人民幣匯率進一步
升！截至12/6的收市價位，每100港元只能兌換88.4人民幣。亦因此，國內創業賺取人民幣的港人正不斷上升，有調查顯示，每年北上創業的港人數字，均有兩至三成增幅。
不過，隨著深圳商鋪租金已差不多跟香港睇齊，許多人意識到在深圳創業根本不著數下，很多港商已轉戰較北的地區如常平、廣州等地。
像今期的兩位被訪者阿Ken 及阿潘，都是第一批到常平及廣州創業的港人，他們均在港創業失敗，殊不知北上卻創出另一片天，「響香港創業，生意好就俾業主加你租，響呢度就乜都平，點都著數一啲。」二人異口同聲說。
申請牌照要半年
阿Ken 說，最初上內地發展，還有一點要注意的，就是申請牌照需時。「雖然自從CEPA 實施後，港人申請營運執照已較以往簡單得多，但我仍要向工商所、衞生部、消防局、稅務經辦、村委等逐個部門申請文件嗱牌照，唔似香港有食環署代為統籌，所以香港人需親身到個別部門申請，需時約半年。」
不過阿Ken 說大陸現時已有不少公司，代辦申請營運執照手續，只花四千多元找代理公司辦理，便可保證成功完成所有手續，需時更大幅減至1個多月。「記得當日我一落訂租鋪，已經有人嚟搵我，話可以幫我一條龍做齊所有牌照，而且保證成功，結果真係響一個月後做足晒所有執照。」不過，Ken 建議港人在委託這類大陸的代理公司前，應先了解有關公司背景及口碑，「呢類代理公司香港沒有，而且我聽過好多人話俾代理公司呃，幫襯前最緊要check 吓間公司嘅信譽同資料先。」
開業成本：（人民幣計算）
租金：¥25,500（兩個月上期，一個月按金）
裝修：¥50,000
設備：¥50,000
入貨：¥50,000
雜費：¥10,000
總投資：¥185,500
每月開支：（人民幣計算）
租金：¥8,500
人工：¥8,000（8人）
入貨：¥10,000
營業額：¥110,000
盈利：¥83,500
桃軒港日私房菜
地址：常平天鵝湖路麗景新園3-5號鋪
電話：81894811
Case １
Ken 40歲 桃軒港日私房菜老闆 經營年期：半年
內地平租¥8,500租四層
「我曾經係中價日本餐廳『水車屋』老闆之一，因為業主加租加得太勁，惟有走上內地發展！」阿Ken 眼中，香港營商環境只適合資金豐厚的大財團，對小本經營的商戶，一點保障也沒有。
「我當年揼咗百幾萬搞水車屋，兩年約滿後，業主見我好生意就加租3倍，根本冇得做。」回憶多年前在港創業經驗，Ken 只覺被「屈」，於是把心一橫，5年前全力北上創業。「大陸正不斷進步、人民幣係咁升，加上大陸生活水平比香港低，賺同樣嘅錢響大陸使，生活質素高好多，咁好條件，點解唔上去博？」
開拓中產食肆
阿Ken 曾考慮在深圳創業，但最終打消了念頭，「深圳發展得好快，尤其生活指數，幾乎追到香港！」當年他曾考慮在深圳開設日本食肆，但不足一千呎地鋪的租金，業主就開價五萬多。「如果我用得五萬蚊租深圳一個地鋪，點解我唔響香港租先？」
本身是生意人的Ken ，於是四出詢問他一班做開內地生意的朋友，在5年間，曾與人夾股開設小餐廳作試金石，賺取經驗。半年前他的朋友Kim ，本在東莞常平設廠做手表，也想開拓其他生意，二人便商討起來，「我做咗十幾年手表，想發展多一瓣，咪搞埋食肆囉。」最後決定開設主打中產老闆的私房食肆，今次阿Ken 則真正話事做老闆，並由阿Kim 入股。「我哋兩個都覺得，常平除咗多廠之外，就以吃喝玩樂聞名，但食肆種類全部係食得急走得快嘅茶餐廳，反而針對廠家、大型屋苑住客嘅特色菜館，就一間都冇，我哋就係要針對呢班人嘅需要！」
私房菜夠彈性
於是二人就在常平的市中心的天鵝湖路開設了私房菜「桃軒港日私房菜」。整間餐館共分四層，地庫一層是廚房，一樓是大廳，其餘兩層全裝修成包廂套房，總面積達四千多平方呎。選擇在這里開鋪，Ken 說除了該處交通方便以及被多個大型屋苑如麗景新園環抱外，另一原因是租平。「四層加埋都只係八千五百蚊人民幣，00年我響香港尖沙咀租間千五呎地鋪都要十萬蚊啦！呢度搭火車去深圳火車站仲只係二十分鐘車程，勁方便。」
阿Ken 兼任該間私房菜大廚，私房菜是中式加日式的fushion 菜。阿Ken 有20年做日菜經驗，除了開水車屋之外，更曾在荷蘭教外國人日本菜達5年之久。他選擇開設私房菜，是貪其極有彈性的特質。「我專長係創作新菜式，希望可以創作出一啲糅合中、日、西方菜式嘅特色菜，我可以因應每個人口味而作出調整，唔使局限住四川菜就四川菜、廣東菜就廣東菜咁。」
桃軒港日私房菜開業半年，走中產路線，所以菜式定價與香港定價相若，例如青酒浸豬腳售¥45、藥膳竹絲雞售¥78，Ken 說：「因為客路係廠商，所以定價不會太平。」定價不便宜，卻無阻它成為不少廠家及大型屋苑住客的食堂，像台商熟客林先生，在常平設廠經營電子生意，一星期就有三天在桃軒用餐：「我好鍾意呢度嘅食物質素，新鮮之餘又冇味精，而且每日款式唔同，唔會食到厭！」
至於請人方面，目前桃軒共聘請8名內地員工，每名人工月薪一千元，相對香港，Ken 以超值來形容：「我響香港請1個樓面都要8千蚊，但呢度8千蚊可請8個人。」不過有甜也有酸，Ken 坦言聘請大陸員工絕冇道義可言，例如當Ken 花了數個月教識一名大陸廚師後，他學滿師便即時劈炮不做不特只，還替對家做廚師，攻擊自己。
不過Ken 說：「做食肆最重要係口碑，只要啲菜係真材實料，啲客就會一傳十、十傳百！」阿Ken 表示，星期一至五餐館都一定爆滿，「我哋每月營業額約十萬人民幣，減去兩成成本，毛利有八萬幾。」
假貨層出不窮
就如所有生意，Ken 說起初並非一帆風順，初創業除周圍派發傳單外，尤其入貨，最初更「撞大板」。「我響常平街市買貨，點知就中咗招！因為唔係所有食品入口，所以有次我幫街市間凍肉鋪，入咗一箱魷魚，返到去打開一睇，原來除咗第一層外，全部都係冰！走去講數啲人又唔認賬。」
不過數到最經典，卻是「豬
乳頭掉包事件」。「我哋行內人買豬肉，通常都會買未生育過嘅小豬女，因為豬
肉太硬，係賤價貨。而唯一區分豬
同小豬嘅地方就係兩者嘅乳頭，但某啲大陸豬商就衰到切咗豬
乳頭，再用豬女乳頭縫上魚目混珠。」他坦言，在大陸甚麼都可以是假，所以現時每件貨，他也會check 得清清楚楚。
北上創業手續多
香港人返國內創業要辦很多手續拿取需要證件，大致如下：
第一步：香港身份證明
香港人首先要申請「香港身份證明」，可以透過香港的中港事務律師行代辦，葉謝鄧律師行的鄧兆駒律師說，辦理費用$2,200起，約5個工作天便可辦妥。
第二步：商場合約鑑證+衛生許可證
嗱到香港人身份證明，到內地交妥首期、按金後，便可取得商場發給的「商場合約鑑證」。如你所開的鋪頭會售賣食品，就要到所屬區的衛生監督防疫站做身體檢查，每人費用約¥150至¥200，拿了健康證，店鋪又通過環保及消防審批，便可取得衛生許可證，費用¥10。
第三步：個體戶營業執照
之後再到所屬區的「工商局」辦理個體戶營業執照，要出示「香港人身份證明」、「商場合約鑑證」及「衛生許可證」等，費用¥30，需時大概30至35個工作天。
第四步：報地稅/ 國稅
國稅即國家稅，地稅即地方稅，申請者要以店鋪名義申請國內銀行戶口，再帶同營業執照及香港人身份證明，先後到屬區的國稅局及地稅局辦理手續，辦妥後每月會以自動轉賬形式過數。
最後是要去所屬區域的「工商局分區管轄區」報到，填寫銀行帳戶資料、每月收入，再依店鋪大小、營業額及國稅金額，向個體戶徵收一筆工商管理費。若以100呎的時裝店為例，每月繳交的國稅地稅連工商管理費總數約¥1,000。要注意的是，即使店鋪蝕錢都要繳交這些稅項。
Case 2
阿潘50歲 CAFFE FRAPPESSA 老闆 經營年期：4年
廉價人才任我請
約阿潘做訪問，千里迢迢走到他位於廣州天安酒店地下及一樓的「CAFFE FRAPPESSA （啡常品）」，未走進去已經嗅到陣陣濃烈的咖啡香味。「係咪好香呢！我用全世最好嘅咖啡豆即磨，炮製一杯最好嘅咖啡畀顧客飲㗎，我對每杯咖啡都好有要求㗎！」
阿潘現在是廣州市咖啡行業協會副會長及國際百瑞斯塔（咖啡師）競賽中國賽區認證評委。他六歲已愛上喝咖啡，輾轉充任三十多年咖啡批發貿易工作。「咖啡同我結下不解緣，去到邊都脫唔到關係！」他希望能將咖啡介紹給每個地方的人，所以8年前在元朗及旺角開設咖啡店，可惜最後執笠收場。歸咎失敗原因，在於喝咖啡並不是香港潮流。「嚟得我間鋪飲咖啡嘅人係真正懂得欣賞靚咖啡嘅人，唔係一般茶餐廳美國Starbucks 之流，所以我嘅客人全部係鬼佬，一個香港人都冇！」
二千蚊請大學生
阿潘以純正意大利咖啡自居，不為粗製濫造的美國咖啡店同類，而為了完成他的夢及節省成本，四年前他選擇在廣州創業，並把咖啡店開設在最多外國遊客出入的天安酒店內，「其實係酒店總裁主動搵我開咖啡店，我哋響一次咖啡師聚會中認識，佢飲過我炮製嘅咖啡，我哋就friend 咗啦！」
阿潘坦言，在廣州創業客觀環境比香港優勝得多，除了租金較平宜，人工低亦是重要因素。「我間鋪二千幾呎租金都唔使一萬，響香港連一格廁所都租唔到呀！」他表示廣州創業費用是香港的四分一；尤其內地市場大把廉價人才。「我哋主要做外國人生意，成間鋪由侍應生到咖啡師都要英文水平好。響香港邊有英文好嘅大學生肯做長工侍應？響廣州情況就完全唔同，啲識講英文嘅大學生，會以做我哋呢啲專做外國人生意嘅咖啡店為榮，我一登招聘廣告，啲大學生搶住嚟應徵，英文水平又好，畀二、三千元蚊佢哋已經好開心，香港？發夢啦！」
有辣有不辣，阿潘說內地大學生肯搏肯做，但比起港人始終機動性不足，「唔夠香港人咁話頭醒尾囉，例如啲客飲完杯咖啡，香港侍應會第一時間自動自覺收嘢，但大陸人就要叫先做！」
所以每個入職的員工都必須經過4個月訓練，除禮貌、儀表之外，亦必須由低做起，學懂怎樣由一杯最簡單的齋啡學起，直至懂得炮製一杯好咖啡，以往在香港，阿潘訓練一個員工約需三個月時間，但在廣州時間，時間會較長。
不過，雖然在大陸訓練一個員工的時間長了，但阿潘沒有後悔北上創業的決定：「雖然佢哋（大陸員工）機動性唔夠港人，但服從性一流，而且工作有交帶，而最緊要係呢度開業平好多！」
開業成本：（人民幣計算）
租金：¥30,000（兩個月上期，一個月按金）
裝修：¥50,000
設備：¥50,000
雜費：¥10,000
總投資：¥140,000
每月開支：（人民幣計算）
租金：¥10,000
人工：¥8,000（4人）
入貨：¥10,000
營業額：¥70,000
盈利：¥42,000
CAFFE FRAPPESSA
地址：廣州越秀區解放北路960號天安酒店地下
電話：83542542
位處常平天鵝湖路的桃軒港日私房菜連地下共四層鋪位，租金¥8,500，勁抵！
Ken 親身在法國入口高質素紅酒。
Ken （右）經歷在港創業失敗，半年前與Kim （左）在常平合作搞私房菜，結果成功。
兩款桃軒招牌私房菜，K 仔焗蟹（¥時價）
