順嫂話我興叔牙擦擦，誰知佢自己咪又係升市揀中下跌股，上擂台一日又撻 落 ，邊有本事認叻。今日都係穩穩陣陣，揀番隻正路股，建行（0939）跌 咁耐，之前仲穿過6元，落番升浪起步位。呢兩日成交增加下回升，買盤再次凝聚力量，股價上返條10日線樓上，睇樣調整已完成，走勢見好轉。
中資銀行股較早前股價持續受壓，係因為人行連番上調存款準備金率，以及收緊銀行貸款限制。不過，日前招行（3968）發盈喜，令投資者對中資銀行股重拾信心。建行作為內地四大銀行之一，本身的存款比重較多，受調控措施的影響相對較小，股價跌至現水位，已重現吸引力。
該行早前公布第三季業績較預期為佳，成功以進取政策增加貸款的利息收入，整體風險管理亦見進步。此外，建行收入結構亦轉趨平衡，手續費及佣金收入大幅上揚令利息及非利息收入的比率下降至5比1，對利息收入部分的倚賴下降，更無懼貨幣政策轉為緊縮的影響。以現價計算，建行預測市帳率不到3倍，以其基本因素分析，估值極為吸引，短炒目標睇7.3元，長線重上高位亦唔係大想頭。
如果您喜歡這篇文章，請按「讚」或分享給您的朋友，以示鼓勵。
