4月18日，周五。內地滬深三百指數再跌3.37％，收3272.5。中石油A股終告跌破上市價16.7元，收報16.02元，最低見16元，亦拖累中石油（857）下跌，睇嚟將打擊大批紅籌股有意响今年回歸A股嘅意欲。恒生指數高開後回落，收報24197.78，下跌61.18；成交798.94億元，如扣除兩宗配股涉及百麗（1880）及中國神華（1088）共50億元上板，港股在周末前表現其實只係牛皮拉鋸，恒生指數全日高低位波幅不足300點。
家陣咁嘅市況，已唔使專家講你都知幾咁tricky，日升日降，90％專家响今年第一季都蝕本（包括我老曹在內），咁你想點？既然難玩，不妨少玩，甚至唔玩。鎖你，下周一又冇日記睇啦，因為我老曹唔响香港。年紀大咗，已無法好似從前咁每天工作十二小時，年中無休矣。
估計美國金融股今年仍須撥備，股市大部分時間只係上上落落。搵食艱難也。
通脹問題困擾四大金磚國
全球最大嘅銀行同業拆息市場——倫敦隆巴特利率（Libor）自4月15日起又再上升，三個月美元同業拆放成2.8175厘；滙豐銀行更用2.85厘吸錢，最低息嘅美國銀行亦出2.77厘。睇嚟減息周期快將完成。
花旗推介國美（493），估計今年每股獲升69仙，升33％，O二十三點四倍，目標價24元。
本周內地Ａ股出現最大一周跌幅。3月份內地CPI仍升8.3％，雖然較2月份下降0.4個百分點，但壓力仍大，政府立即宣布上調銀行存款準備金率，控制物價上漲，抑制通脹壓力。雖然中國糧食供給保持平衡，但上漲壓力仍大，因此連化肥出口稅率亦大幅提升，顯示中央政府打擊通脹嘅決心。儲蓄、生產同投資行為，必須三者平衡，經濟才能穩定增長。過去股市、房地產及黃金漲價，刺激儲蓄資金流入投資市場，令物價受刺激上升；去年12月20日中國已取消小麥、稻穀、大米、玉米、大豆嘅出口退稅，今年1月宣布上述產品嘅出口抽稅5-25％，並實行出口配額制，可惜遇上五十年難得一見嘅雪災，中國CPI今年第一季繼續急升。估計打擊通脹措施將陸續出台。
印度央行亦宣布4月26日提升存款準備金率至7.5％，然後5月10日上升到8％，因為CPI升幅已達7.14％（上兩星期更達7.41％）。通脹問題開始困擾四大金磚國。
似曾相識的思想幻覺
索羅斯警告，依家美國情況係第二次世界大戰以來最惡劣，因為美國一向依賴保持增長嘅消費業正陷入衰退。响能源危機影響下，睇嚟呢個冬季美國人可能因畀唔起取暖用油而凍死，一如近日米價狂升亦可能有中國人餓死！仲有地球污染令水位上漲，住响香港等沿海地區嘅人口遲早被浸死！從前美蘇冷戰人人擔心核子戰爭，自從冷戰結束，人類擔心嘅嘢更多，例如我太太認為日本魚生細菌多，佢丈夫（我老曹）遲早食魚生食死！至於我老曹面對咁嘅投資環境，不知應該將資金放响何處，遲早悶死！
記得1973年《信報》創辦冇耐便發生石油危機，政府宣布燈火管制，晚上十時全港街燈同時熄滅以節省能源，响彌敦道行走，一到十點全街街燈熄晒，雖然舖頭仲有燈光，但仍有一種莫名其妙嘅恐怖感。1983年港元幣值日跌，引發全港搶購廁紙及罐頭食品，我老曹响報館同採訪部同事合作搵官員出來講話希望市民冷靜，放工回家卻發現家母指揮我太太到超市做搬運大隊，全廳放滿罐頭、廁紙，結果食三個月罐頭食品仍食唔晒！1989年六四事件後，我老曹跑去溫哥華，實行第一次海外置業（亦成為唯一出現虧損嘅項目）……。今天回望，大部分只係危言聳聽。我老曹反而欣賞畢非德今年响巴郡年報嘅講話——當別人恐懼時，我地不妨大貪一D；當別人太貪時，我地便要恐懼。例如1997年7月前香港房地產、2000年3月科網股甚至2007年10月港股直通車計劃……。面對索羅斯嘅警告、羅杰斯嘅危言、石油短缺論、環保分子嘅恐嚇，對我老曹而言感覺係「似曾相識嘅思想幻覺」。居安思危係好，危言聳聽係壞！如果情況真係咁差，我地不妨大舉入市；實際情況卻非如此，而只係進入無無聊聊嘅上落市。
中國政府一下子將化肥出口稅提升到100％至135％（過去係零、30％或35％）。睇嚟中國政府為穩定內地糧價不惜犧牲化肥工業，係咪有D過猶不及？冇中國化肥出口，可能刺激其他國家糧食漲價，反過來又扯高內地糧價。有時危機係自我實現嘅！例如去年如冇港股直通車計劃，恒生指數又點會由21000點升到32000點，然後又跌番落21000點，搞到蟹民處處？呢次糧食危機，亦係由殊仔簽《生物燃料法》開始，令玉米全面漲價所引發。唔少所謂危機並非天作孽，而係人作孽，不可恕。呢次次按危機更係自作孽。
熊二容易引起抵買念頭
地震震央雖然喺美國，但最大破壞卻响中國A股市場，上述情況有如1973-74年香港。當年香港經濟正在冒起，一如今天中國，因此股市十分容易進入偏高，面對地震往往成個散晒，然後再由廢墟重建（例如1975年香港）。
技術上睇，中國A股正面對火鳳凰事件，努力四年迎奧運，卻因西藏事件而引發公關大災難。西方表面上支持西藏，其實矛頭係指向中國經濟和平崛起！再加上中國政府缺乏處理呢類事件嘅經驗，漸漸演變成公關大災難。今天中國政府應學習當年蔣介石嘅台灣精神——戒急用忍，不然中國政府愈呱呱叫，西方傳媒愈過癮，最後甚至可能引發經濟大災難。今天投資策略上亦一樣要戒急用忍。
根據Whitmore Weekly S &P Super Chart顯示，美股正處於熊市二期，相信港股亦唔例外，熊市二期股價已大幅回落（熊市一期），但經濟情況仍未太差，只係在轉壞中，好易引起抵買嘅念頭，結果愈買愈低，愈低愈買，直到可投資嘅資金用盡為止。如睇Whitmore Weekly Dow Super Chart似乎形成大型頭肩頂，依家完成右肩中，頸線喺12100點，即道指如12100點失守，代表大型頭肩頂完成，惡性拋售出現【圖】。短期大市仍安全，但不穩因素逐漸浮現。
半桶水專家浸死多過病死
3月可以捉熊腳，4月趁反彈減持，5月則應該Sell in May and walk away！有好多人批評我老曹嘅「止蝕唔止賺」理論——任何投資由最高價回落10％立即做功課，檢討自己策略上有冇出錯，一旦跌幅擴大到15％便立即止蝕離場，no question ask！
請記住250天線唔係牛熊分界線，响升市中跌穿250天線叫牛反彈（Bull Spring），升幅強而有力；喺跌市中跌穿250天線叫熊反彈（Bear Spring），一樣有回升，但升幅乏力。50天線跌穿250天線叫死亡交叉點，代表確認熊市，通常有吻別行為，即大市重返250天線附近（或升穿），不過此乃告別升市嘅儀式，而非牛市重臨。我老曹唔敢話自己係移動平均線組合權威，不過移動平均數理論1973年7月我老曹由美國引入，喺《信報》發表，响呢方面有三十五年經驗！食嘢食味道，學嘢學全套，半桶水專家浸死多過病死。走勢最大缺點就係易學難精，睇三本書便以為自己曉走勢者，必被走勢害死。如各位有興趣學走勢，不妨睇吓Technical Analysis And Stock Market Profits（作者Richard Schabacker），比較上易學一D。
如果您喜歡這篇文章，請按「讚」或分享給您的朋友，以示鼓勵。
