南華件波衫少有咁貼滿贊助，心口有PCCW （電訊盈科），手臂又有澳門星際酒店，件波衫要賣成$350，現在已經斷咗貨，好賣過英格蘭。
農夫隻歌仔〈學海無涯〉如是rap ：「人哋踢皇馬，我就踢南華……場場和波和過和仔……」搞到踢南華，真係好似好失禮咁。
不過今時唔同往日，和仔唔係南華主將，擔正過個叫佢靚仔文彼得，加埋近年做埋娛樂嘅羅傑承買起成隊南華，實行波牛當明星做，出入著過萬Giorgio Armani ，同周麗淇傳吓緋聞，南華變本地波icon ，仲要喺Yahoo 開blog 寫日記，香港紅魔喎，個名都嚇死你啦！
圖左至右
姓名：鄭少偉（亨利）
位置：前鋒
年齡：27歲
效力南華4年
姓名：文彼得（Peter ）
位置：中場
年齡：26歲
效力南華2年
姓名：李志豪（志豪）
位置：右後衛
年齡：26歲
效力南華7年
南華今年蟬聯冠軍，老闆羅傑承（後排右二）同老闆娘梁芷珊（後排右一）咁高興梗係要捧場，而且羅太除咗幫班球員度形象外，仲會做埋心理輔導，愛老公，仲愛埋佢隊波。
今年南華又捧盃，香港代表隊兼南華足球員文彼得（Peter ）、鄭少偉（亨利）和李志豪異口同聲狂讚班主加BMA 公司老闆羅傑承：「羅生接手後除咗踢波，我哋連生活都同以前有啲分別。」
前幾年本地波淨係識請外援，土炮冇人理，家陣唔同啦，南華有三寶助陣，坐旁邊過兩個黑人外援？邊個嚟㗎？
GA 型男
外國球星開記招老馮著西裝，南華都唔輸蝕，上年開始有Giorgio Armani 撐，成套西裝價值估計超過2萬，著住套貴嘢，波牛都變型男。
搵多咗錢
係呀，確係好大分別，以前南華冇贊助，家陣佢哋出記招成套Armani 西裝型到爆，以前想睇外隊要等賀歲盃，家陣利物浦、富咸、曼城排住隊嚟，最大分別係如今南華比賽旺角場起碼坐滿3分2，唔似以前得幾個阿叔一路睇一路隊啤爆粗。
南華班球員今年初更被安排同鍾鎮濤唱賀歲歌、老闆羅傑承又揼本開戲搵周麗淇襯，拍電影學足老外電影《一球成名》，最實際係佢哋真係搵多咗，港版亨利鄭少偉說：「我哋好好彩係職業球員，人工幾多就唔可以講啦，總之唔錯啦，出吓function 都有錢收，好過其他本地球員好多啦！」
上年文彼得同周麗淇食飯，周麗淇仲好識做公開讚對方靚仔，文彼得得啖笑：「根本成枱都係公司同事，莫講拍拖，就連去玩都唔敢飲醉酒啦！」
梁芷珊教路︰「篤串魚蛋都要型！」
如前所講，家陣成隊南華最紅過個叫文彼得，紅在唔只踢波叻，同周麗淇傳緋聞撻著先搞鬼，文彼得話：「大家係同事出嚟食飯唔出奇，但我同Niki 真係冇嘢，人哋講吓冇所謂。」踢波踢到同明星傳緋聞，係咪老細背後出手就唔知，不過文彼得說現在出街確係要keep 形象兼心理輔導佢點做local 球星：「老闆娘（梁芷珊）話而家同以前唔同，出街會多咗人指指點點，就算街邊篤串魚蛋都要食得有型啲，點知幾時會有人影相㗎！」
《蘋果日報》圖片
曾是英皇旗下藝人嘅文彼得（箭嘴）跟Twins 同成班英皇人包括未變落水狗嘅阿嬌拍廣告。上年正式過檔BMA ，Peter 竟然話：「羅生畀好多自由度我哋，有啲嘢如果唔想做，佢唔會迫我哋。」咁似梁洛施嘅？
港版亨利
都話南華講包裝，剪個雞冠頭嘅鄭少偉外形已經夠潮，擁有一半泰國血統，黑黑實實兼有孖「fat 」唇，於是個朵叫亨利，幾易入腦呀，雖然只係半個香港人，但對香港球壇好肉緊，「香港政府畀太少資源辦運動，呢十幾年都冇新嘢只係靠球員自己發力，南華球員算係較幸福嘅一群啦。」
《蘋果日報》圖片
文彼得做明星，鄭少偉就話想全力踢波，上年被委任為元朗足球大使，仲鬼咁開心，他說：「將來退役後想繼續留喺球壇培育下一代，做明星？No way 啦！」
溫柔熱血
外表man 到死嘅李志豪，估佢唔到原來講嘢超溫柔兼唔該前唔該後，不過一講本地足球仍然有火，「我試過喺麥花臣球場踢，成場得幾個人睇。唔係想好多人識我哋，但有資源會差好遠，好似而家閒閒哋坐滿3分2，香港足球唔再係爛仔波，政府愛理不理，只希望多啲好似我哋老闆羅生之類愛足球嘅人出現。」
淨睇樣仲以為李志豪一定惡過鬼，但估唔到講嘢語氣係三個之中最柔：「樣惡阿媽生㗎嘛！不過足球始終係身體接觸較多嘅運動，推撞冇脾氣就呃你嘅！」
網友讚好波
除咗網友成日讚佢好波外，岩岩染咗頭白毛嘅文彼得就放咗自己張靚仔相上blog ，咁岩blog 內又有關心妍廣告，做宣傳一雞兩味喎。
除咗文彼得外，亨利亦有好多fans ，仲有網友話戥佢有時冇份出場替佢唔抵添。
開blog 講白毛
文彼得曾經簽過畀英皇，不過家陣羅生係班主，文彼得亦過檔畀BMA ，十足明星咁成日轉會。南華球員仲有私家blog ，文彼得上週五（13日），話自己染咗髮放埋自己張相畀fans 睇，點睇都似星多過似球員。
