劉鑾雄（大劉）愛將甘比（陳凱韻），當年追訪大劉而得到寵倖，由月薪一萬元的娛樂記者搖身一變富豪助手，日日拎住十幾廿萬、不同款Hermes ，飛上枝頭變鳳凰。
跟隨大劉六年，終獲御准留後。據可靠消息指，現年廿八歲的甘比已懷胎四個月，有望為劉家添丁！
不過，為免大肚消息曝光，甘比近日出現都著上鬆身衫及平底鞋，見記者時更刻意用手袋遮掩腹部；大劉對此甚為緊張，派出七名保鑣貼身護駕，更安排甘比搬到半山梅道一號三千呎豪宅安胎。
一月證實有料
甘比追隨大劉六年，經常陪伴出席富豪飯局，出埠歎世界，得寵程度絕不遜母憑女貴的呂麗君。去年除夕，甘比身穿鬆身娃娃裙，陪大劉出席在麗嘉酒店舉行的倒數派對後，腹部微隆的她即被傳出懷孕消息，不過，翌日甘比如常穿住高踭鞋及窄身裙現身，粉碎傳聞。
直至一月，甘比證實懷孕，由於怕BB 「小器」，有喜一事對外完全封鎖，連身邊好友亦被蒙在鼓裡，而甘比則每日如常陪伴大劉到灣仔福臨門午膳。
Hermes 遮肚
紙包唔住火，記者連日在福臨門守候，發現甘比明顯發福不少，平日愛穿貼身衫的她亦改穿鬆身衫，更捨棄高踭鞋換上平底鞋，大劉亦表現緊張，即時增派保鑣護住甘比出入，由平日兩個增至七個，非常大陣仗。
即將為大劉添丁，甘比得寵指數急升。今年母親節前夕（五月十日），甘比與大劉母親一同慶祝，當日劉母先抵達福臨門，半小時後甘比在兩名保鑣護送下現身，發現有記者在場，甘比自然地用手上的Hermes 手袋遮肚，明顯唔想大肚消息曝光。
為了讓甘比舒服安胎，大劉已安排她由帝景園舊居，搬到半山梅道一號的三千呎豪宅居住。「大劉對甘比今次有咗好緊張，之前呂麗君幫佢生咗個女女，佢已經錫到燶，如果再追多個仔，加埋一對大仔大女，啱啱好湊夠兩個好字。」知情者透露。
唔敢剪頭髮
甘比懷孕四個月，大劉千叮萬囑對方事事小心，由於母親節期間甘比被十多名傳媒包圍追訪，為免碰撞發生意外，大劉即時勒令甘比留家安胎；上週開始，她再沒現身福臨門，無特別事少外出。
「佢（甘比）自己都好緊張，連頭髮都唔敢剪短住怕唔吉利，亦係唔想俾外面知佢有BB ，就算有人問佢係咪有咗，佢都騎騎笑否認，直到前兩個禮拜，先開始同朋友露口風。雖然只係得四個月，但甘比已經四圍問人邊度生好，又話好想生個仔同劉家添丁。」
事實上，甘比多年來一直希望為劉家添丁，但大劉就一直無計劃，直至正印女友呂麗君生了女兒後，大劉為公平對待甘比，才改變初衷。
母憑子貴，甘比若一索得男，便可搣甩助手身份，名正言順過其闊太生活。
後宮大比併
呂麗君跟甘比出身雖然唔同，同樣得到大劉寵倖，由普通打工仔變有錢人，有樓揸手，呂麗君自從幫大劉誕下女兒後，更要乜有乜，幸褔滿瀉。
娛記變上等人
甘比（原名：陳凱韻），現年28歲，2000年任職《蘋果日報》娛樂版記者，月薪一萬，因工作關係與大劉稔熟，02年以讀書為由辭去工作，同時與男友分手。
離開報館後，甘比即時轉投大劉旗下的廣生堂出任助理經理一職，03年更升做大劉助手，陪住大劉出席公開場合及私人活動，唔止經常拎住唔同款的Hermes 手袋，02年更突然富貴，以三百八十萬及公司名義購入跑馬地誠和閣一個單位，03年則以個人名義購入將軍澳中心價值二百多萬的單位。不過，去年她將上述兩個物業分別賣出，其中將軍澳中心物業以超過三百萬賣出，賬面獲利93萬，誠和閣則以五百八十五萬賣出。
未懷孕時，甘比除日日嗱住名牌手袋，仲例必著高踭鞋襯衫。
今年一月，甘比著娃娃裝出席麗嘉派對，即時傳她有「喜」，但其實當時仍未有「肚」。
呂麗君替大劉所生的女兒盈盈今年五歲多，大劉對她十分寵愛，曾不惜花四千萬買遊艇給她當「大玩具」。
身懷六甲，甘比廿幾度氣溫一樣纏住圍巾免「攝」親，保鑣則全力保護，免她被推撞。
