真面目:Neway太子失寵 法拉發窮惡無線咪精陳法拉與Neway 太子爺薛世恆（Daniel ）拍拖，早屬公開秘密。每次被撞破，法拉都只認是「同車密友」，戀情尚未正式浮面。搏盡咪精日子有功，力爭上游博一線花旦位，據知男友Daniel 卻因去年Neway 卡拉OK 裝修時「使大咗」，令薛老爺嬲爆，自此不得插手Neway 重要決定，即時打入冷宮。
男友失寵，女友法拉都唔好過，惟有發脾氣洩憤，扯火鬧幕後兼掟電話，變身惡咪精。薛世恆黐住火爆法拉，連薛媽媽都忍唔住話：「我管唔到佢！」
華姐出身、34C 上圍的陳法拉，與30歲的Neway 太子爺薛世恆（Daniel ）撻著年多，但兩人保持「地下」關係，年多以來只被本刊拍得「同車照」，而法拉亦遵守公司的拍拖禁令，從未對外承認戀情。咁識撈，難怪keep 住有劇拍。
啞女有火
正趕拍《溏心風暴之家好月圓》的法拉，雖然在正播出的新劇《金石良緣》內做邪牌，不過勢頭一樣唔弱。
再次在《溏》擔大旗做啞女的陳法拉，戲分雖比上集多，但據知法拉的脾氣亦比以往大，因廠期通告問題令自己在電視城久等而發牢騷，又試過因趕往好姊妹胡蓓蔚的婚宴，而硬要劇組將其戲分推前拍。「成日要統籌就佢，度到啲通告唔使佢等，試過有次真係度唔到，法拉響服裝間，好大聲對電話講：『係度唔到啦嘛？』然後扯火成部iPhone 掟落枱度。」據知事後連監製劉家豪從工作人員口中得知此事時都慨嘆法拉「今時唔同往日」。「家豪哥知道之後只係講咗句『唉，真係變晒喇！』」知情人說。
打入冷宮
女友氣焰勁，男友Daniel 運氣就麻麻。據知去年Daniel 將尖東Neway CEO 封場一次過重新裝修，令整整一個月冇生意白做交租，當工程接近完成時，Daniel 一句「唔滿意」，工程即時由頭開始，倒錢落海。
薛老爺見大仔Daniel 使多過搵，決定由細仔薛嘉麟（Ernie ）頂上，由年初各大春茗開始帶細仔出席見人，而Daniel 則不得插手Neway 重要決定。
「大薛（薛世恆父親）一直都唔鍾意個仔咁高調同女明星拍拖，加上Neway 使多咗好多錢，本身舊年11月話上市，盤數一直唔夠『靚仔』，到而家都未上到市。」知情者說。
「我管唔到」
法拉對住幕後脾氣猛，但上週四對住記者就寬容否認：「我點會同工作人員詐型呀，冇啲咁嘅事！」至於男友薛世恆打入冷宮，她就話：「你要問番佢喇！」
本週日（20日），薛媽媽從市值約三千萬的沙田豪宅皓朗山莊住所步出放狗時接受記者訪問。
F ：《FACE 》薛：薛媽媽
F ：薛世恆上年搞尖東同旺角兩間鋪，好似使大咗喎？
薛：（非常淡定）係咩？
F ：係咪因為咁，而家Neway 嘅工作就交晒畀細佬Ernie 處理呀？
薛：我都唔理呢啲嘅！我要理我哋自己啲公司，正所謂得閒死唔得閒病呀！
F ：係咪唔鍾意Daniel 同陳法拉拍拖呀？
薛：而家都廿一世紀啦，我哋屋企自由度好大嘅，佢哋有佢哋嘅生活，我管唔到佢啦！
但當問到薛世恆有冇帶法拉返屋企見薛媽媽時，薛媽媽則聾耳陳上身，再箭步入屋。一個使大咗打入冷宮、一個脾氣大犯眾憎，諗落又幾襯喎！
三大惡行
1.掟iPhone
於服裝間對電話內的統籌講：「今日無論如何同我調去早呀！」但當聽見唔得後即掟電話發洩。
2.嘈更表
由於法拉嫌棄每日接通告開工後，中段有太長空閒時間呆等才接同日下一個通告，故曾對統籌大發脾氣：「成日要我響度坐、響度等，唔該你哋下次編好啲呀！」
3.出喊功
為著要趕去胡蓓蔚婚宴，法拉不惜又惡又喊軟硬兼施要統籌放人話：「有錢賺嘅騷你可以唔度，但呢個一定要度畀我呀！」最終成功甩身。
谷極唔起
薛世恆的星娛樂及Neway Star 旗下藝人只有幾個，不過就算資源咁集中都捧唔紅佢哋，鄭融更愈撈愈耷，人氣直線插水。
唔爆 關淑怡
將於後日（24日）在紅館連開兩場個唱的關淑怡，雖然兩年冇開演唱會，可惜門票銷情唔多理想，只有平價飛爆滿。
跌watt 鄭融
去年3月由東亞轉投星娛樂的鄭融，近一年冇乜聲氣，唱片亦唔賣得，據知07年的《Super Girl 》銷量僅得8千，人氣同當年《紅綠燈》時簡直冇得比。
冇聲 王浩信
自05年加盟Neway Star ，王浩信一直紅唔起，代表作只有在《野蠻奶奶大戰戈師奶》中，飾演力追胡杏兒的太子爺阿Mark 。
未賺 HotCha
3人跳舞組合HotCha 雖然有一兩首hit 歌，不過仍然未成氣候，最近仲要靠拍無線劇集《尖子攻略》入屋谷人氣，人氣夠，但錢就未賺到囉！
男友薛世恆︰當年做正印女友，搵靚車出入，即使拍拖斷正被影到，依然四萬咁口。
你唔好講到我咁惡！真實對白
對於曾經又喊又鬧度期，法拉當然否認，更表示以正式途徑入紙申請。
孤清企開︰雖然同胡蓓蔚好姊妹，不過同《金石良緣》一班演員就好似唔係咁夾，出席記者會時經常做獨家村。
細佬上位︰阿哥薛世恆被老豆打咗入冷宮，而家Neway 大小事務都交由細佬Ernie 處理，就連早前英皇春茗都只得Ernie 出席，正式取代哥哥做揸fit 人。FACE周刊第48期
