前陣子有中學生網上組團北上索K ，而近期亦有大學生在Facebook 吹雞去蒲，香港大學生有句標語，Working Hard and Playing Hard and Clubbing ……Clubbing Hard 。
如今大學生成為了香港酒吧、Disco 場的主流客，連過往酒吧燈頭（拉客）的工作，亦由古惑仔變成「大學畢業生」。
廿四歲阿Bi ，香港大學Social Science 畢業。自入讀大學開始，因為愛蒲，變成天天去蒲，到今日成為蒲精蒲友，正職文職，副業酒吧燈頭。
他的客源，八成是全港各大學的Party Animal 。六月暑期天，正是大學生放肆喪蒲的大日子，亦是他搵錢黃金檔期，現正整裝待發。
週五、六入夜的銅鑼灣登龍街，大廈外排了長長的人龍，全部是衣著火辣的男女，他們準備上酒吧勁劈勁跳，哼住Madonna 的《4minutes 》。
人群中，一個樣子老正，一副小白臉的男生，圍在一群熱褲小背心的女生中間，他是廿四歲的阿Bi 。
阿Bi 跳舞生硬、樣子正經，但在旁邊的性感女生不時向他擠眉弄眼，其中一個更嬌嗲地咬他耳仔：「幾時幫我搞個party 啫？」
受女擁戴，因為阿Bi 正是該次party 的搞手。
Double Win 兼玩兼賺
跟很多人一樣，兩年前成為酒吧party 搞手，皆因自己愛蒲。
不過阿Bi 不是那種終日愛蒲，無所事事的古惑仔，而是香港大學Social Science 畢業，現任職行政工作。
「我讀U 住Hall ，經常約埋同學Hall 友出去蒲，中環、銅鑼灣，例如Tribeca 、Sugar ，同埋銅鑼灣登龍街嗰啲較grand 場，差不多一星期去三晚。」
一次大學同學搵他幫手搞生日party ，於是便和中學同學兼老死Eric 一齊度橋搞party 。
「嗰次，氣氛好high ，我哋專登帶disco 歌自己打碟，揀啲歌由慢到快；而我就狂響場度搞氣氛，見啲人開始醉醉哋，開始natural high ，就趁機拉啲女出去跳舞，最後大家玩到癲晒，互掟蛋糕，啲女仔仲癲到除衫。之後，好多同學問我哋幾時有party ，我哋發覺原來可以寓娛樂於工作，有得玩，仲可以賺錢。」
大學生不同爛仔，喜歡閉門搞狂野私人聚會，阿Bi 和Eric 眼見有商機成為組合，二人開始合力搞party ，主攻大學生客。
「我自己做過大學生，知道大學生有Grant Loan ，又有補習，其實好有米。大學生又最多時間，最多高質素靚女，出得來玩，根本唔會問你入場費收幾多錢，最重要盡興。」
他說以大學生為對象，度橋諗計還會專針對各大學不同學系的性格特徵。
「例如港大理大學生yeah 啲high 啲，鍾意型啲諗頭，所以會搞扮嘢party ，又鍾意飲紅酒較高檔酒水；中大學生來自新界，比較純啲，鍾意個場裝修特別和玩氣氛；又例如讀工程系男多女少，我哋就會之前call 文學院女學生參加，mix 埋佢哋一齊；又例如讀文學院啲學生相對斯文怕羞，我哋就搞K party ，唔使扮鬼扮馬但一齊唱歌容易搞氣氛。」
酒吧搶住要
所謂燈頭，即是酒吧經紀，靠帶客來和搞活動賺佣，但他們又非一般燈頭，他們是freelance 式「打游擊」燈頭，即每次都往不同的酒吧或Night Club 舉行party，並不局限一、兩個場。
「我自己諗，讀U 嗰陣，我自己同啲friend 最鍾意周圍去唔同場，貪新鮮，一有新場開就去試，唔使嚟嚟去去都係嗰幾個場，好鬼悶！所以我而家做搞手，都唔會做死一個場，帶班大學生周圍去玩。」
為此，他曾和Eric 用了幾個夜晚，走遍銅鑼灣、尖沙咀二百幾間酒吧調查，逐間看裝修，逐個場和老闆social 、傾包場價錢。「其實我哋同酒吧都係互惠互利關係，行入去最緊要係同老闆打好關係，俾老闆覺得你信得過，唔會搞衰佢個場。」而有部分場地，是因為他們去慣去熟，酒吧老闆見他們來往的客人都是斯文客，又是大學生，都會主動叫他們帶朋友來開party 。
目前他主要在中環蘭桂坊，銅鑼灣登龍街等的樓上酒吧搞party ，因為裝修有水準，又鄰近市區，交通方便，是大學生最愛的蒲點，所以成為他們入選之列，現時每逢週末都可見銅鑼灣登龍街大廈門口大排長龍，大部分都是打扮入時，但斯文老正的學生哥。
「我哋去蒲都要講格調，唔會去Cyber Disco 啲MK 場，如果唔係好難吸引多啲大學生，佢呀好注重身份，個場冇格，太爛一定唔掂！」他指大學生不似
仔
妹鍾意「索K 」，反而去蒲是視為Social Function ，飲的都是紅酒威士忌Cocktail 。
「大學生讀書之餘，亦鍾意玩得，貓貓哋就癲到攬頭攬頸，我哋又會播外國歌，唔會播中文disco 歌。」
而大學生最鍾意的「有味遊戲」，亦是他們搞氣氛絕招。
「例如：用嘴傳啤牌，Happy Corner ，用嘴含蕉，總之玩吓有味遊戲，都係為咗搞好氣氛。」記者當日在場，便見到一對男女忘形濕吻。
搞了兩年多Party ，有紋有路，酒吧老闆都非常歡迎他們。在銅鑼灣有兩間酒吧的老闆Linus 不時主動找他們搞Party 。
「而家差不多間間酒吧搞『任飲』頂爛市，所以包場對於我來說，有一個穩定收入。最重要係佢哋搞party ，好多時都係大學生客，我俾個場佢哋就變得好放心，唔會搞亂場，所以我都會計平啲包場費。」老闆Linus 說。
阿Bi 指一個party 至少有八十人才有錢賺，每個人收費約二百五十至三百五十元，視乎是否假日。他們透露一般包場費連酒水約為$15,000，八十人每位三百，就淨賺九千元。高峰期每月有四個party ，他們月入便接近四萬！
Facebook 聯繫熟客
為了湊夠人數包場開Party ，阿Bi 出盡絕招儲客。
除了自己朋友外，最好的方法便是自己喪蒲識人。
「有時就算冇錢賺，有朋友搵我哋幫手搞party ，人數得十幾個，我哋都會好樂意幫手，主要原因係同人玩熟咗。通常一個拖十個，十拖百，自自然然就會好多人，而家我哋有個顧客list ，有一千六百幾個，一有party ，就廣發sms ，call 人。」
同時間，阿Bi 廣泛利用大學生喜好，吸納更多客源，例如採用每名大學生都有Account 的Facebook 。
在阿Bi 的Facebook 戶口，就有達千名聯繫網友，理大二年級學生Joanne 就留言：「上次你哋搞『反串party 』，勁high 。」
六月各大專院校暑假開始，大批大學生準備喪玩喪劈，搞party 的阿Bi 亦趁高峰期來臨前展開準備工作，剛剛星期五、六、日阿Bi 和Eric 便到尖沙咀、銅鑼灣的酒吧與老闆social 聯絡，密斟party 細節。
上週六，更約了幾名女大學索女出來酒吧吹水，在大Party 前聯絡感情。
「響我哋搞作之下，全港大學生暑假都變成Party Animal 。」阿Bi 一邊自隊，一邊豪氣起說。
每逢週五、六，大批大學生在登龍街排隊搭𨋢，準備喪飲喪玩。
大學生愛蒲，上週五，一群大學生到銅鑼灣酒吧，蒲到兩、三點，愈玩愈熱，high high 哋的一對男女更當眾互咀。
阿Bi 與Eric 所舉行的party ，每次也超過八十人，大部分是各大專院校蒲精。
Party 吸引不少穿著性感的女大學生，阿Bi 笑言「自己識的女孩質素高」。
