如果，婚姻是戀愛的墳墓，同居就是戀愛的殮房。即使起初甜蜜，日子一久，日對夜對，感情還是會變淡，更何況，相戀不一定能相處，生活習慣迥然不同的兩個人，一下子在幾百呎的單位里困獸鬥，很容易，至少其中一方，就會受傷。
感情的侵蝕與傷害，很多時候，是由生活小節的齟齬衝突開始。
浴缸小便
很多男人都習慣在浴缸或企缸一邊沖涼一邊小便。未必是刻意，但男人總是在沖涼被水淋的時候才有尿意，一路屙一路沖仲好有快感添。不過，有時只因為懶得揭廁所板（唔知點解同居女友都喜歡將廁板扳下宣示主權），費事滴濕，懶得動手抹，又或者單純認為浴缸或企缸的目標都比坐廁大，瞄準較易。
同居女友一旦發現男友在浴缸小便都會鬧爆，然而有女生告訴我也曾試過一邊沖涼一邊小便（不要瞪大眼睛啦男人），不過是腿張開少少就可以了，沒甚麼值得大驚小怪——只許州官放火不許百姓點燈從來都是女人天性，她們屙得高明，你們屙得蠢，不懂得毀滅證據，留下蛛絲馬跡，像你們偷食，嘴巴總是抹不乾淨，抵死囉。
唔訓又唔俾人訓
男人多數鍾意放工沖完涼就黐住部電腦，未必有正經嘢做，總之就做吓嘢又hea 吓，搞呢搞路唔肯熄機訓覺。女人怕有黑眼圈，通常呢個時候敷完mask 就搽cream 訓。男人好奇怪，明明自己唔訓，但又唔知點解唔准女友訓，一知道佢擰轉背訓先，就會發脾氣，行出行入大大聲，拉櫈撞枱，呯拎棚冷，係要令對方不能安寢為止；掉番轉如果自己第日要早起做嘢訓先，女友唔訓住睇碟睇書用電腦呢，自己又唔肯訓先，騰嚟騰去，有時仲發晒老脾，又唔諗吓自己出去同人飲
飲到半夜三更嗰陣，究竟女友一個人響屋度諗緊咩喎。
男人成日笑女人去洗手間要約埋一齊，但男人訓覺，咪又係要一齊？
唔洗腳又唔著拖鞋
女人永遠諗唔明，點解男人啱啱沖完涼，對腳都可以臭到咁。同居男女一齊去人哋屋企作客，女友就尷尬，因為入屋除鞋，男友對腳就臭到成屋都聞到咁滯，又唔可以偷偷哋推佢入人哋洗手間洗腳喎。
十個男人有七個都唔鍾意著拖鞋。著著吓都可以唔見咗隻，又唔知幾時唔見。極少男人識得喺臨訓前自動自覺洗腳，踩到一腳塵，撼埋同一張被，女人諗起都作嘔。
諸如此類一大堆
小便完唔立即沖廁，儲埋幾次先一次過沖；臉巾抹完掛番永遠唔洗；用完熨斗從來唔識擺響安全角落；訓覺衫褲著成個星期唔叫都唔識換；拎雜誌入廁所睇永遠唔識拎番出嚟；剪完指甲腳甲就算有雜誌兜住都唔會掃地；開洗衣機洗衫永遠唔記得用洗衣網袋住女友嘅胸圍底褲同貴價tee 雪紡裙先放落機……
同居男人唯一優點係：愈嚟愈多女人唔肯或者唔識煮嘢食，但就愈
愈多同居男人肯煮肯洗碗。不知幾多女人凌晨一邊敷mask 一邊食微波爐嘢一邊睇碟上網，條條女都係叮叮女皇、零食天后。世界變啦。
女人除咗最憎男人「滴滴仔」之外，更加恨男人將浴缸當尿缸。男人若犯此天條，死梗！
