聽慣頂級音響，發燒友時常將蔡琴視為幻想對象，當你坐喺皇帝位時，佢就企響你面前大開金口，So Fantastic ！但年輕一代，確實好難坐定定、輕輕鬆鬆地欣賞音樂。今次，Samsung 再搭上Bang &Olufsen 推出新作Serenata ，特點以大自然音律為創作，並融入海洋圓形石春設計，指尖一動，即滑出獨門ICEpower 揚聲器，音色甜到漏。
記者：陳國輝
攝影：梁細權
保住靚聲招牌
Serenata 份量一啲都唔簡單，銀色部份全為金屬物料，是以重量達136.4g ，加上內置巨型喇叭，與標榜的骰輕巧嘅Walkman 手機而言，完全係兩回事！不過，其賣點不在於體積磅數，而係整體感覺，模仿石春設計，但唔似全鏡面嘅MOTO PEBL 般女性化。最盞鬼係Serenata 背面收藏咗一隻座枱式喇叭腳，一嚟個款更Pro ，二嚟有用家成日批評手機喇叭唔係向天就向地，音色又坼又散，加咗呢隻腳，音效自然實淨好多！
講到音色，不得不提B&O 獨門技術ICEpower ，查實Samsung 好多款音樂手機一直都用緊佢。但嚟到Serenata 呢一代，機內增設三級人工低音效果，意思係利用數碼技術，將大型音響器材所呈現嘅低音效果，喺手機上再模擬出來。當然，由於喇叭功率有限，其質素必惹人懷疑，但現場試播一些自然音效，例如玻璃敲擊聲、海浪聲等，表現甚至比低音效果更勝一籌！
■貫徹B&O 風格，機身以銀、黑雙色為主。
■方向鍵設計有如CD 唱盤一樣，甚具格調。
■推出滑蓋Keypad 變成ICEpower 揚聲器。
■機面例必刻上B&O 與Samsung 的標誌。
■架起機背摺合的座枱式喇叭腳，外形即變身迷你Hi-Fi 。
■打電話過陣須以Touch Screen 操作。
■最Colorful 就係揀CD 封面過陣。
內置4GB 不插卡
既然玩音樂，記憶容量當然係重要一環，Serenata 唔支援任何一種記憶卡，但內置4GB ，齋用嚟聽歌或儲存大量圖片一定夠用。另外，亦有好多人擔心，如果內置龐大容量嘅話，會唔會拖慢撈機速度？以記者現場試玩過部為例，歌曲佔咗約1GB 容量，但當我一邊聽歌，同時又操作其他功能過陣，反應最慢者僅半秒左右，絕對及格有餘。更值得留意係，Serenata 不論係手機抑或音樂介面，均採用純文字顯示，感覺雖然幾Grand ，但睇慣圖象介面嘅玩家，會唔會咁容易接受到？咁就不得而知喇！
查詢：Samsung （36984698）
■用家可從英文字母搜尋歌曲。
■除4GB 以外，另有21.3MB 用作儲存電話簿及短訊。
■SIM 卡與電池槽擺放喺機背，能夠輕易拆出。
■選址B&O 專門店作發佈，場內有詳盡歷史介紹。
■側邊無多餘掣，支援USB 2.0，方便連接電腦。
售價：$13,888
Profile
制式：WCDMA/GSM 三頻
體積：109.5×63×19.7mm
重量：136.4g
通話時間：180分鐘
備用時間：220小時
播歌時間：300分鐘
主要功能：內置4GB 容量、ICEpower 播放技術、藍芽V1.2、HSDPA(1.8Mbps)傳輸、SRS TruBass 模擬低音、2.26吋256k 色Touch Screen
