Sun Boy'z 隊長Steven （張致恆）三年前因沉迷與傅珮嘉拍拖，遭英皇雪藏，由力捧淪為投閒置散，瘟女惹出禍。他為保事業，急急分手兼洗底，至最近終開齋為英皇新戲《惡男事件》擔大旗做男主角。
事業初見曙光，以為23歲Steven 的起心肝搏殺賺錢，誰知一個屈尾十又瞞著公司追掂同門師妹、有D 咪之稱的新人王鍾舒漫。
最近本刊發現，Steven 已入主女方位於香港仔華貴村一個僅得三百呎的公屋單位。早前記者目睹Steven 偕鍾舒漫到櫃員機攃錢，當時他還向女方呻：「嘩！戶口得番二千蚊咋！」夠晒慘情。
慳錢搭巴士
10月30日，鍾舒漫從華貴村華孝樓寓所外出，走到附近巴士站等72號巴士出中環，這位新人王認真慳家。
熱褲買包
10月31日，鍾舒漫冇化妝，穿上熱褲和踢拖，咬住蘋果（圈）去屋村商場買麵包，之後又返回其「華孝樓」公屋。
D 咪新人王
嬌滴滴的鍾舒漫，甫出道即走性感的rock 味路線，身材達D cup 的她，短時間內已成為少男殺手。
近日Steven 除首度擔演男主角拍新戲《惡男事件》外，更拍住阿Sa 主持電視節目《阿Sa 真人show 》，成功入屋。表面聽教聽話的Steven ，最近竟偷偷搭上與他同年的師妹、走rock 路線的D 咪新人王鍾舒漫。
戶口得番二千
本刊得到讀者報料，指Steven 和鍾舒漫在香港仔華貴村華孝樓3X 樓一個只得三百呎的公屋單位同居。早於`11月24日晚上9時，本刊目睹二人離開公屋愛巢，乘小巴到香港仔中心的滙豐銀行攃機，其間Steven 竟對著女友說：「嘩，戶口得番二千蚊咋！」然後在櫃員機匆匆取了四百蚊離開。之後他們到附近百佳超級廣場，隨手嗱了數包價值$12的微波爐點心，其間鍾舒漫向男友表示「淘大叮叮燒賣」有特價，臨走時再叫Steven 掃多五包，另外又買了袋價值$21的廁紙和一樽兩公升粟米油，才乘小巴返回華貴村愛巢。
就記者連日觀察所見，二人即使同住一屋，行事卻十分小心，通常只會單獨出入愛巢。據大廈保安員表示，鍾舒漫和家人一直住在這個單位，至去年中，其父母才遷出，「個女仔阿媽係呢條村老街坊，所以佢個女做咗明星，唔少街坊都知，後尾佢阿媽搬咗去隔籬座，得番個女住喺度。不過由10月左右，佢試過半夜帶個男仔返屋企，呢排個男仔返嚟仲拎住抽鎖匙添。佢好面善，不過你唔講都唔知佢係歌星囉！」
低頭離開
上周三（12月26日）下午3時，Steven 步出鍾舒漫所住的「華孝樓」時，頭耷耷之餘，亦戴晒冷帽和眼鏡包到撼，十分避忌。
12月初，Steven 出席《阿Sa 真人show 》記者會時，所穿的外套和深藍牛仔褲，與他步出鍾舒漫公屋當日的打扮是一樣。
廿年老牌公屋
Steven 和鍾舒漫的愛巢位於香港仔華貴村，雖然樓齡接近廿年，卻擁有不少人夢寐以求的無敵海景，由於高層單位可遠眺雞籠灣海景，因此在二手公屋市場中，有一定吸引力。
在Steven 的個人blog ，他亦不避嫌放上與鍾舒漫頭貼頭的照片。
拍拖買日用品
據知去年10月，Steven 才正式進駐鍾舒漫香閨，而在11月24日，記者發現兩人一同到超市掃微波爐食品和買廁紙等日用品。
雖然兩人牛記笠記，但鍾舒漫毫不吝嗇以超短褲示人，露出煞食玉腿冧Steven 。
平日Steven 和鍾舒漫在公開場合碰頭亦相當避忌。《新城勁爆頒獎禮》慶功時，兩人擦肩而過都冇傾偈，但原來兩人關係已如此親密。
三年前，Steven 被傳媒拍得與傅珮嘉「同車」斷正相，當時男方還驚青耷頭，事後Steven 決定分手保事業。
SMS 冧掂
其實鍾舒漫自05年參加新秀奪得香港區冠軍後，秘密練兵一年，去年才正式出道，旋即受公司力捧。7月她推出處女新碟《乖女仔》，在短短一周便售罄。由於唱得跳得，年尾囊括不少樂壇「女新人王」獎項。
據知一向內儉的鍾舒漫，性格比較慢熱，在公司稱得上朋友的可謂絕無僅有。直至去年初，公司多次安排她和Sun Boy'z 到澳門英皇娛樂酒店出騷表演，由於Sun Boy'z 好動，鍾舒漫開始和他們混熟，當中與她最投緣的，就是同樣屋村長大的Steven 。
據Steven 身邊好友透露：「雖然公司講明唔俾artist 拍拖，不過Steven 私底下一早嗱咗Sherman （指鍾）電話，一日最少兩個SMS 俾佢，開頭Sherman 都唔騷佢，不過之後做嘢，就見佢哋細聲講大聲笑，佢哋仲瞞住公司單獨約會。老實講，佢哋咁做，遲早出事。」
自爆半夜上嚟玩
本周二（元旦日），Steven 和鍾舒漫出席商台《叱吒頒獎禮》，冇獎嗱的Steven 完騷後提早走人，至於得到生力軍女歌手銀獎的鍾舒漫現身慶功宴時，最初十分風騷地敬酒，但一聽記者問到和Steven 同居，即時騰晒雞，愈講愈亂。
記：你同Steven 熟唔熟？
鍾（雙眼左碌右碌）：我同Sun Boy'z 好熟，其實我自己唔多出聲，不過佢哋令我開懷咗、開心咗。
記：我哋見到Steven 上你屋企喎？
鍾：唔……係呀，佢哋成日上嚟玩㗎。
記：Steven 喺你屋企過夜喎？
鍾：係呀，佢哋半夜都有上嚟玩㗎。
記：半夜上嚟玩乜呀？
此時，其助手即邊扯走啞口無言的鍾舒漫邊說：「唔好意思，Sherman 要趕住上台！」
Mani ：唔係好配搭
經常被指反對藝人拍拖的英皇，對二人拍拖表現強硬，經理人Mani 更直指他們「不是一個好配搭！」
Mani 回應記者時說：「佢哋兩個仲細個，應該將事業擺番第一位。老實講，佢哋兩個唔係好配搭，寧願俾佢哋選擇一個適合自己嘅另一半，好嘅partner 先可以刺激對方事業。其實我都想以後啲artist 嘅另一半可以俾我哋過目。（咁公司會阻止佢哋拍拖？）唔阻止，始終男未婚女未嫁，拍拖好正常。其實08年計劃重點都係捧鍾舒漫，就算知道佢哋有緋聞，計劃都唔會變。（我哋聽到Steven 話自己戶口得番二千蚊喎？）我哋知Steven 唔識處理錢銀，所以佢一出糧，佢經理人就會幫佢hold 起啲錢，幫佢交租同埋日常零用錢啫。」
本周二（1月1日），當記者問鍾舒漫和Steven 拍拖一事時，鍾即眼仔碌碌，肉緊地做手勢表示與他只是好友。
笑住擋駕
Mani 笑笑口表示旗下artist 以事業為重，又指鍾舒漫和Steven 並非一個好配搭。
即時照肺
記者問完Mani 回應，Mani 隨即捉實鍾舒漫細聲說：「佢哋話你同Steven 拍拖……」
急避鋒頭
鍾舒漫慶功宴未及坐低醫肚，即在四位助手護送下，急步從側門離開。
本周三（2日），Steven 出席自己擔正的新片《惡男事件》，被問到與鍾舒漫同居，他說：「我上去佢屋企之嘛，唔係同居！（係咪驚被雪而唔敢公開？）我真係冇拍拖！」此時已有3個助手擁上攔阻。
鍾舒漫女新人王
現年23歲的鍾舒漫（Sherman ），父親是印尼華僑，從事裝修判頭，母親教人彈琴和唱歌，閒時還會替人恤髮賺錢，家中還有個小一歲的妹妹。鍾一家早年寄居在姑姐位於黃竹坑的徙置區，之後遷到鴨
洲安置區。鍾舒漫6歲時才搬到香港仔華貴村公屋，居住至今。
而曾於西雅圖修讀音樂的鍾舒漫，05年回港後，參加英皇新秀大賽奪冠入行，雖然出碟較當年亞軍的泳兒遲，不過自07年7月，鍾推出首張唱片《乖女仔》後，至今銷量逾萬張，在女新人當中，可謂一枝獨秀。在剛過去的新城勁爆和商台叱吒頒獎禮上，她先後奪得「女新人王獎」和「生力軍女歌手銀獎」。
Steven 拍拖遭雪
同樣23歲的張致恆（Steven ），02年組合Boy'z 入行，本身家住觀塘翠屏村公屋，父親當地盤工人，身為荷蘭混血兒的母親則在北角街市雞檔工作，月入數千元。
雙親職業曝光後，張母為怕影響兒子事業，曾一度不敢開工。04年更因子女加入娛圈感壓力，在家狂吞30粒安眠藥。
同年，有指Steven 因與傅珮嘉沉迷拍拖屢勸不改，而遭公司雪藏。據說事後Steven知事態嚴重，曾致電經理人Mani 表示懺悔，承諾以後會專心事業。
05年2月，Steven 與拍檔Kenny 正式拆夥，Kenny 以自己名義出碟，而同年Steven 則與麥子豪和陳偉霆再組成SunBoy'z ，自此發憤工作，成績不俗。據知最近SunBoy'z更以6位數字簽約成為全國「日清」代言人。
拍拖冇運行
為保形象，唱片公司多勒令旗下歌手以事業為重，拍拖唔該say no ！萬一發現歌手偷雞搞男女關係，放逐、解約、棒打鴛鴦乜招都出齊。
千嬅逼玩地下情
去年千嬅演唱會令她與丁子高戀情浮面，更秘密到東京旅行，及後唱片公司A Music怕「情場老千」會影響千嬅，決定打壓二人。近日千嬅被拍到丁家過夜，但她死口唔認「有嘢」。
Isabella 失場急凍
06年梁洛施（Isabella ）被爆與音樂人陳輝陽撻著，更顧住拍拖而多次失場，英皇宣布將Isabella 雪藏一年，以示懲戒。
鄭融約仔被雪
05年正東唱片發現鄭融經常請假，偷偷飛赴上海密會內地男友，公司決定將她急凍。
阿嬌無奈斬纜
02年本刊拍得余文樂夜訪阿嬌香閨。之後阿嬌再被傳與方力申秘密遊瑞士，公司再度插手力阻二人發展。
葉佩雯打入冷宮
01年葉佩雯被踢爆與Eric Kwok 拍拖後，葉隨即被打入冷宮，後來她變本加厲公開關係，遂令英皇與她提前解約。
