疑似藝人「淫照」連日來不斷流出後，捲入事件中的張栢芝跟謝霆鋒婚姻關係亮紅燈。新抱出事，有傳狄波拉大興問罪之師，煩到栢芝反唇相稽：「你以前好好咩？！」
罪魁禍首逃之夭夭，經歷重重波折才跟霆鋒做成夫婦的栢芝，最驚係冇咗個家。
急轉直下
張栢芝同狄波拉的婆媳關係，可謂峰迴路轉，由最初栢芝同霆鋒於○六年九月，在菲律賓小島瞞住拉姑註冊結婚，搞到拉姑嬲到出口，當時更在電話信箱留言：我而家真係好痛，一言難盡！未幾霆鋒公開向拉姑道歉，又跟栢芝跪地斟茶認錯，但依然未得拉姑原諒。
霆鋒唯有做好做醜，協調婆媳，○六年十一月，二人於跑馬地AMIGO 擺和頭酒食飯，離開時拉姑更輕扶栢芝腰間，二人言歸於好。之後栢芝懷有Lucas ，跟拉姑關係更加密切，做跟得新抱，陪奶奶行街、歎茶、shopping 。直至近日爆出「淫照」風暴，栢芝牽涉其中，作為奶奶的拉姑面子盡失，唔嬲就假！
大興問罪
貌似張栢芝的「淫照」上星期繼續發放上網，甫士表情一張激過一張，身為謝家新抱，事件影響力已由個人伸延至謝家上下。
「淫照」流出，老爺謝賢揚言要將元兇挑筋剝皮。而狄波拉（拉姑）接受傳媒訪問時，就一直以無睇相為由，堅拒作出回應。
其實知道栢芝牽涉入「淫照」事件後，本來一度修好的婆媳關係再度降溫，感到十分無面的拉姑更發老脾，致電新抱大興問罪之師，被問到口啞啞，栢芝忍唔住反鬧奶奶。
「栢芝見到第一張相已經好唔開心，唔知點樣面對霆鋒，點知收到拉姑電話，連半句安慰說話都冇，淨係一味問佢件事係點，問問吓栢芝一時失控忍唔住發難，仲話拉姑『你以前好好咩?!』搞到拉姑火都嚟，即時cut 線。」知情者說。
暗認嘈交
一直向外扮冇事的拉姑，本週一（二月四日）接受電台訪問，強調自己心情好靚，準備辦年貨過年，又話從無向栢芝過問「淫照」事件，但言詞間卻透露栢芝霆鋒的確嘈過交。
「無論幾大風雨都要佢兩個人承擔，回頭咪又係牽住手，睇遠啲，有邊個未同老公嗌過交啊！」拉姑說。
講就易，做就難。上週四（一月三十一日），拉姑跟老公鬍鬚Kong 外出睇戲，記者拿住近日刊登疑似栢芝的「淫照」雜誌、報紙請拉姑回應，她刻意將視線望向另一邊，之後更忍唔住發脾氣。
「我好嬲，係嬲你哋將件事搞到咁大，我有人權，你哋唔好再跟住我，唔好行埋我身邊。」拉姑炸完一輪後，又叫鬍鬚Kong 用相機反拍記者，然後繼續辦年貨，不過全程嬲爆爆無笑容。
過街老鼠
受盡困擾，栢芝仍要在壓力下完成工作。上週四（一月三十一日），栢芝要到西貢片廠拍美容廣告，知道有記者在門口守候，坐在保母車後座的她搵助手同髮型師做人牆，愈縮愈低之外，更伸手拉埋窗簾，生怕被人影到。
栢芝之所以咁驚青，原來向來大男人的霆鋒，當年就因栢芝著了一件性感晚裝出席活動，
到越洋提出分手。幾經兜轉，同霆鋒結婚生仔，栢芝一直以幸福女人自居，今次爆出「淫照」，大膽程度令人嘩然，身邊人的反應，就如計時炸彈，難以估計。
避得就避
本來今年是兒子出世後第一個新年，栢芝同霆鋒一早訂製有Lucas 樣貌的利是封，準備周圍拜年派利是，事件發生後，霆鋒雖然即時中斷工作，由南京返港陪老婆，但據身邊人透露，霆鋒完全拒絕對外接觸。
「霆鋒唔上網，唔睇報紙，好似當冇事發生，咁仲恐怖。佢咁大男人，話唔介意就假，聽講佢哋係有嘈過，不過呢個時候冇理由唔支持老婆。」知情者說。
至於栢芝媽同家姐碧芝亦就事件封口。上週四，栢芝媽在中環一間茶餐廳食飯，見到記者即時嚇到面青，十問九唔應，並急步行去停車場嗱車，兜圈賣甩記者。
上週六（二月二日），記者致電栢芝媽，對於所有關於女兒的事，她都無厘頭以「係」作回應，但當問到栢芝同霆鋒婚變的傳聞，栢芝媽即時幫口澄清：「冇咁嘅事！」之後就一直熄電話避記者。
癲狂歲月
栢芝自從02年同霆鋒分手後，感情生活變得混亂，情緒更出現問題，除了自殘身體，又瘋狂購物發洩，行為瘋癲。
口出狂言
02年11月栢芝出席藝人聲討女星被雜誌刊登裸照時，曾經當眾直斥雜誌老闆楊受成「正仆×」；同年12月栢芝在聖誕節出巡遊蘭桂坊，其間竟自稱「洪興十四妹」。
自殘身體
被霆鋒飛起後，栢芝以肉體痛楚發洩情傷，全身包括膊頭、腰間、臂部和腳跟共紋了六個紋身，最經典乃右腳眼上的「CCN 」紋身，以紀念跟霆鋒的一段情，兩度穿臍環的她，更試過不理廣告合約在身，把一頭長髮剪短，惹來廣告商投訴。
瘋狂購物
縱情購物亦是栢芝宣洩情緒渠道之一。除了買名牌，更愛買名車，家中收藏超過十款車，包括保持捷、寶馬、平治、和Mini Cooper ，她曾揚言喜歡用車襯衫；此外，她亦愛心氾濫，見狗就買，家中飼養超過廿隻寵物。06年為了預備姐姐戴碧芝帶同姪仔返港同住，竟又忍心把其中七隻愛犬賤賣。
疑似栢芝的「淫照」前後共有六張流出，一張比一張厲害。
拉姑一聽有張栢芝的相睇即發爛渣兼擰歪面，眼不見為乾淨。
雖然嫌棄栢芝，但新年一樣要過，所以上週四拉姑就同老公shopping 睇戲，辦年貨證明生活冇受「淫照」影響。
