陳慧嫻去年中宣布跟拍拖五年的醫生男友謝國麟分手,事後有指她餘情未了,焦慮症復發,自殘身體。早前謝醫生與一位闊面中女到肯德基(KFC )撐枱腳,陳慧嫻仍死撐:「佢只係同病人食飯應酬。」
不過剛過去的除夕晚,本刊拍得謝醫生又約會該中女,還買齊食物返家打邊爐。今勻「傻女」終於醒覺,陳慧嫻咬牙切齒話:「呢個世界冇好男人!」
42歲的陳慧嫻,將會全面復出,剛在RoadShow 頒獎禮奪「至尊殿堂金曲獎」,2月將舉行兩場慈善演唱會,還會錄製廣東、國語碟,到佛山、上海登台搵真銀,又揚言有興趣接拍電影。
說到底,冇男人,惟有靠自己。
去年9月,陳慧嫻的醫生男友謝國麟被雜誌踢爆與女護士夜會「偷食」,即使陳慧嫻力撐男友,但始終離不開分手收場,搞到焦慮症復發,有傳她不時撼頭埋牆和咬手自殘。陳慧嫻一直以為復合有望,除了電話從未間斷,仍不時到謝醫生位於銅鑼灣的診所,借睇病為由可以見多幾面。即使上月謝醫生在KFC 與闊面新歡約會,陳慧嫻仍死撐:「佢好多patient (病人),成日要應酬佢哋。(有冇機會復合?)睇緣分啦!」
回復單身的陳慧嫻,全面復出,上周四(3日)在RoadShow 頒獎禮憑〈千千闕歌〉奪「至尊殿堂金曲」,當時還坦言對舊情未了,「依家仲未可以接受到第二個人。」
飲紅酒慶祝
除夕晚7時許,記者發現謝醫生與新歡到渣甸山超市購買廁紙、洗頭水等日常用品,又選購火鍋食品和湯底,以及一支紅酒,其間記者聽到謝跟女伴說:「買呢支醬汁點肉食好唔好?……要買紙巾,屋企冇晒!」明顯決定返家打邊爐迎接新一年,之後二人便驅車駛回男方大坑台寓所。正當前男友跟新歡卿卿我我,陳慧嫻則出席奧海城的倒數活動搲銀。
除夕返家撐枱腳
12月31日晚上7時許,記者發現謝國麟和闊面新歡先到渣甸山超市逛了20分鐘,買了不少打邊爐食品,以及廁紙等日用品。
自喻小白兔
本周一(7日)激瘦的慧嫻出席《陳慧嫻活出生命II 演唱會2008》記者會,當她接過記者帶來的謝醫生與新女除夕拍拖照時,先不停失常大笑,又遞給旁邊歌迷看:「你哋覺得點呀?哈哈哈!係咪要問我反應呀?哈哈哈!」當時陳慧嫻有點不知所措,但定過神後,態度變得決絕,明顯要與謝醫生劃清界線。
記:你個唱會唔會俾飛謝醫生同佢女友?
陳:梗係唔俾啦,籌款㗎,自己買飛啦!(此時助手欲帶她離開,反遭陳拒絕,看來陳不吐不快。)唔好影到醫生啲乜就走嚟問我,唔關我事!你哋唔好再登醫生啦,只會增加佢生意,點解要咁幫佢先?佢又唔會分番錢俾你哋!
記:係咪覺得男人都係信唔過?
陳:(深呼吸)呢個世界冇好男人,至少係我身邊冇囉。so far 咁多年嚟,我認識嘅好男人,只有區丁玉一個,得佢係真正愛我,而唔係因為我係陳慧嫻。你知唔知呀?我就好似一隻小白兔,周圍都係猛獸,(佢哋)同我一齊都係有目的。
記:謝醫生都係?
陳:總之以後會觀察對方耐啲,了解多啲先一齊。
陳慧嫻再三強調要跟謝醫生劃清界線,臨離開前更不忘寸對方:「你哋真係唔好再問我佢啲嘢,因為每次我都會諗出好多問題,好似點解拍拖會去KFC 呢?唔通因為慳錢?」然後又一陣大笑後離去!
陳慧嫻和謝國麟相戀5年,06年尾還一同出席李克勤盧淑儀婚宴,想不到數月後分手收場。
陳慧嫻84年入行,與唱片監製區丁玉拍拖,她表示男方是好丈夫好爸爸,可惜她當年太年輕不懂珍惜。
![醫生男友帶女返家過夜 陳慧嫻死心:呢個世界冇好男人!圖片1](http://hk.face.nextmedia.com/images/next-photos/SuddenWeekly/650/640pixfolder/A650-032J/DSC_0374.jpg)
睇相尷尬
本周一,陳慧嫻見記者遞上謝國麟與新歡約會的照片,第一個反應係——尷尬。
![醫生男友帶女返家過夜 陳慧嫻死心:呢個世界冇好男人!圖片2](http://hk.face.nextmedia.com/images/next-photos/SuddenWeekly/650/640pixfolder/A650-032J/DSC_0450.jpg)
失常大笑
之後她無厘頭失常大笑,連補過的爛牙都不介意見光。
![醫生男友帶女返家過夜 陳慧嫻死心:呢個世界冇好男人!圖片3](http://hk.face.nextmedia.com/images/next-photos/SuddenWeekly/650/640pixfolder/A650-032J/DSC_0465.jpg)
不吐不快
途中助手欲借故拖走陳慧嫻,陳反而主動停步,一輪嘴不停講,似乎不吐不快。
![醫生男友帶女返家過夜 陳慧嫻死心:呢個世界冇好男人!圖片4](http://hk.face.nextmedia.com/images/next-photos/SuddenWeekly/650/640pixfolder/A650-032J/7837266.jpg)
《蘋果日報》圖片