2月28日，周四。恒生指數升107.85，收24591.69；成交823.89億元。2月期指升151點，收25441點；3月期指升182點，收24510點，仍係低水兼倒掛。
今天新地（016）升2.3％，見142元；新世界發展（017）升1.9％，見21.65元；嘉里建設（683）升3.6％，見53.4元；九倉（004）升2.5％，見41.75元；ASM太平洋（522）升3.3％，見54.85元；但華聯國際（969）跌13％，見0.9元，該公司宣布收購非洲蔗糖業務，代價12.8億元。
滬深三百指數跌0.38％。平安保險跌2.6％；美的電器跌7.3％，因宣布以16.8億元收購小天鵝24％；五糧液跌4.2％。不過，第六大煤炭生產商開灤升1％，報39.41元人民幣。
預算案刺激經濟防放緩
本港企業2008╱09年度獲減稅1％（高級打工仔入息稅率亦減1％）。未來一年政府開支上升31.7％，將令2008╱09年度出現75億元財赤（或0.4％GDP）。如真係出現，將係近四年內首次，令政府開支由佔GDP 15.9％上升至19.2％。換言之，呢個係刺激經濟預算案，包括：一、減稅；二、增強基建投資；三、取消酒店房間銷售稅，以加強本港旅遊業競爭力，對抗澳門酒店業搶客。上述種種措施目的係對抗香港經濟放緩（GDP由2007年增長6.3％下降至2008年僅4.5％）。如再計入負利率影響，今年本港經濟維持繁榮應冇問題。呢次係港府首次用預算案去對付可能出現經濟放緩期。增加土地供應雖然遠水救不了近火，但可起望梅止渴作用，令本港樓價升幅被cap（上限受限制）！
花旗推介電盈（008），估計去年每股獲利25仙，上升35.9％，O十七點七倍；今年每股獲利24仙，減少3.3％，O十八點四倍；估計最惡劣情況已結束。
1月22日至今恒指反彈，到底係跌市已過去抑或係跌市「中途島」？公司公布去年下半年業績相信十分理想，但我地應知道股價係走業績之前而唔係之後；今年上半年業績同去年下半年比較又點？如從呢個角度睇，恒指現水平平均O只係合理水平，未致於到達有吸引力水平，股市只能維持牛皮，難有大升市。技術上睇，反彈市由A、B、C組成，至今C浪未完成，相信可去到3月18日宣布減息前後，反彈浪才算完成。 能源股同金礦股近期技術表現不俗，但整體股市而言技術表現仍欠佳，長線投資者需更多訊號出現，才可相信最惡劣日子已成過去，例如考驗1月22日支持，不然1月22日至今只係熊市反彈，可玩可唔玩（因大方向仍向下，依家只係小陽春）。平心靜氣睇呢個三角形走勢點演繹罷啦！呢次升市，上升股份並唔多（好多二線股跟唔上），升市集中少數股份身上；加上裂口下跌位26000點至今仍未完成補回。
美股八年下跌三分二
再睇基本因素，去年11月至今冇太大變化，美國樓市仍在惡化，聯儲局繼續減息，美元價再跌，通脹前景進一步惡化，長期債券開始回落（即短息下降、長息上升）。股市出現反彈，理由係到1月22日跌幅有D過分及過速，出現技術調整（三個月跌市通常可支持一個月至個半月反彈市）。恒指C浪應略高於1月25日高點25243點才完成整個反彈，投資策略係短期睇好、長期睇淡。美國信貸在收緊中、美國資產在跌價中、CPI在上升中、滯脹在進行中。香港好D，因信貸冇收緊，仍可支持本港樓價上升，估計高潮今年6月。3月18日美國再減息後，美國仲有減多一次或以上條件，美指數跌至74.226新低，開始局限聯儲局減息能力。
如用金價劃道指走勢，可見到美股2000年見頂，目前跌幅接近三分二，已係大熊市【圖】。美國聯儲局較日本央行聰明，就係利用貨幣政策掩飾美股大熊市。以美元計，美股同2000年初差唔多，如把美元購買力下跌及價下跌因素反映，今天美股價值只及2000年三分一，已經係大熊市。如各位冇2000年棄股從金，已損失不菲。
2月27日紐約期交所NYBOTDXY美指數跌至74.226，創出1973年該指數設立以來最低，美元雄霸全球時代進入終結篇，走向多元時代。美國1月份生產物價指數（PPI）升1％，即年率7.4％，創1981年以來最大升幅。美國2月份商會消費信心指數為75，係2003年伊拉克戰爭以來十五年內第二差一次。雷曼兄弟Ethan Harris估計，美國GDP今、明兩年升幅只有1.1％和0.9％。
渣打銀行外分析師David Mann估計，歐羅快見1.52美元，法興銀行、德意志銀行估計可見1.55美元；但瑞銀Sophia Hardy認為，一個月後歐羅見1.47美元．係少數睇淡歐羅者。
面對美元大貶值，中國又點樣應付？弱勢美元及美國持續減息，令資金大量湧入中國，推動人民幣升值，削弱中國產品市場競爭力，瓦解中國經濟和平崛起力量（1987年廣場會議G7各國曾聯手對付日圓，令日本經濟出現兩年狂升然後暴跌）。中國如何應付？中國手上1.53萬億美元外儲備，五年間已貶值50％，成為美元貶值下最大犧牲國。面對美元攻勢，人行加息、人民幣升值及提升存款保證金率策略完全冇發生作用。物價上升、樓價狂升、股市狂升……。中國面對同八十年代日本相似環境，垃圾美元攻勢下，中國招架乏力，所謂阻止美元流入防線形同虛設。依家人民幣一年期存款4.14厘，加上人民幣今年升值10％，回報率達14.14％，今時今日世界去邊度搵？美元成本只係3厘，利用槓桿放大十倍，一年便可獲利111.4％，然後飽食遠颺，留下爛攤子畀中國政府，點頂？
家外商企業出口額佔中國總出口額60％，一旦人民幣大幅升值，將令產品失去出口競爭力，必引發外資大撤退。而中國所享受外貿盈餘可以好快消失，情況較日本更嚴重（日本出口企業由日本人控制）。人行面對強大聯儲局，根本上強弱懸殊，唔知點樣應付。
若你相信decoupling，我老曹卻相信環球化（globalization），各國之間只有滯後效應及影響程度深淺分別。1990年日本經濟衰退唔影響別國，係因為日本唔係各國產品出口最後目的地；1997年8月亞洲金融風暴唔影響美國，情況亦一樣。反觀2000年美國科網股泡沫爆破，立即影響別國；呢次美國房地產泡沫爆破，擔心影響更深遠。
減息有冇用？上一次由2001年1月起減息，到2002年10月美股才止跌回升，減息到2003年6月1厘才停止，並停留1厘直到2004年6月。呢次可以咩？石油、食物價格急升環境下，聯儲局唔可能再減息到1厘（估計2厘已係極限），因CPI加速上升。
周二美國聯邦存款保險公司宣布，去年美國銀行界共撥備682億美元。去年第四季美國金融業純利下跌83.5％，至58億美元，係近十年內最差一季，估計今年情況可能較去年更差，因為去年底有問題銀行較2006年底五十間更多，已增至七十六間（美國共有八千五百多間銀行）。
全球政治思想左傾
雖然兩大債保公司保住三A評級，令美股連升三天，但惡劣情況仍未過去。美國人有三大資產：一、佢地間屋，自2006年8月起開始跌價。二、金融資產，由去年11月起開始跌價。三、賺錢能力。今年1月起美國失業率開始上升，相信美國人未來加薪幅度亦有限。今年美國總統大選，將面對新一代選民（即七十年代才出生一代漸成大多數，佢地眼見八十年代列根總統優惠有錢人政策漸漸令社會走向貧富兩極化，卻唔知道六十年代由甘迪總統引發福利社會思想，令六十年代至七十年代美國經濟不前。呢次大選，美國政治風向出現大「左」轉）。
2008年美國人已開始動用「401K」去維持生活水平（401K原先計劃係作為退休後生活費），即過去投入股市、債市資金開始被用作部分日常生活費。奧巴馬競選口號係「改變」，擔心明年起美國改變，係八十年代開始刺激投資政策變成照顧窮人政策，令美國經濟再次進入呆滯不前期。全球政治一向左搖右擺，美國戰後經濟繁榮，引發1965至80年福利主義；社會福利增加，令GDP增長率不前，又引發列根總統刺激經濟政策。二十多年經濟繁榮，令年輕一代又再追求福利主義。一如中國胡錦濤和諧社會主張。睇全球政治思想又再向左傾斜。
反觀香港財政預算案未能就社會貧富不均現象對症下藥。1966年港人曾示威反對天星小輪加價，觸發1967年暴動，背後成因其實係貧富懸殊。港督麥理浩上任後一連串施政，如十年建屋計劃、十年教育計劃、十年醫療計劃，都係福利主義。到1982年香港主權談判引發資金外流，香港政府發展又再以刺激經濟為主（例如取消利息稅、限制土地供應、興建新機場等）。到2008年，香港社會貧富兩極化嚴重，但呢次預算案未能即時反應社會新方向……。世事無絕對，創造財富同分配財富係人類有史以來爭不休話題。美國政策因選民意見改變而左搖右擺（唔左搖右擺先至唔正常）。中國政府體恤民情，亦由「小部分人富起來」改為「和諧社會」。2008年香港預算案並冇向中下層社會傾斜，有D令人失望。呢次只係「派餅仔」預算案，唔係有「遠見」預算案。
本港2007╱08年度財政盈餘1160億元，主要來自股票印花稅及賣地成績良好。前者2008╱09年度會否重複？至於後者因土地供應上升，賣地成績應可維持甚至上升。因此2008╱09年度出現財赤機會應該唔大。
香港通脹有外在因素與內地因素。香港失業率依家只有3.4％，工資及租金上升壓力，成為推高香港CPI內在因素；聯制度令港元價疲弱及利率下降，則係外在因素。估計香港明年CPI見5-6％，即負利率情況進一步惡化。另一方面，去年第四季起港股回落，卻有助減少內在壓力。同係負利率，2008年唔係九十年代翻版，今天全港31％家庭已唔使供樓、約25％家庭仍在供樓，因利率下降而受惠。全港只有13％家庭仲係租樓，其餘居住公屋或居屋，即全港只有13％家庭仍有買樓欲望，較九十年代大幅減少。九十年代香港仍處薪金大幅上升期（企業每年加薪幅度達雙位數），2008年香港早已進入20╱80年時代，貧富之間差距愈來愈大。
換言之，推動呢次樓價上升力量有：一、去年9月至今年4月減息潮。二、去年9月同10月股市急升所引發財富效應（唔少人投資股票賺蚊年轉投物業）。三、港元貶值潮。如港股未能重返牛市，估計呢次香港住宅樓上升潮今年上半年結束。
今年結束英國買樓收租日子
美國廉價資金時代已過去（上述唔係指利率，而係寬鬆信貸環境）。呢次如果唔係舊年8月聯儲局及各國央行大量注資及減息，恐怕今年第一季美國經濟已出現衰退。有聯儲局注資、減息及殊仔刺激經濟方案，結果又點？有人認為只能令美國經濟踉踉蹌蹌地走向衰退，亦有人認為可形成一個「W」形底部，令今年第三季及第四季GDP升幅多番D；減息及刺激經濟方案效力明年上半年消失，GDP增長率又再回落，要到明年下半年才重返經濟復甦期。經過三年調整期（2006年7月至09年上半年），美國樓價亦應該完成自我調整。上述兩大說法都有一定說服力，但明年下半年誰去Jump Start美國經濟？另一令人擔心問題係，今年美國經濟放緩，到明年勢必影響英國、歐洲甚至全世界。歐羅估計今年6月、9月及12月都減息，年底見3.25厘；仲有中國同印度過去一直依賴出口帶動經濟增長，能否從美國及歐洲經濟中劃分出來，明年GDP出口增長率放緩環境下仍保持高增長，反過來帶動美國經濟？至於日本，自1990年起一直企圖利用內需取代出口帶動經濟增長，但至今未能成功。
全球大部分國家房地產「Buy-to-Let」時代漸過去，今年我老曹致力出售倫敦最後一個住宅單位，結束自己買樓收租日子。資源股方面，加拿大TSX礦務股指數過去五年上升500％，未來礦務股上升空間有幾多？上一次美國物價穩定期係1945年戰後到1966年，共二十一年；然後升至1980年，共十四年。呢次物價穩定期由1980至2000年，亦係二十一年；物價上升期至今八年，如睇OECD國家有機會今年見頂，但新興工業國如中國及印度似乎仍有幾年玩。
中國自1978年改革開放政策落實後，GDP每連續五年高增長後，總有兩、三年放緩；2007年中國又一次完成連續五年GDP高增長，2008及2009年GDP增長進入放緩期。
日本又點？1990年起已好少外資肯直接投資（FDI）日本，只有少量外資流到日本炒股票或房地產；反之，日本資金卻長期外流，成為全球最大資金供應國（進行利差交易）。日本1月份工業生產跌幅2%，較分析員估計大（分析員事前估計只有0.8％），證明美國經濟放緩，日本貨首當其衝。日本出口放緩、工資停滯不前，加上日圓升值，令2月份前景更唔明朗，估計2月份工業生產進一步下跌2.9％。1月份日本對美國出口減少五分一，睇美國人漸漸感覺日本貨太貴，依家有賴亞洲、歐洲、俄羅斯、中東等國家支持，再唔係美國。
如果您喜歡這篇文章，請按「讚」或分享給您的朋友，以示鼓勵。
