對於自己脹爆上圍，Tanya 亦有意見：「著衫冇咁好睇，所以平時都會特登著嘅鬆身衫。」
擁有32D 噴血身材的吳家欣，去年十月被拍得與男友張震遊台浸溫泉，今年四月又俾人影到煙韌遊泰國，拍拖拍得鬼崇，雖然兩次都斷到正，都死口唔認，但反而對自己的身體就極度「開放」，推出以水著為主題的寫真集，更揚言：「我冇底線！」嘩！係真唔係呀？
去年十月被拍得與張震遊台，雖然無拖手，但一杯飲品兩份飲已交代一切。
由於擁有驕人身材，因此經常成為比堅尼model ，更有「首席水著女」稱號。
她自備了廿多套私伙泳衣往拍寫真集。
說話直接的她，一提到張震猶如觸痛神經，「唔好提佢啦！」
全裸都OK
除了張震，吳家欣（Tanya ）最大賣點就是其32D 的逼爆身材。早前她便到佬沃取景，拍攝耗資六位數字的寫真集。出性感寫真，Tanya 自言無須得張震批准，她豪邁地說：「我做乜都自己決定。我要趁後生留倩影嘛，趁而家身材仲fit ，唔通真係等到老、皺晒皮先影咩，影得靚就OK 啦。」她大膽表示冇底線，全裸都會考慮，「以前不嬲影開好多性感相，不過意識好緊要，唔好鹹書嗰嘅淫蕩囉！寫真集我有全裸㗎，但係遮住咋嘛。好似湯唯嗰嘅就要睇吓點解要咁樣做，有原因同埋都要睇邊個攝影師，呢個係好緊要。」
打算進軍影壇的她將會接拍王晶及陳百祥開拍的電影成為「晶女郎」，寫真集可以說是試金石，用來測試市場反應，「如果反應麻麻，即係可能行性感唔得，咁咪再睇吓有乜發展。」
打正旗號走性感路線，於拍攝期間Tanya 非常合作，借來的性感服裝照單全收。
右胸前的疤痕是三年前割脂肪瘤的痕跡，「縫完針要用紗布遮住，爆線都唔知，傷口埋得唔好。」
兩三歲時的Tanya 與母親。
雖然是同父異母，但Tanya 與吳佩孚感情很好。
鍾意男人
Tanya自出道以來一直緋聞多多，○四年與LMF 主音阿華拍拖、又傳與林建岳長子林孝賢有過一手，甚至有傳她是同性戀的中堅分子，又仔又女，認真亂糟糟。一談到成疑的性取向，Tanya 答得爽快：「我鍾意男人！」
事實亦證明她非常識揀，男友是台灣型男張震，二人拍拖兩年，感情穩定，不過一提到男友，一向有嗰句講嗰句的Tanya 便立即落閘，耍手兼擰頭說道：「我哋係好朋友。」問到欣賞「好朋友」什麼？對她有何影響？她又敏感地說：「咁咪即係話我鍾意佢乜嘢！」看來她一心要與「張震女友」稱號劃清界線。「我好緊張自己嘅事業，唔好話我做邊個背後嘅女人，我會做好我眼前嘅嘢，我淨係想靠自己，無論男友係邊個，我都想有自己嘅事業。」靠自己當然是好事，但事實是在各大報章，Tanya 仍是被冠上「張震女友」名號，「我都冇辦法，但我覺得提多幾次就一定唔會再講㗎啦！」
唔提男友，只談愛情觀，外表極cool 、說話無尾音的Tanya 就滔滔不絕，還不經意地表現出女性的一點忸怩。自言是典型天蠍座性格女孩的她說：「天蠍座好記仇㗎！你唔要我，我就好憎你！不過其實天蠍座好專一嘅！」她說以前拍過五、六次拖，最長三年，最短一年多，勉強來說都可以歸類專一，「最好天長地久嗰隻，我未試過拍散拖，我鍾意定落嚟，拍散拖好冇安全感！」至於揀男友，Tanya 表示當然要對自己好，「仲要孝順、錫屋企人，其他嘢冇所謂，唔靚仔都唔緊要。」出名孝順、錫屋企人的張震中晒，再加上係型男，簡直係bonus ！
蒲入行
今年廿六歲的Tanya ，五歲時父母離異，此後再未有跟父親聯絡，一直跟喺母親生活。十五歲時全家移民加拿大，高中畢業後便獨自返港，九八年一個raveparty 中被發掘入行，做了七年模特兒，之後兩年試過轉職金融及marketing 工作，但最後又回歸模界。不過她覺得做模特兒始終有年齡限制，於是決定嘗試做幕前，搏一鋪。
Tanya 除了有一名信奉基督教、於教會工作的母親，她還有一名比她大九年、同父異母的哥哥玄學家吳佩孚，雖然同父異母，但二人感情卻極好，如此近城隍廟，Tanya 有否找哥哥吳佩孚指點迷津？「佢年年都話我會好，每一年都係咁講。反而佢會成日叫我小心身體，又會話天氣冷呀、小心病咁，我覺得呢啲都係關心嚟嘅。」
即係問天不如問自己囉！
