平日同愛犬Cash 有影皆雙嘅鄺美雲，上個禮拜六（廿四日）做獨行俠，事關佢要去尖沙咀負責做拍賣官，主持一個玉石商會舉行嘅拍賣會，籌得嘅善款會捐去緬甸同四川賑災。
當日嘅拍賣品，全部由玉石商會捐出，但競投情況一啲都唔激烈，其中一個玉觀音以及一個巨型玉璽，因為無乜人有興趣，鄺美雲索性自己出價買咗去，兩件珍品加埋合共九萬八。較早前已經捐咗七位數字賑災嘅鄺美雲，無Cash 人狗樂，都可以用cash 救助災民。
一身素服前來做拍賣官嘅鄺美雲，競投開始前，佢留心地講解每件玉器嘅底價同特性，最後因競投唔激烈，自己出價買咗個巨型玉璽（紅圈），及玉觀音（右圖）。
父親從事珠寶生意嘅官恩娜，都有到場支持籌款，附近街坊仲嗱定相機影佢同鄺美雲。
鄺美雲不斷落力推銷，可惜反應麻麻。
