莫文蔚闖荷里活做畢佬師妹

莫文蔚闖荷里活做畢佬師妹
2008-03-29
【東方日報專訊】莫文蔚（Karen）雖然愛情失意，但事業卻如日中天，最近更獲大型荷里活經理人公司CAA招攬旗下，與國際巨星畢彼特（畢佬）、茱莉亞羅拔絲等同門，連美國權威雜誌《HOLLYWOOD REPORTER》也形容Karen為亞洲最成功女演員之一，認真厲害！

Karen早前雖與馮德倫甩拖，但事業卻有極佳發展，最近剛約滿舊經理人公司的她，即獲荷里活大型經理人公司CAA羅致旗下，據美國電影雜誌《HOLLYWOOD REPORTER》指出，Karen已簽荷里活數一數二之大型經理人公司，旗下更有近半百名荷里活紅星，包括佐治古尼、Beyonce、碧咸等，該雜誌更以亞洲最成功女演員之一來形容Karen。據知，CAA於兩年前已派專人來港跟Karen傾合約，但當時Karen因與舊公司還有兩年合約，故婉拒了對方，想不到CAA竟於兩年後再派人跟Karen傾談，雙方一拍即合，Karen為報答對方的誠意，直言今年會放低感情，全力進軍荷里活！

籌拍新片演長跑選手

至於CAA欣賞Karen哪一方面？Karen鬼馬地笑言：「太多，講唔晒喎！」不過據知CAA對Karen於電影、舞台以及音樂方面之優秀成績甚表欣賞，而她亦熟悉多國語言，絕對有助作多元化發展。

近日，Karen接廣告接到手軟，她笑言沒有簽錯公司：「想同邊個荷里活影星合作？我會爭取跟唔同實力同分量嘅演員合作，亦會籌備一部有關長跑選手嘅電影，仲會兼任演員同監製，係一個新嘗試。我細個玩過越野賽，爸爸亦係中長跑總冠軍，所以對長跑有啲認識，希望能夠傳遞鼓勵嘅訊息，最想搵陸川做導演。（搵現役選手做演員？）要等導演決定，做資料搜集寫劇本嗰陣已經搵咗啲曾經參加過奧運嘅金牌選手做訪問，（男主角定咗未？）暫時未有心水，但一定要惡配合角色所需！依家最頭痛反而係選景，因為要就番個劇本，季節好重要。」除了籌備新片，Karen還將會演出由《美麗拳王》導演執導的電影《棺材》。

童心拍照法文冧高層

另外，Karen昨日於上海出席「Salvatore Ferragamo ——不朽的傳奇1928-2008」回顧展之開幕儀式，語言天分甚高的她，以法文跟品牌第三代傳人James Ferragamo言談甚歡，並獲對方熱情招待陪看展覽。童心未泯的Karen又以私家相機為一個私伙白臉紅頭髮的公仔拍照，不過Karen未有交代公仔的「身世」與「私照」何用。

Salvatore Ferragamo為慶祝品牌成立八十周年，特別選於上海舉行一連兩日之盛大慶典，花費逾千萬港元，十五位Ferragamo家族成員亦親臨支持，而壓軸節目則是昨晚於黃浦江舉行之2008男女秋冬時裝騷及晚會，出席嘉賓包括Karen、周迅、胡軍、陳坤、梁詠琪、渡邊杏等，場面熱鬧。