界孖女神Janice Man （文詠珊）同Angelababy （楊穎）憑住神奇化妝技巧，近半年愈撈愈掂，由model 變藝人，齊齊殺入電影界，成為娛圈最新潛力股。
不過Janice 未爆紅先要付代價，據知Janice 因為貪靚長時間戴大眼仔（有色隱形眼鏡），搞到右眼眼角膜受損發炎，更因為工作壓力大而背脊心口狂出紅瘡，唔睇醫生隨時變盲妹。
上週六Janice 果然除去招牌大眼仔，女神更稱：「我咁近都睇唔清楚你（記者）！」其實Janice 19歲女大把世界，大吉利是變盲妹點算？單眼女神斷估好難有市場，到時要轉賣涼茶就唔好啦！
Janice 19歲青春無敵，可惜自稱有身高5呎6嘅佢都好謙咁話自己輸蝕身材：「我都知自己好難做天橋model 啦，所以想試吓拍多啲戲，試吓多線發展囉！」
自14歲入行做model 開始，短短5年Janice 已經由硬照model 變成廣告寵兒兼做電影女主角，靠有色隱形眼鏡變精靈假大眼更是她煞食本錢。
不過針冇兩頭利，大眼仔秘技幫佢變害佢，據Janice Man 好友透露，Janice 為咗變靚啲長時間戴大眼仔，導致右眼眼角膜發炎：「Janice 一向好貪靚，平時開工一定要戴大眼仔隱形眼鏡，最慘一開工就十幾廿個鐘，咁戴法好傷眼，其實個幾月前已經出問題，不過成日要做嘢上鏡想靚啲所以死頂啫！」
令除假眼
據知自從得知眼角膜發炎後，Janice Man 即時去專科醫生求醫，醫生更下令Janice 即時停止戴con.，更稱如堅持戴大眼仔會令情況變差，後果似乎十分嚴重。
就算眼角膜受損，Janice 仍然要繼續畀化妝師化眼妝，成支眼線筆篤篤吓，睇見都戥佢擔心。
我咁近都睇唔清楚你（記者）！（一呎距離）
上週六Janice 出席太古城宣傳活動時，跟本刊記者相距唔夠一呎都話睇唔清楚記者個樣，如果冇誇大，情況睇嚟幾嚴重。
每次Janice 出場例必引來大班攝記圍影，難怪Janice 話：「近排成日圍住影都搞到我好唔舒服，睇嘢成日有
影！」
大眼仔易生細菌
Janice 因為貪靚戴大眼仔搞到眼角膜受損，香港眼科學院院士關永光醫生表示，大眼仔其實唔適合長期佩帶：「因為大眼仔得兩個弧度，未必個個適合，如果眼角膜受損就要立即停止，因為呢類大眼仔透氣度較低，細菌好易滋生，情況嚴重可能好番睇嘢都會有影，最壞情況係可能會盲添！」
之前日日戴大眼仔扮精靈嘅Janice ，上週六就被迫除咗至愛，而且備受壓力困擾嘅Janice 仲瘦到鎖骨暴現兼心口爆瘡，Janice 說：「我瘦咗好多，自己都唔敢磅！以前都有100磅，我估而家得番95咋。」
爆瘡瘡
除咗暴瘦，Janice 心口位置仲狂爆瘡，Janice 真係要跟緊啲，唔係變爛肉女神就大件事！
醫生建議：最緊要休息
Janice 大壓力搞到心口生粒粒，皮膚科專科史泰祖醫生則表示情況未算太嚴重：「對於女性來說，長期睡眠不足、壓力太大、經期前等，都會容易令身體出現暗瘡，亦常見於心口或背脊等位置，處理不當最多只是留下暗瘡印。預防方法盡量有充足休息，保持心境開朗，少吃煎炸食物都會有幫助嘅！」
上週六Janice Man 出席化妝品活動時果然少有地脫去大眼仔，平時精靈雙眼即時冇晒神，而除咗眼角膜受損右眼睇嘢矇查查外，攰樣Janice 更愈嚟愈瘦，而且心口生滿紅瘡，跟以往皮光肉滑兩回事。
黑超護眼
上週六下晝5點幾仲天陰陰，Janice Man 出席完活動後少有戴大黑超，啱嘅，等對眼休息吓，兼唔好俾啲狗仔隊閃親。
拖實親戚
上週五（29日）晚，Janice 孭住價值$29,400的Chanel 2.55手袋與親友食飯，期間小朋友親戚照顧周到做靚姐姐盲公竹，不過Janice 食飯前都走去信和中心shopping ，女仔係貪靚啲。
滿意硬sell
飯局上，Janice Man 主動嗱出自己嘅海報與親友高談闊論，親友面前都力sell 自己，睇嚟好enjoy 份工！
抄足索模Devon
網上有網友大彈Janice Man 造型high fashion ，全靠由頭到腳都抄足日美混血索模Devon Aoki 青木迪芳（下圖），由於Devon 只有5呎5吋身高，一樣做到top model ，難怪身高5呎6的Janice 亦以佢為學習對象，其實好多明星都話抄人啦，N 年前夠話王菲抄Bjork 啦，咪一樣咁多人buy ，最緊要抄得good 啫。
同baby 睇齊
素有模界Twins 的Janice 同Angelababy 好姊妹形象通街知，不過自從兩人近日分別叉隻腳入娛樂圈後，加上所屬經理人公司又傳出唔係好妥，雖傳兩人因為形象近似而爭job ，好姊妹不再，但據Janice 好友透露，Janice 雖然好在意自己工作量，卻沒有視Angelababy 為假想敵，「Janice 同Angelababy 真係好friend ，外面傳佢哋不和都好假啫！不過Janice 覺得自己工作量唔應該差得過baby ，加上佢好在意工作時表現，愈諗得多壓力就愈大，有時啲friend 見佢瘦咗咁多都好擔心佢㗎！」
冇嘢做煩、有嘢做卻令Janice 更加抖唔到氣，Janice Man 將會同Stephy （鄧麗欣）合作拍新戲《內衣少女》，於《內》片中要拍住第一代
界女神Stephy 已經頭痕，更大壓力是Janice 會同Stephy 在戲中有多個穿內衣鏡頭，難怪佢唔敢鬆懈進入備戰狀態，Janice ：「新戲會好性感，好驚拍到自己好肥，所以要努力keep fit ！」
Janice 踢爆Baby 《梁祝》被飛
雖然Janice 同Angelababy 成日孖必出騷，model 界上打成平手，不過電影方面Janice Man 明顯放甩成條街！最慘係Janice 唔覺意爆響口話原先諗住踢走阿嬌拍《武俠梁祝》嘅Baby 臨時脫腳，Baby 真係加多兩錢肉緊穩陣！
愈拍愈有
繼電影《十分愛》同《愛鬥大》後，Janice 又有機會拍葉念琛執導的《內衣少女》，同Stephy 做對手，爭奪
界女神地位。
《愛鬥大》中，由玉女江若琳夥拍Janice 擔演，小本經營票房超過600萬，刀仔鋸大樹成功，難怪Janice 咁雄心壯志。
拍戲失蹄
原先有份孭正飛拍住吳尊合拍《武俠梁祝》的Angelababy ，忽然又被阿Sa 搶走淪為第二女角，幸好Baby 睇得開話：「冇所謂啦！」而家連第二女角都冇埋，慘喎。
彭浩翔執導嘅《破事兒》演員卡士強勁，阿嬌、Juno 同Edison 都有份，可惜最後只收349萬，雖然Baby （右一）只係客串，不過處女出師不利真係砸使嘅！
踢爆姊妹
20歲女未夠已經五勞七傷，又眼角膜發炎兼生紅瘡，最驚嚇係上週六（29日）本刊記者跟Janice 相距一呎兜口兜面做訪問，她竟然話：「我咁近都睇唔清楚你（記者）！」
F ：《FACE 》 J ：Janice Man
F ：聽講你眼角膜受損幾嚴重喎？
J ：係呀，我之前又痛又痕，又成隻右眼腫晒，醫生話我眼角膜發炎，所以我暫時唔戴得con.，不過隻右眼睇嘢仲係有啲影，而家我咁近都睇唔清楚你（記者）！醫生話最主要係因為我唔夠休息，加上做嘢成日有好多閃燈閃到隻眼好辛苦。
F ：見你心口生咗好多紅瘡喎！
J ：係啦，我心口同背脊都有，我中醫西醫都睇過，醫生話我因為壓力所以咪生粒粒，因為工作太忙，又拍戲又拍廣告，好唔夠訓，所以先會咁！
F ：咁你唔請假休息吓？
J ：唉！我都想，其實我同公司（種星堂）講過，不過一直都放唔到，咁耐都係我睇眼科醫生嗰日放得一日假咋！
F ：近排Baby 同吳尊拍新戲《武俠梁祝》電影，你有冇同佢傾呀！
J ：係咩？不過聽佢講，佢好似冇得拍喎，其實我都有套新戲傾緊，我都想拍多啲戲呀，上次拍《愛鬥大》拍到上晒癮！
鍾意拍戲冇問題，不過唔小心踢爆好姊妹被飛就唔係咁好啦，人哋電影公司都未公布Baby 冇得撈，有時坦白得滯，是非咪咁傳出嚟囉！
Janice Man 同佢位李姓男友拍拖多年冇收埋，Janice 更經常出入男友位於荃灣朗逸峰住所（右圖）。
大眼仔有市
大眼仔隱形眼鏡一向係女孩恩物，㗎妹愛不釋手，過氣天后濱崎步係代表，連近期殘爆嘅Leah Dizon 亦有用大眼仔冧客！而本地亦有唔少女星捧場客，總之有大眼仔，扮索冇難度！不過各位姊妹用大眼仔時確實要小心呀！
見痛即除
江若琳都算係大眼妹先驅，她說：「我都未試過出問題，不過之前醫生都同我講過一痛就要除，所以盡量都唔會戴超過8個鐘！」
大眼轉運見
餅碎拆夥後的傅穎星運未有起色，不過最近走性感扮日本少女，加上大眼仔推波，事業一帆風順，有力挑戰金牌一姐Stephy 地位！
靠con.撐住
Leah Dizon 一向係大眼仔擁躉，平時日本戴唔出奇，連早前4日的香港之旅都戴實唔放，不過講真好在有對大眼仔撐一撐，如果唔係Dizon 個樣應該仲大件事。
坦白fans 嗒
Janice Man 愈撈愈有，最令電車fans 嗒糖其實係佢率直坦白性格，就算俾傳媒影到同男友拍拖返屋企都毫無避忌，最正係女神一啲唔遙遠，每次出現必定企定畀電車fans 影餐飽，冇黑面冇詐型，nice 女神俘虜電車仔確係有計㗎！
貴為當紅女神，Janice 一見fans 即時上前打招呼兼主動合照狂影冇say no 。
黃小姐23歲化妝師
都幾鍾意佢，睇佢皮膚都幾滑㗎，我喺雜誌上都知佢拍拖，不過冇所謂喎，咁先夠真，唔似其他藝人咁，拍緊拖又話自己單身。
邱先生18歲學生
我好鍾意佢呀，佢嘅笑容好靚，又有model 嘅身材，一早知佢拍拖啦，我覺得喺呢個時代，冇乜所謂啦，唔會因為咁樣冇job 喎，佢仲靚過Angelababy ，夠晒成熟。
去年
