當泰國日本歐洲全部去過幾次，行程節目次次如一，係時候，轉轉方向，過一個不一樣的假期。放假遊埠，目的，不外為避開悶透生活，離開熟悉環境一陣子吧？
今個冬天，趁冰雪節即將開始，就由二十度的香港飛到零下二十度的哈爾濱！用凍僵的手指摸摸幾層樓高的冰雕雪雕，在冰河上迎住冷風開快車，流住鼻水呼出白煙來見證冰雪帶來的快感。玩足三日，有刺激有宏偉有氣氛乜都齊，三幾千蚊搞掂。有時，快樂可以很易便擁有，只看身邊那一位是誰。
Day 1熱身 ¥180滑雪
哈爾濱年度盛事冰雪節於每年1月5日開始，因為太出名吸引太多遊客，得一個月，點夠？政府近年索性響冰雪節前一個月（5/12）加推滑雪節，用滑雪比賽、滑雪表演等等打頭陣，第一個禮拜仲係「免費滑雪週」，唔少滑雪場開放俾公眾免費任滑！滑雪節今年已經第十屆，就算錯過咗free ride ，響哈爾濱滑雪其實勁平，雪場又達到國際水平，有規模，超抵玩！
落機後第一日正式出動，無理由再搭幾個鐘車去滑雪，所以，我揀吉華滑雪場，離哈爾濱市中心只有約50公里，大概一個鐘車程，最近最方便。加上開業五年，設備工具還算新，而且達國家評分最高級的SSS 級，先天後天條件都優勝。最重要，平！¥180包雪鞋雪板，就可以滑足兩個鐘，唔識滑？請教練一對一，仔細糾正你姿勢、響你失去平衡時用血肉之軀頂住你防止跌倒，細心專心招呼足你一個鐘，都係收¥200，時間長啲人多啲就更加平。
雪場位於國家森林公園內，雖然無歐洲的連綿宏偉雪山，山坡雪道勝在夠闊，初級雪道近百米，斜度又很「親民」，對於一年頂多滑一兩次雪的香港人（如我）來說，程度啱啱好，愈滑愈有成功感呀。起碼，唔似歐洲，無一班幾歲細路仔響你身邊識飛咁滑過搞到你勁尷尬。就算唔滑雪，雪場內仲有摩托車、狗拉雪橇，甚至雪山騎馬！好想試雪地滾球，人企響大膠波裡面，滾下斜坡，我去嗰陣積雪唔夠厚無得玩，到你去，記住玩埋我嗰份。
吉華滑雪場
地址：哈爾濱市長壽國家森林公園
電話：+86-451-57669961
收費：¥10國家公園入場，¥180/ 兩小時滑雪連用具
前往方法：雪季期間，每早有接駁巴士由市中心凱萊酒店（7:20am ）及天鵝飯店（8:20am ）前往雪場（須致電預訂），乘的士約¥100
tips
10am 開始時最多人，愈晏愈少人，想避開人潮，可於1pm 到達，不過不要太遲到，因3pm 開始無乜陽光，4pm 直頭日落。
黑江省內近百家滑雪場，根據《黑江龍省旅遊滑雪場質量等級標準》分為S 、SS 及最高的SSS 級，目前共十一個雪場獲SSS 評分，而這標準即將修訂為最高5S 級。
市內天然冰場
花不起一天去滑雪，只要你有一個鐘，都夠時間響市內玩冰。十二月，松花江凍到結冰，厚到夠人行過夠馬跑過夠車駛過，俾廿蚊騎馬或踩冰、五十蚊飛車或坐馬車，又或者玩冰滑梯。去到中央大街北起點的防洪紀念塔，便見到這個天然冰場，隨即有人向你搭訕，不過，記得講清楚價錢才上車，唔好似我俾人呃錢。
主角 近睇巨型雪雕
滑完雪熱過身，熟悉咗凍僵天氣之後，第二日，戲肉，去太陽島雪博會睇雪雕，再去隔籬冰雪大世界看冰雕。
當全國講奧運，哈爾濱冰雪節都趁熱鬧，今年冰雕主題走唔甩08年北京奧運，40萬平方米場地，12萬立方米冰，10萬立方米雪，變成冰希臘神殿、羅馬雕塑、五星環之類，咪講笑，開幕後真係會有冰奧運福娃㗎！至於每年必備的冰酒吧、冰旅館，同埋攀冰岩、雪地哥爾夫、踢足球等等玩意一樣齊備，一日，話咁快就過。
建議大家朝早先去太陽島睇雪雕，因為藍天下睇幾層樓高的白雪雕塑最靚，至於冰雕就要等入黑（4pm 後），住晒燈先有氣氛。
意猶未盡的話，市中心都可以繼續睇冰雕，皆因冰雪節一到，全市盡情慶祝，大街小巷都有大大小小冰雕，具規模的有兆麟公園（尚志大街）冰燈遊園會，舉行國際冰雕邀請賽，多國師傅較量。另外，景點索菲亞教堂前的空地亦將放滿冰雕，當然，少不了遊客必到的中央大街。
tips
場地地面很滑，隨時有一層薄冰，最好著防滑行山鞋，再著多兩對厚襪保暖。
第九屆哈爾濱冰雪大世界
網址︰
http://www.hrbicesnow.com
Day 3餘興 俄羅斯風情
旅程第三日，可以悠閒點，去中央大街行吓影吓相買吓手信吧。中央大街是全市最靚的街道，俄式建築加上燈光氣氛，比其他國內城市好feel 好多。街上有很多紀念品店，俄羅斯套娃、魚子醬、泡沫朱古力等等，十元八塊有交易。就算唔打算行商場，晚飯前點都要到此一遊，況且街上一樣有冰雕睇，去哈爾濱三日，就徹底睇足三日凍足三日啦。唔夠喉？返酒店酒吧飲杯vodka 吧，Sofitel 裡面的新酒吧，全城最型最靚，有一個小型舞池，臨返香港前，值得蒲番晚。
tips
間間紀念品店賣嘅貨大同小異，但價錢可以差很遠，必須格價，魚子醬平至¥45，大套娃¥20，貴過呢個價，唔好買。
Ku Bar &Cigar Lounge
地址：萬達索菲特大飯店2樓
十大溫暖貼士
1.零下廿度，著得唔夠暖的話，係無可能響室外逗留，冰雕幾靚都唔會想睇。室內有暖氣，同室外溫差足足四十度！所以打底唔可以多，最緊要內薄外厚兼擋風。以我們親身經驗，薄羊毛內衣、長袖衫，外加fleece 及羽絨已經夠暖，最最重要係，暴露響空氣中的皮膚愈少愈好！冷帽、頸巾、厚手套、厚襪缺一不可。另外，記得帶備紙巾，因為會經常流鼻水而不自覺的。
2.香港無直航飛哈爾濱，可以上深圳飛，或揀響北京、上海等城市轉機，每日有數班機揀，peak season 都唔怕無位。唯一提醒大家，轉機時記得去行李帶領回行李，過海關後重新check in ，否則，你會和我們一樣，人到了哈爾濱，行李仲響北京機場。只怪我少響國內轉機，原來，外地飛中國，行李唔會自動轉機㗎！
3.住宿首選剛開幕的Sofitel ，是全市唯一由法國集團主理的五星級酒店，相比起市內另外兩間五星酒店，贏在法式悠閒，而且簇新得多！地點也方便，離機場半小時車程、市中心十五分鐘，去冰雪大世界和太陽島也不過廿分鐘，酒店前有小型滑雪場，名勝龍塔也在旁邊。三百幾間房，設施五星級，簡約舒服，酒店內有齊日本菜、自助餐廳、上海菜和酒吧雪茄吧。
4.哈爾濱冬天七點日出，四點就日落，四點半未夠已經黑齊，安排行程時要留意。
5.滑完雪手攰腳軟的話，推介新開的Le Spa ，全黑龍江唯一高級spa ，有香港酒店水準，facial 、body treatment 乜都齊，環境也頗舒服，不過只係比香港平少少。
6.一場來到充滿俄羅斯風情的哈市，梗要一試出名的俄羅斯菜，華梅西餐廳始於1925年，是城中最著名最受歡迎的餐廳，其中招牌菜沙拉拌香雞、烤奶汁桂魚被評定為哈爾濱名菜，更獲國家國內貿易局評為中國名菜。我們試過，老實講，似豉油西餐多啲，好彩幾平又幾好味。
7.來往各景點，最方便係搭的士，¥8起錶，來往市中心景點¥20內搞掂，導遊說冰雪節期間多數遊客都是跟團坐旅遊巴，不怕沒有的士。
8.人要保暖，相機都要保暖！帶備full gear 影冰雕的話，建議帶備買雪糕用的保溫袋，放兩隻暖蛋入去，為相機預備一個溫暖窩。
9.如果你多留一日，或爭取回程當天早上時間，必去的景點，還有索菲亞教堂，建於1907年，有幸保存至今。
10.另外，近郊的東北虎林園也值得一去，800幾隻老虎，並非困在籠中，而係遊客坐在小巴內，駛過老虎園，睇住東北虎、白虎、獅虎、虎BB 等等行行企企，某幾隻仲會行近小巴，嚇得車內人人大叫，全程約四十分鐘，有驚無險。
哈爾濱萬達索菲特大飯店
地址：香坊區贛水路68號
電話：8008302688或+86-451-82336888
房價：特價$618起/ 晚
網址：
http://www.sofitel.com
華梅西餐廳
地址：中央大街112號
電話：+86-451-84619818
東北虎林園
地址：哈爾濱市松北區
電話：+86-451-88080098
場內教練多為廿幾歲的後生仔女，亦有唔少美少女。
雪場有齊初、中、高級滑雪道，長的逾二千米，夠玩snowboard 。
教練一對一指導，近距離捉住你慢慢下滑，兩個鐘，包保學識，唯一難題係要聽得明佢嘅北方口音普通話。
雪山騎馬，¥30跑一大圈，怕隻馬跑得太奔放？可以揀由駐場細路拉住隻馬慢慢踱步。
