曾經批中前特首董建華喺○五年下台嘅術數師李居明，啱啱出咗本《鼠年通勝》，話立法會議員鄭經翰鼠年開咪成功。
本書有章講「十大最好運名人」，幾乎清一色係娛樂明星，只得兩個政治人物上榜。大班的運氣僅次周星馳，李居士話大班未來五年行正「辛丑」運，好到不得了，又話「辛」代表嘴巴，即八月八日之後開咪成功，仲會有財運。而佢老友李柱銘，運氣排第九。李居士話馬丁生於火月，連續兩年有運行，即係民主派同中央又起「噪音」喎。
大班話承佢貴言，但靠開咪就實發唔到達：「反而我戥馬丁開心，佢唔望發達，淨係望普選同社會公義，馬丁有運行即係全香港人都有運行。」
飯焦選人大有辱祖宗
前廉政專員羅范椒芬上週報名參選港區人大，一班左佬猛讚佢根正苗紅，必定贏梗，點知有位研究歷史的老友同百通講，飯焦今鋪簡直係有辱祖宗。
原來飯焦祖先范欽係著名嘅藏書家，又係明朝兵部右侍郎，眼見奸臣嚴嵩當道，覺得朝政黑暗就卸職歸故里，專心整理書籍。老友話飯焦曾公開話香港政治好黑暗，仲辭埋職，點知唔係學范欽歸故里自修，而係投奔政治更黑暗的土共，真係丟架。
范欽喺寧波設立嘅「天一閣」，係現存中國最早嘅藏書樓，封建社會男尊女卑，連范欽都訂立「書不出閣、女不上樓」嘅家規，老友話可能飯焦受祖訓所累，冇得登樓讀書，搞到壞咗腦要投奔中共。
煲呔低調抱孫
特首去年初競逐連任時，曾經向選委透露過自己恨抱孫，佢個大仔曾慶衍真係不負爸望，上個月尾添咗個小千金，趕及做金豬ＢＢ。
曾慶衍與太太莫尉淇○三年結婚，兩位都係公立醫院醫生，但作風低調，估唔到一向鍾意向市民打吓親情牌的煲呔，今次抱孫都玩低調，連特首辦都只話特首的私人事不回應。查實抱孫咁開心，應該普天同慶嘛，或者應該學阿四叔咁，遲啲同個孫女擺個發實宴。
曾蔭權屬猴，孫女屬豬，堪輿學家李丞責話，在命理上一般以男性為官殺，添丁越多官運越亨通，生女則未必有助爺爺的仕途更進一步。BB 女生肖屬豬，冬天出世，是個有藝術細胞的人，例如李白及張大千等都是在冬天出生，曾家未來或會增添一位藝術家咁話。
胡錦濤之子賣機頂盒？
電訊管理局測檢標清機頂盒及電視，其中有個叫清華同方嘅高清電視，原來是由該公司旗下的同方消費電子事務部生產，呢間公司大有來頭，係國家主席胡錦濤公子胡海峰嘅姊妹公司。
呢間由胡海峰任總裁的公司，叫同方威視技術股份有限公司，主力做測檢車輛嘅X 光機重型儀器，去年更獲得中國民航總局巨額合約，成為全國147個機場X 光安全檢查系統獨家供應商，認真巴閉。
榮智健玩殘鄭汝華?
○八伊始，加聲四起。賺錢兼流量都少嘅西隧，反而取消價格優惠，變相加價超過一成。西隧大股東中信泰富自然成為眾矢之的，爭取立法會議席嘅政黨，紛紛到中信泰富門口示威插旗，爭取民心。
有政界老友就同齊百通講，鬼咩！加風四起，唔使風水佬都知最能觸動民心嘅「遏加風」議題，肯定成為選舉政綱嘅穩膽咁話。
老友仲話，為咗西隧加價，政府都好頭痕，因為社會開始有輿論叫庫房水浸嘅特區政府買起西隧，取回主導權，以助隧道分流，據悉政府內部也正計劃成立專責小組研究。所謂在商言商，向來數口精嘅中信泰富主席榮智健，隨時*起嚟賣，今鋪隨時玩殘運輸及房屋局局長鄭汝華都唔定。
民建聯剃發叔眼眉
上星期各區區議員互選正副主席，氣勢如虹的民建聯成功將一直由新界鄉事派掌舵的元朗區議會主席個位搶埋，令劉皇發為首的鄉事勢力首度被剃眼眉。
佢哋為免連副主席個位都無埋，選舉中途突然叫停，話要派多個人臨時競選副主席，令副主席選舉延遲十五分鐘才開始。
原來班鄉下佬利用呢十五分鐘「捉鬼」，向懷疑倒戈民建聯的邊緣人施壓，否則「後果自負」，但最後親劉皇發的鄉事仍以三票之差，副主席個位輸了予民建聯友好的鄧胤楚，令發叔掌控的區議會版圖縮細，好鬼頭痕。
北區醫院內亂
醫管局不斷縮緊開支，前線醫生工作量大增，無暇兼顧專科試，個個新醫生考核時都怕準備不足隨時「肥佬」，好彩北區醫院有班好心的資深醫生，組成一個名為PACES 的study group ，不靠醫管局幫助，義務幫新醫生補習，希望幫得一個就一個。
不過唔知係咪PACES 的教學方法太進取，有時無經北區醫院批准，便帶其他醫院的醫生仔到醫院作臨床教學，惹來北區醫院內科部顧問醫生不滿，認為咁做會搞壞規矩，下令停止「補習」。
計齊百通話，最錯都是醫管局，制度不清搞到醫生內訌，受苦都是病人。
《壹》仔兩個月前寫大班密謀開咪，連相士都咁批。
李居明貼大班同馬丁係鼠年最好運政客。
飯焦賣點係根正苗紅，原來違背祖訓。（《蘋果日報》圖片）
孫女有藝術細胞，煲呔未來應全力催谷她做曾家首個藝術家。（插圖：詹震寰）
