金融High Tea——住水晶球炒港股

金融High Tea——住水晶球炒港股
2008年6月24日

美股杜指上周五急挫220點，恒指低開339點，見22,385後，下午一度反彈上22,830點，收報22,714點，跌30點。期指收報22,660，跌50點，比現貨低水54點，成交83,410張。國企指數跌107點，報12,236點，大市成交597億元。
昨日重磅股中移動（941）[股價及相關新聞]維持升勢，頂住大市，中移動收107.6元，升1%，但豐（005）[股價及相關新聞]則跌0.56%。大市成交不夠600億，又真係幾悶。

經紀張打電話來，話有個客上星期五見個市單日轉向，由升變跌，收市前撲入去買認沽輪。後來見上周五晚美股大跌，心諗今次發啦，等到星期一開市就跌番700點、800點，中番舖大。點知昨日開市只跌200、300點，已經唔係開胃，個客心諗，跌咁少，老大唔沽貨平倉，點知個市一步步爬番上來，下午時最高時仲升過150點，個客在期指倒升100點時急急止蝕平倉，偷雞唔到蝕米，媽聲四起，話美股200幾點港股都無大跌，唔知搞乜。

小心左一巴右一巴

中環茶友拆局，話散戶唔夠大戶玩，上周五美國期指結算，重淡倉的大戶預要插低美股，不排除他們事先來沽亞洲股票，食「甜品」。當日港股因為內地加油價跟內地市急抽，最高升超過600點，跟住俾人一級級咁沽番落來，大戶係住美股水晶球沽港股。

後來美股果真大跌，昨日一開市散戶自然跟沽，見到港股開市跌得唔多，更覺得天賜良機，大力追沽，大量沽盤造成足夠深度，等大戶可以番貨平淡倉。中環茶友話，散戶覺得無理由的事情，以「預知美股走勢」呢個角度去睇，港股只係超前跟美股走勢，無理由的事就變得有理由，上星期由高位回吐那666點，就已經透支了美股插低結算的拉力，咁睇就易明少少。一句話，老散好難玩，好易左一巴，右一巴。

內地股市未改弱勢，由於周末未有救市政策出台，加上外圍美股又重挫，周一中國股市逐步下跌，上證綜指報收2,760點，跌71點或2.5%，上海、深圳兩市成交額共計只有647億人民幣，比上周五大幅萎縮近五成，其成交淡靜情況，和香港股市可謂難兄難弟。

內地發改委上周宣佈允許加油價，加電價，受惠股開始回吐，最大得益者中石化（386）[股價及相關新聞]跌2.4%，中石油（857）[股價及相關新聞]則微跌0.2%。發改委允許電廠每度電將加價0.025元人民幣，但電力股升完一日，到昨日亦全線報跌，華潤電力（836）[股價及相關新聞]跌6.3%、華能（902）[股價及相關新聞]跌3.6%、大唐發電（991）[股價及相關新聞]跌4.6%、華電國際（1071）[股價及相關新聞]跌2.5%。

金屬股逐隻爆

政策受損者也不見得好到去邊，發改委宣佈凍結發電用煤的價格，煤炭股受壓，神華（1088）[股價及相關新聞]跌1.5%、中煤（1898）[股價及相關新聞]跌2.6%、兗煤（1171）[股價及相關新聞]跌2.9%。內地股民講笑咁話，電力股和和煤炭股實現了「煤電聯動」，聯在一起向下動。

金屬股開始體現成本上升和價格不前的壓力，呢一浪輪住爆出業績倒退消息或被大行唱淡。中國鋁業（2600）[股價及相關新聞]上周五發出盈利預警，料08年上半年純利將會按年倒退50%以上，昨日股價下跌5.7%，跌至9.73元，連10元都跌穿，中鋁去年10月曾大炒至高位26.35元，摸頂唔識走，唔見63%。大行紛紛發表報告看淡中鋁盈利前景，並降低其目標價介乎8至10.6元。

另外，摩根士丹利發表研究報告，將洛陽鉬業（3993）[股價及相關新聞]的評級，由中性調低至減持，目標價更由10元大削40%至6元，理由是銷量增長不及預期。報告指出，洛鉬管理層已確認，公司今年的銷量不如早前所指那樣強勁，加上開支急增，估計上半年度業績會令市場失望。洛鉬收市報7.1元，急跌8.3%。