一年容易又暑假，做學生爽死，難為打工仔日日做到無停手，受盡欺凌。
嗚嗚嗚……邊位英雄好漢可以打救下？大把。重量級英雄人物，先嚟寶刀未老奪寶福伯，再有三國「瑜亮配」，偉仔單天保至尊獨撐華語片，後有蝙蝠俠。位位真英雄硬漢子，保證救你脫離苦海，兩個鐘頭咁多啦。
《奪寶奇兵4之水晶骷髏國》
導演：史提芬史匹堡
演員：夏里遜福、沙拉保夫
劇情：冷戰時代，鍾斯博士去秘魯尋找神秘水晶骷髏，俄國女軍官從中阻撓。
賣點：最新消息！據部分率先睇人士指出，劇情膚淺，特技效果「流」到喊，毀譽參半。
，一日未上一日唔敢講，唔排除有人惡搞。始終電影系列風行80年代，事隔19年再度回歸，旋即成為「暑期最令人期待電影」之首，足見福伯+史匹堡+佐治魯卡斯呢組耆英鐵三角，魅力依舊。何況，人家話「家有一老如有一寶」，今期3個，益你啦。
上映日期：5月22日
《我要相信：X 檔案》
導演：基斯卡達
演員：大衛杜楚尼、姬莉安德遜
劇情：X 檔案果然冇改錯名，劇情一個謎，只知道獨立單元發展，同電視劇無關。
賣點：由93至02年9個season ，中途98年推出第一套大電影，老字號令人感覺好old ，觀眾可能斷咗癮，集體回憶潮未必人人啱。
上映日期：7月31日
《破天．慌》
導演：禮切沙也馬蘭
演員：麥克華堡
劇情：全人類以為受到大自然災害，點知怪事繼續發生，結局一定估佢唔到。
賣點：《鬼眼》大導演禮切沙也馬蘭出名玩橋，不過上次《禍水》玩大咗，全球勁蝕。幸好今次中文片名改得絕，應該有啲作為。
上映日期：6月13日
咪「小超」梁洛施！
睇完前兩版，未出發先興奮，但難免帶點欷歔。成個暑假只得一套《赤壁》，對「鬼」多過對人？
事實上，亞洲演員十分爭氣，入侵荷里活，飛到國際。注意，注意，點題演員：梁洛施，未來「億萬闊太」，唔好「小超」佢！
《殺神特工》
導演：添姆碧文比托夫
演員：摩根費曼、安祖蓮娜祖莉
劇情：
仔突然被邀加入神秘刺客組織，索媽安祖蓮娜親身培育，正！
賣點：預告剪得一流，咩元素都有齊，確實啱晒一班追求官能刺激嘅觀眾。當然安祖蓮娜套套貼身衫上陣，身形激凸，麻甩仔唔睇歎走寶。
上映日期：6月27日
《新變形俠醫》
導演：盧域斯羅特希
演員：愛德華諾頓、麗芙泰萊
劇情：變形俠醫打遍天下無敵手。
賣點：從未見過一套電影咁快就有remake ，03年先拍過，李安執導，文戲多得滯，全城劣評。新版本加入大量打鬥特技，講真，一個漫畫英雄講多無謂，打飽佢啦。
上映日期：6月12日
《色慾都市》
導演：米高柏德烈京
演員：莎拉謝茜嘉柏加、金嘉德露
劇情：紐約再度fabulous ，4位女英雌再度闖「蕩」江湖。
賣點：單係戲服都有400幾套，攻陷女性市場，睇靚衫，yes ；睇靚人，no 喇！位位年過四十，惟有厚妝抗高清。
上映日期：6月5日
《蝙蝠俠：黑夜之神》
導演：基斯杜化路倫
演員：基斯頓比爾、希夫烈格
劇情：蝙蝠俠繼續行俠仗義，大戰「小丑」。
賣點：第一集有口皆碑，第二集更令人期待，賣點多到數唔晒：《蝙蝠俠》系列本身，香港取景，陳冠希戲份、「雙面人」嘅誕生，當然，一定要睇新版「小丑」希夫烈格嘅演出，佢無法目睹自己嘅成功就過身，真可惜。
上映日期：7月17日
《赤壁》
導演：吳宇森
演員：梁朝偉、金城武、趙薇、林志玲
劇情：家傳戶曉的三國故事搬上銀幕，偉仔飾演周瑜、金城武演諸葛亮，鬥智鬥力。
賣點：暑假唯一華語大片，愛國fans 必捧，可惜近年華語戰爭片泛濫，新意欠奉。片長成兩粒鐘，仲有下集出年先上，兩粒鐘都唔夠講古仔，你話節奏會有幾快！
上映日期：7月10日
《街頭超人》
導演：彼得柏克
演員：韋史密夫、查理絲花朗
劇情：超能力流浪漢成日飲醉酒，神憎鬼厭，有好心人於是幫佢塑造超人形像。
賣點：上一次《魔間傳奇》，韋哥親民訪港，對新片有一定幫助。題材輕鬆搞笑，有飛天遁地有索女，票房冇擔心，絕對有能力超越《魔間傳奇》添。
上映日期：7月3日
《盜墓迷城3》
導演：洛高漢
演員：班頓費沙、李連杰、楊紫瓊、梁洛施
劇情：秉承上兩集，囝囝長大成人，唔小心令沉睡中嘅秦始皇蘇醒，於是急call 老竇出山，父子檔斬妖除魔。
賣點：咁梁洛施呢？去咗做刺客，負責阻止兩父子闖皇陵。其實同場更有楊紫瓊、李連杰、黃秋生、幾百隻兵馬俑，8百個特技鏡頭……可惜，都被梁洛施搶晒鏡了。
上映日期：7月24日
《深海尋人》
導演：徐克
演員：李心潔、梁洛施、梁家輝
劇情：潛水員於沖繩深海突然失蹤，李心潔和梁洛施決定下海營救，發現深海異常詭秘。
賣點：少數港產片之一，海底實景拍攝，睇得出徐克求變心態，奈何鬼后李心潔又拍同類片種，欠缺新意。梁洛施又再K.O ，不過係靠新聞、非技術性擊倒嗰隻。
上映日期：6月12日
《玩叛遊戲》
導演：馬素蘭根尼加
演員：曉治積曼、Maggie Q
劇情：有位麻甩加入神秘性愛俱樂部，繼而捲入殺人兇案。
賣點：有性愛俱樂部自然有性愛，而提供肉體嘅，有飾演交際花嘅Maggie Q ，佢更會透點演出，滿足晒「疑似」案一切幻想。
上映日期：6月26日
《無聲火2.0》
導演：彭氏兄弟
演員：尼古拉斯基治、楊采妮
劇情：尼古拉斯基治演國際殺手，竟被啞女楊采妮迷住，令殺手都想變好人。
賣點：甩毛影帝同楊采妮搞忘年戀，點肉酸都想見識下。而見識嘅定義，即係睇trailer 都夠，唔需要深入了解。
上映日期：8月21日
《少林少女》
導演：本廣克行
演員：柴
幸、田啟文、林子聰
劇情：少女藉著曲棍球，將少林功夫發揚光大。
賣點：超，咪成套《少林足球》咁囉，又有田雞、肥仔聰，直頭倒模一樣。要知道remake 或者翻炒，通常冇好結果。睇，只因為有周星馳情意結。
上映日期：5月29日
十萬個夢想
同一個世界，最好梗係同一個夢想。
諗吓好啦，暑期套套大片，滿足自己之餘，仲要滿足埋班細路。動畫卡通，不二之選。所以，正確嘅講法，應該係同一個暑假，十萬個夢想，十二分疲累。
家長們，辛苦晒。
《功夫熊貓》
導演：馬克奧斯本、約翰史蒂夫森
配音：積伯克、成龍、安祖蓮娜祖莉
劇情：肥熊貓被誤當成武林救世主，侷住練練練打打打，成為一代宗師。
賣點：熊貓＋功夫＋暑假，食正奧運熱，問題係班底，「夢工場」《史力加》玩到有點爛尾，前作《蜜蜂電影》劇情慘不忍睹。慶幸細路仔從來睇公仔唔睇古仔。呢點，先係「夢工場」嘅殺著。
上映日期：6月28日
《太空奇兵．威E 》
導演：安德魯史丹頓
配音：至大粒，薛歌妮韋花
劇情：地球慘被污染，全人類移民外太空，獨留機械人執垃圾執足7百年。
賣點：古仔當然唔會咁簡單，「彼思」一向畫功靚多花臣，之但係，始終細路仔鍾意動物多過死物，舊作《反斗車神》就係咁衰咗，好彩同《功夫熊貓》唔同檔期，呢樣，又係一個慶幸。
上映日期：7月31日
《地心遊記》
導演：Eric Brevig
演員：班頓費沙、祖舒克治遊
劇情：一位教授帶姪仔同爬山專家去地心尋親。
賣點：小說面世後，已被改編過無數次，家傳戶曉。今次加入3D 效果，有新意。卡士更有《盜墓迷城》班頓費沙，冇咗梁洛施，終於可以正正式式做番次賣點。
上映日期：8月14日
《魔幻王國：卡斯柏王子》
導演：安德魯亞當遜
演員：賓班尼斯、利安尼遜
劇情：納尼亞變天，真正王子慘被迫害，4兄妹由人間重返納尼亞，再做救世主。
賣點：又係洗濕咗個頭之禍，第1集口碑平平，大堆頭特技配鬆散劇情，續集應該走唔出呢種大型B級片格局。今次加入新血Ben Barnes ，靚仔，但眾所周知，靚仔當唔到飯食。
上映日期：6月5日
《Keroro 軍曹大電影3之天空大作戰》
原作：吉崎觀音
演員：Keroro 小隊
劇情：Keroro 小隊放假出外郊遊，另一黑暗Keroro 乘機大鬧東京，Keroro 對Keroro 。
賣點：Keroro 已經成為第二個多啦A 夢，每逢過時過節，總會出套電影陪住大家/ 掠水。一句到尾，Keroro 迷，必睇。
上映日期：8月14日
65歲福伯，打得睇得，算係咁。
聽聞《奪寶奇兵》會開拍多兩集續集，福伯有排賺兼有排捱。
今集鍾斯博士有新拍檔沙拉保夫，傳聞係第一集鍾斯博士同舊愛（中）所生嘅仔。
姬蒂白蘭芝飾演俄國女軍官，唔知點解張相好有「笨賊」feel 。
