娛頭:楊恭如補習天王同居 正印女友上樓踢竇有上海首富之稱的周正毅04年落難後，傳因介入對方與毛玉萍之間，而遭掌摑的楊恭如富貴不再，被迫大屋搬細屋，返內地狂拍劇賺錢養家。
雖然無大水喉射住，但楊恭如感情生活一樣多姿多采，在大陸拍劇《浴火鳳凰》時搭上對手黃少祺，今年初又與年薪過百萬的補習天王簡俊傑（Ken Kan ）撻著，並過著半同居生活。
34歲心急搵人嫁的楊恭如，一改作風，為配合31歲坐巴士搭地鐵的男友，由天降地，由舊山頂道豪宅屈去元朗住平價樓；勢估唔到，Ken Kan 竟一腳踏兩船，正印女友更上樓踢竇，楊恭如繼續「二奶」命運。
今年農曆年，楊恭如出席團拜認識Ken Kan ，同屬亞姐的好友黎淑賢亦有出席，Ken Kan （黃圈）坐在一邊飲酒，當時二人已經互相有好感。
3月30日凌晨
Ken Kan 同恭如戀情被踢爆，所以當晚就被正印女友在路邊興師問罪，嘈足兩粒鐘，男方仲一走了之，留低女友在大廈門口狂打電話尋人兼冒雨呆等，絕對冇情講。
紆尊降貴
今年農曆年，楊恭如出席伍詠薇胞兄Richard 投資的補習學校「遵理」團拜，因而認識Ken Kan ，二人火速搭上。
「Ken Kan 高大，又幾有型，恭如第一次見到佢巳經好有好感，加上成班朋友響身邊推波助瀾，所以兩個好快就行埋。」知情者說。
Ken Kan 一個人住在元朗蝶翠峰數百呎單位，楊恭如為要箍住男友，有錢唔賺不斷推劇，個多月來都留在香港。昔日有富貴男友照住，住在月租二十多萬豪宅，有司機接載出入的她更紆尊降貴，唔再名牌上身刻意打扮樸素，甚至降格入住男友元朗住所，等對方買餸回家齊齊玩煮飯仔，由金絲雀變身普通住家菜。
「恭如今次好認真，覺得Ken Kan 係結婚對象，為咗同男友拉近距離，佢連貴啲嘅珠寶首飾都收埋唔戴，費事對方以為佢好大使。其實恭如變咗好多，Ken Kan 雖然有架保時捷，但好少揸，不過恭如根本就唔介意。」知情者說。
一腳踏兩船
雖然楊恭如嚟真，不過向來受女性歡迎，有補習界鄭伊健之稱的Ken Kan 仲未修心，瞞住楊恭如一腳踏兩船。上週五（三月二十八日）二人戀情被踢爆後，身為好朋友的June （另一補習天王）在其個人網誌內，祝福這對「情侶」，大讚二人是天造地設的一對。
上門踢竇
不過Ken Kan 的正印女友知道第三者楊恭如介入，甚至鵲巢鳩佔入住男友家，即時發難，要Ken Kan 作出抉擇。
本週日（三月三十日），正印女友踩場到元朗寓所攤牌，因為恭如在屋內，Ken Kan 即時拉正印女友落樓下講數。凌晨兩點，一臉嬲爆的Ken Kan 怒氣沖沖落到街，期間未有理會緊隨在身後的正印女友，他逕自走到對面街，企埋一邊不發一言，反而女方一味撩Ken Kan 說話。
講講下，二人忍唔住在街上鬧大交。十分鐘後，一直意圖撇甩正印女友的Ken Kan ，忽然一支箭跑入附近一帶村屋，女方雖然跟住走，但對方愈跑愈快，最後唔見
影。正印女友唔死心，再折返大廈，在門口邊等邊打電話，一直等到凌晨四點，Ken Kan 依然未返屋企，痴情女友唯有放棄，一個人搭的士離開。
「Ken Kan 一直都有個女朋友，不過兩個人成日嗌分手，同恭如拍拖，佢都冇諗過要即刻斬纜，諗住遲啲先算，不過被報紙踢爆咗，個女仔咪即刻同佢攤牌，其實對方仲係好鍾意佢（Ken Kan ），唔想分開，依家都唔知點收科。」知情者說。
留學法國、年薪過百萬的Ken Kan ，生活簡樸，平日不用上堂（教書），多數約朋友做運動Happy Hour ，甚至會到超級巿場買大量蔬菜回家自己煮飯，十分住家型。
曾經做過健身及壁球教練的Ken Kan 擁有保時捷跑車，但他經常坐地鐵搭巴士，到荃灣、屯門、上水等補習社返學。
「Ken Kan 好慳家，淨係食個麵包飲杯奶就當一餐，所以儲埋唔少錢，而佢住緊嗰層樓雖然唔係豪宅，但都係自己物業，加上每個月有十幾萬收入，絕對養得起恭如。」Ken Kan 身邊友人透露。
至於楊恭如雖然刻意低調處理新戀情，不過依然搵契媽林建明代言，默認同Ken Kan 拍拖。
不過當記者致電楊恭如，問及Ken Kan 跟正印女友吵大鑊一事，她以唔得閒為理由，即刻收線。
千萬身家
年薪過百萬的Ken Kan ，與家人所開的「宇信有限公司」，集中投資元朗房地產及商鋪。家人居於96年以330萬買入的西頭圍村屋，他就獨居於05年以239萬買入的蝶翠峰。
天王大起底
今年三十一歲，身高六呎的簡俊傑（Ken Kan ），曾經當旅遊團帶隊、健身教練、壁球教練，以及在政府統計署打工，01年加入遵理學校做英文教師，有「補習界鄭伊健」之稱，在香港大學畢業主修英語，曾赴法國巴黎天主教大學留學進修法文，以及在加拿大及英國遊學。Ken Kan 為家中大仔，家有父母及妹妹Karen 。
宿命難違
貴為「最靚亞姐」的楊恭如，95年「坐正」選美后座，但感情上就一直企歪，頻頻做第三者，即使紆尊降貴，同唔係富豪又唔係圈中人，只係補習老師嘅Ken Kan 一齊，對方都有正印女友，整定。
恭如已屆34歲，恨嫁恨到出面，諗住同Ken Kan 拍拖可以收山嫁人，點知對方又一腳踏兩船！
楊子
去年，楊子趁女友黃聖依在香港拍攝《出水芙蓉》時，竟然飛返上海密會楊恭如而傳緋聞。
周正毅
02年，被拍到夜會上海首富周正毅，楊恭如未幾遭人掌摑，去年楊恭如接受《南都周刊》訪問時，承認曾當第三者。
王傑
00年，王傑與霍汶希拍拖期間，楊恭如擔任男方音樂特輯做嘉賓，她竟主動示愛，最終打動王傑。
古天樂
99年楊恭如與古天樂拍攝電影《新家法》時被傳搭上，被指介入男方與黃紀瑩之間。
楊恭如跟Ken Kan 拍拖個多月，即有意結婚，更推劇有錢唔賺，紆尊降貴住在男友數百呎單位，女人要變，真係冇人估到。
