肯搏肯性感的05年港姐亞軍陸詩韻，憑住34C 激凸上圍殺出血路，與新一代「咪神」徐淑敏和陳法拉齊名，加上天生一雙銷魂鳳眼，吸引不少富商注意。
今年1月有指她與現年41歲、曾鋃鐺入獄的惠揚控股前主席曾文能結伴遊日本，後又被拍得漏夜摸上男方渣甸山寓所過夜。
表面看，陸詩韻和這位「有底」富豪打得火熱，不過本刊得到可靠消息，陸詩韻最近與早前在《一擲千金》被稱為「一蚊雞先生」的游莨維（Joe ）秘密行埋。他們連日來除結伴睇戲、撐枱腳外，更在錄影節目中，雙雙失蹤匿埋調情。
今年26歲的陸詩韻，05年當選港姐後與無線簽普通藝員約，基本月入約1萬，早前雖傳出與「監躉」富豪曾文能交往，依然無損工作量。近日她拍劇主持兩邊忙，更密密接騷搵外快，還有本事秘交新仔。
12月4日下午5時，記者發現陸詩韻和「一蚊雞」阿Joe 在將軍澳中心食tea 撐枱腳，其間二人「你食我呢碟，我食你嗰碟」，更一杯水兩份飲。傾偈傾到開心時，又旁若無人大聲笑，態度親暱。其後二人在商場行街，雖然有不少途人認出他們，但眼中只有阿Joe 的陸詩韻，忽然除了男方頂cap 帽玩，當眾調情。不過當日阿Joe 要趕返電視城拍節目《事必關己》，二人的甜蜜短聚只維持短短一個小時。
拍檔撻著三個月
陸詩韻和阿Joe 火速撻著，全因三個月前二人主持無線收費台節目《同車生活》。據知，比陸詩韻細一年的阿Joe ，一直在加拿大讀書，由於半途出家當演員，最初睇唔明中文對白，經常NG ，陸非但冇詐佢型，更教他用英文標音，阿Joe 對她亦禮尚往來，經常講笑話和買零食冧對方。
二人關係早已成為劇組中的公開秘密，據工作人員透露，「阿Joe 好識
女仔，成日講唔鹹唔淡中文笑話
Sharon （陸之洋名）開心，兩個近排仲神神秘秘咁，一拍完就吱吱噚挨到好埋。我哋都知佢哋有景轟啦，不過響佢哋面前，大家當唔知之嘛。呢排Sharon 骨膜炎，聽講阿Joe 仲成日陪佢睇中醫添！」
戲院密會
本周三（19日）傍晚六點，本刊又發現二人再度約會，在銅鑼灣MCL JP 戲院睇驚慄片《魔間傳奇》。在戲院內，二人繼續雞啄唔斷，傾偈時間比睇戲還要多。為避嫌疑，影片放至尾段仍未散場時，二人由後門通道離開，當記者上前表明身份，二人先是一愕，見慣大場面的陸詩韻即變回淡定，相反身旁阿Joe 卻驚魂未定。
記：記者 陸：陸詩韻 Joe ：Joe
Joe ：（皺眉）做乜影相？你哋係邊間㗎！
記：我哋知道你哋拍緊拖喎！
陸：吓，邊個講㗎！我當阿Joe 係細佬咋。
記：但我哋影到你哋撐枱腳，依家又睇戲喎！
陸：我哋拍緊《同車生活》嘛，朋友出嚟食飯好正常啫。
Joe ：係呀，Sharon 就快生日嘛！
記：咁生日就要撐枱腳？
陸：都話朋友食飯好正常啫。
記：你哋約會，你個富豪朋友曾先生知唔知？
陸：……曾生本身交遊廣闊，我同佢同阿Joe 都係普通朋友。
說罷二人即匆匆乘的士離去。
鏡頭後咬耳仔
上周二（11日），陸詩韻和阿Joe 在理工大學為《同車生活》錄影。起初兩人正經對稿，但不久就咬耳仔傾密偈，工作人員亦見慣不怪。
借緋聞谷人氣
其實陸詩韻自05年當選港姐亞軍後，空有一副好身材，工作量依然比同屆的葉翠翠和林莉少。直至年初她被影到與富豪曾文能結伴遊日本，以及被指「人肉速遞」漏夜摸上曾的豪宅過夜的負面新聞爆出後，工作量和曝光率出奇地不跌反升，除本身的主持工作外，更有份拍《同事三分親》和新劇《法證先鋒2》。挾著富豪緋聞女友的陸詩韻，霎時身光頸靚，行頭十足，出入揸Benz 代步，但她原來私底下卻與壯男阿Joe 關係非比尋常。睇嚟財來自有方的陸詩韻，呢期想有愛情滋潤吓！
一直住開將軍澳廣明苑居屋的陸詩韻（左圖），有傳認識曾文能後忽然富貴，出入揸平治房車。
煙韌睇戲
本周三（19日）下午，陸詩韻和阿Joe 相約睇新片《魔間傳奇》，入場前陸詩韻買下的飲品，離場時由阿Joe 拿取。
經典之淚
游莨維（Joe ）在加拿大McMaster University 經濟系畢業，06年畢業返港參加《一擲千金》。原本他可以取得39萬，但他堅拒與banker 交換寶箱，最終只得1蚊，身高5呎10吋的他還即時落淚，故有「1蚊雞先生」之名。
隨後他被陳志雲睇中而加入無線成為藝員，更被列為8位將被力捧的新人之一。他除間中客串劇集演出外，還當過《周身法寶》主持，現時主要工作是做《事必關己》及與陸詩韻拍檔《同車生活》。
去年尾阿Joe 上由許冠文主持的《一擲千金》，眼白白失去了39萬，不禁當眾落淚。
咪神港姐
今年26歲的陸詩韻，原任職國泰空姐，05年憑住34C 身材嬴得當年「咪神」封號，更奪港姐亞軍。
她與無線簽下普通藝員合約，近期多次為無線的大型綜藝節目表演歌舞大晒身材，又有份參演電視劇《當狗愛上貓》及《法證先鋒2》等，再加上袁彌明被飛出《娛樂直播》，陸詩韻更食埋個靚位。
被指與她過從甚密的富豪曾文能，生於百億富豪之家，父親是福建幫的僑領曾紀華，由於深得父親寵愛，在父親九七年逝世後，獲得市值三十八億元的上市王國。曾文能其後被揭發偷走公司錢，01年被判監七年半，05年出獄。現時他經常流連王子酒店及英皇駿景酒店等夜場，又與李國寶之子李民橋及殼王陳國強十分熟絡。
與嘉玲飯局
曾文能與陸詩韻多番扯上關係，但今年11月中，曾又秘密與劉嘉玲約會飯局。嘉玲還將自己的寫真送給他。
陸詩韻擁有34C 上圍和白淨肌膚，公司自然為她接不少泳衣騷。
今年1月，有周刊拍到陸詩韻和監躉富豪曾文能同遊日本，但陸解釋只是check in 時咁啱撞到。《壹週刊》圖片
行街冧爆
12月4日下午，陸詩韻和阿Joe 偷閒到將軍澳中心嘆下午茶，並肩而行，開懷大笑非常冧。
一杯水兩份飲
之後他們在「椰林閣」對坐食tea ，其間竟然一杯水兩份飲。咁又係，關係咁好冇所謂！
