為擔心北京空氣污染影響作戰狀態；而香港空氣質素又唔好得幾多，所以部份國家寧願到澳門備戰。另一個原因係澳門酒店又新又大，與其畀貴租住香港酒店，不如捨港取澳更數。

專業運動員刻苦耐勞，酒店質素可能係次要，訓練場地掂唔掂先係首要考慮因素。澳門年前舉行過東亞運動會，興建多個體育場館都符合國際標準，而且場地集中；反觀香港，訓練場地連本地運動員都唔夠用，何況借畀外國？

話分兩頭，有外交官同八方半講笑咁話，澳門雖然配套齊全兼方便集訓，但都有另類風險。尤其是澳門賭場林立，聲色犬馬娛樂乜都有，萬一有運動員集訓完悶悶出去輕鬆，然後畀班隨團記者或者狗仔隊影到佢去「娛樂」，參加olympic games 變成去gambling ，就唔係幾好啦。