劉嘉玲以往被問及梁朝偉何時給她「梁太」名份，她會答：「既然都喺我身邊，安全感比名份更重要。」不過今年不斷傳出嘉玲有孕及兩人結婚的消息，偉仔亦對外宣布婚禮「已經搞緊」，睇嚟兩人成為正式夫婦指日可待。
上周五（16日），偉仔嘉玲同赴康城出席影展宣傳活動，事前有指兩人會在當地宣布婚事，故引來各方傳媒追訪。
本刊遠赴康城獨家直擊兩人乘坐頭等機艙近15小時。儘管偉仔嘉玲人前恩愛無比，但記者在機艙內卻發現，兩人交流欠奉，上機不久便各自埋頭爛訓，說話都唔多句，外人還以為他們冷戰。看來長達19年的拍拖歲月，即使未結婚，所過的生活亦猶如老夫老妻了。
飛往巴黎13小時的頭等機艙內，嘉玲偉仔爭取時間訓覺，睡姿首曝光。冇化妝的嘉玲面向天單手壓胸，雙唇微微張開；而偉仔愛側睡，塊面壓著雙手，十足BB 咁。
行為心理學家分析
記者將梁朝偉和劉嘉玲二人在機艙睡覺的照片，給行為心理學家李寶能分析。李表示由於人類佔三分一時間用作睡眠，故睡姿有其象徵意義。
嘉玲性格獨立 仰睡的人性格獨立剛強，比較自我中心，在社會或家庭上多作領導者角色。
偉仔依賴性強 側睡的人依賴性比較強，偉仔睡覺時雙手合十，代表現實中希望可以掌握實在的事物，本身欠安全感。
互相信任 二人面部和睡姿均是背向對方，表示二人對彼此充滿信任，在感情關係中，二人已有默契可以做回自己。
上周五（16日）晚9時40分，梁朝偉和劉嘉玲現身香港赤鱲角機場，準備乘搭10時許的班機赴巴黎，再轉機到尼斯。現場所見，惹上大肚疑雲的嘉玲雖然穿上斗零踭鞋，但她腹部疑似隆起，偉仔亦細心傍到實。對於是否會在康城影展宣布婚事，偉仔甜笑向大班記者說：「你估真係拍戲咩！」
男甜睡女口擘
據知事前偉仔和嘉玲只訂了國泰商務機艙的機位，不過辦理登機手續後，就被提昇至頭等機艙。據知商務單程機票3萬2千多元，頭等則4萬3千多元，二人無形中各自慳成萬蚊。兩人甫進入頭等機艙，嘉玲隨即走到最前排位置坐定，而偉仔則好有默契為對方放好行李，之後兩人甚少傾偈。起飛後接過空姐的兩支水，兩人不久便各自倒頭大睡。由於頭等機艙座位可以舒服地將身體躺臥，兩人很快便入睡。長達13小時的機程，兩人基本上都用作睡覺休息，偉仔雙手放在耳邊的睡姿有如BB 般甜睡。至於除下黑超、不施脂粉的嘉玲，則右手放心口，戴住耳塞口擘擘咁大覺訓，間中傳出陣陣鼻鼾聲。
嘉玲悶爆試黑超
到達巴黎機場，他們需要轉機到尼斯。在候機大堂，偉仔嘉玲雖然平排而坐，但各自四圍望，其間偉仔悶到坐直身子又屈起雙腳，動作多多，而戴住黑超的嘉玲則一直蹺住雙手默不作聲。不過之後偉仔巧遇導演王家衛才有番笑容，孖住王導演在餐廳密密斟，當時悶爆的嘉玲則有理冇理，與助手到名店狂試眼鏡。
其實今次康城影展，較受港人注意的影片是《赤壁》和《東邪西毒：終極版》，而兩套大片均由偉仔擔正，加上近月又盛傳嘉玲有孕及偉仔會在康城高調宣布婚訊，難免成功吸引大批中外傳媒追訪。
考慮「生發發」禮金
據知原本打算不生BB 的偉仔和嘉玲，近年受王菲澎湃的母愛所影響，而重新考慮生BB 。偉仔亦希望給予拍拖19年的嘉玲一個正式名份，故對於今年搞的婚事已著手籌備，當中對禮金一事亦不希望馬虎了事，曾考慮以388萬的禮金數目。「偉仔同嘉玲都算老夫老妻，佢都唔想只係俾幾十萬未來外母咁求其，又想有啲生生發發嘅意頭，所以想俾388萬囉！其實嘉玲嗰邊都冇咩太大意見，話晒大家都咁多年啦！」知情人士透露。
就豪俾388萬禮金一事，記者在轉機禁區內把握機會與二人作個埋身訪問，對所有提問，偉仔都甜笑地回應，之後更「交波」俾嘉玲，似乎想俾女友話事。
記：恭喜晒，你哋係咪會喺年底結婚呀？
偉：（甜笑，未有開口回答。）
記：咁想隆重啲定簡單啲？
偉：（一邊笑一邊嗱行李）係呀，係搞緊㗎啦！
記：聽聞你會俾未來外母388萬禮金喎。
偉：（諗了兩秒，笑笑口）吓，咁犀利！
記：大家都好關心你嘛。
偉：係嘅，依家係有好多傳聞嘅，不過細節嘅嘢你都係問嘉玲啦！
記：（隨即問兩步之隔的嘉玲）偉仔叫我問你喎，其實婚禮嘅嘢搞成點呢？
此時嘉玲頗為愕然，不其然擺出O 形嘴表情，再對住記者禮貌地笑一笑，不知如何回應。其助手即醒目地為二人解圍，「嘉玲唔方便答啦，你哋喺記者會度先再問啦！」之後他們便急急腳嗱齊行李離開。
康城行孖咇
至於在康城逗留的數天，偉仔嘉玲大都行孖咇，每次會傳媒，嘉玲均大晒其心形鑽戒和據講有催情作用的紅手繩，又拖到偉仔實一實。至於其他私人party 和私人時間，即使偉仔和嘉玲同場，也是各自搵節目。對於兩人的相處模式，嘉玲曾說過：「佢（偉仔）欣賞我嘅獨立、堅強，鍾意靜靜睇住我同朋友喺屋企熱鬧，雖然佢唔會經常同我哋一齊玩……我鍾意熱鬧，亦欣賞佢靜嘅一面，簡直係迷戀。今日嘅佢同今日嘅我，都係大家共同建立！」似乎激情無晒，剩下的就是老夫老妻細水長流的感情。
康城時間5月18日中午時份
梁朝偉已開始為電影宣傳，於下榻的酒店露台接受記者訪問。現場所見，冇嘉玲在旁的他，在個多小時訪問過程，不時露齒而笑，之後還心情大靚，邊飲果汁邊欣賞康城風景（左圖）。
到晚上，偉仔與戴住700萬Bvlgari 鑽飾的嘉玲乘轎車到達會場，出席《東邪西毒：終極版》首映禮。下車前，兩人面無表情似乎還未準備好。
紅繩鑽戒隨身
嘉玲在康城穿著多套搶眼服飾出席活動，但都唔夠她手上的巨型心形鑽戒搶眼，此外有傳助催情的紅繩，她更是從未除低過。
康城時間5月19日10:00pm
《赤壁》在海邊舉行派對，偉仔拖嘉玲入場後，竟然撇低女友滿場飛，與楊紫瓊齊齊摸住香檳杯傾到四萬咁口，這個笑容，嘉玲在旁時，實在難見得到。
派對舉行途中，成龍忽然到場，嘉玲才有番生氣，彈起身與他傾談良久。之後嘉玲索性四圍走，與不少外籍人士攬頭攬頸。
蘇民峰：嘉玲宜喜事擋災
梁朝偉和劉嘉玲有傳今年秋天會結婚，玄學家蘇民峰亦推算出嘉玲今年宜以喜事擋災，「佢今年係暮年，長輩身體易出問題，所謂『一喜擋三災，無喜心情壞』，佢今年適宜結婚沖喜。不過從佢哋命格上，今年就冇特別姻緣運，只得同居運，但佢哋不嬲都一齊住，所以唔係特別關事。其實佢哋最大機會喺上年結婚，上年意思係去年農曆新年至今年農曆4月2日，但都過咗啦，可能佢哋已經靜靜雞簽咗紙㗎喇！」
至於二人分別在頸和手都掛上紅繩，蘇則指紅繩有保平安之用，「紅屬火，玄學角度都唔利佢哋本命，但紅繩都係拜神求番嚟，係用嚟保平安，戴到斷為止。」
康城有嘢睇
采妮食相
記者在尼斯機場等上機時，發現玉女楊采妮以蛋糕醫肚，不過食相喉擒，食到成口都係，之後仲啜手指，藝人身在外地果然冇避忌。
宋慧喬有導演錫
18日，慶功宴上，韓星宋慧喬勁high ，自隊香檳搞到失儀，見記者拍攝，還走到一角再飲，其間與王家衛言談甚歡。原本坐低的王導演忽然起身錫宋慧喬，由於記者從正面拍攝，究竟係錫面定嘴？真係當事人至知！
志玲兩個樣
林志玲出席《赤壁》宣傳，以火紅Valentino 晚裝示人。而前一天，當偉仔嘉玲行紅地氈時，記者發現冇嘢做睇熱鬧的林，以皮褸花裙長頸巾打扮（右圖），娘咗啲！
趙薇面燶
趙薇今趟搶不到鋒頭，惟有穿上Dior 長裙靜悄悄出現，面燶燶離去。
香港時間5月16日10:10pm
入到香港機場禁區，即使還未到登機時間，偉仔依然叫車載嘉玲到閘口，免得女友行得遠粗勞，果然細心。
42歲的嘉玲，最近盛傳大肚，以她在香港機場出發時的打扮，腹部疑似隆起，頸上掛上紅繩的偉仔亦陪伴在側。
今次嘉玲和偉仔在機艙各飲各的水，而02年偉仔與傳緋聞的張曼玉飛赴北京出席《英雄》宣傳，就一杯水兩份飲，事後偉仔否認。
