娛樂頂點:對撼詹瑞文 黃子華開騷志雲明撐
詹瑞文於文化中心演出的舞台劇《萬千師奶賀台慶》，扮完陳志雲又扮港姐，令詹與無線交惡，更有傳因此而被無線封殺。詹不甘就範，於舞台上再度揶揄無線，除不留情面狠批無線節目冇創意，更在他自創的《智能焗飯》扮「智能大師」，自嘲是「一個女人扮男人嘅主持人」，有意影射陳志雲。
這邊廂黃子華的棟篤笑又在本周一開鑼，除有多位明星好友撐場外，陳志雲更在兩名男助手陪同下高調現身支持，擺明剃詹瑞文眼眉。
群星潮拜
黃子華開騷自然多明星潮拜偷師，像郭靄明、伍詠薇等更任影唔嬲。相反最近受負面新聞困擾的Stephy ，進場時就與方力申貌合神離，入場後就坐埋一齊，認真撲朔迷離！
棟篤比併
黃子華與詹瑞文同期互撼，雖然大家也開12場，而且每場門票均告售罊，但由於黃的演出場地灣仔新伊館座位較詹的文化中心多，所以黃子華今次棟篤笑的收入輕易揮低詹瑞文。
擺朱培慶上枱
今次棟篤笑表演確實笑料豐富，子華選擇以四面台表演，拉近與觀眾距離之外，彼此亦更互動。要數全晚高潮所在，當然是子華揶揄朱培慶「偷食事件」，他說：「我做過佢下屬，我好尊重佢，佢好斯文……但偷食失敗同打劫後果一樣……好可悲，估唔到佢見過咁多大場面，竟然當街玩麻鷹捉雞仔，玩伏喱喱，唉！埋唔到周先至慘嘛。打劫俾人拉咗都唔會咁騰雞。」之後全場掌聲如雷。子華隨即變本加厲，再寸政府各官員：「朱培慶係公務員，點解唔撐佢。我哋有位司長偷步買車都可以玩多幾個月，有位阿伯搞到民不聊生都玩咗七八年啦！偷食啫，仲要唔成功，點解唔夠一星期就提早退休呀。」
寸子淇收1億
第二個爆笑位，就係將徐子淇嫁入豪門為例，去講「妒忌」嘅人生哲理。「我有一位朋友好驚見到佢（徐子淇）個名，話佢有咩咁巴閉啊，佢有嘅嘢我冇咩？……生仔之嘛，使唔使住總統套房。我朋友話佢生孖石，即係腎石同膽石，都係住普通病房……佢生完有人封咗1億利是俾佢，係1億喎！當我每年搵100萬都要搵100年啦！」之後他更跪在台上大叫：「徐子淇，我有咩對你唔住呀？」這句話博得全場歡呼，部分女觀眾可能感同身受，笑得特別大聲。
一連十二場的黃子華棟篤笑《越大鑊越快樂》周一（10日）於灣仔新伊館正式展開，雖然今次他開騷比較低調，沒有像對手詹瑞文拍出位宣傳照，全場依然爆滿。
與無線關係良好的子華一年一度開騷，TVB 總經理陳志雲當然俾面撐場，既可自娛，又可向黃子華勁敵詹瑞文擺下馬威，一舉兩得。知情人士爆：「陳總對詹瑞文已經冇乜嘢，估唔到佢（詹）響個騷上再次辣興陳總，陳總見子華開騷，咪立即call 人hold 飛囉。」陳志雲當晚在兩名男助手陪同下，除由頭睇到尾外，更經常笑到拍掌，聽到子華提起《志雲飯局》時，心情更high 。對此陳表示：「子華嘅演出真係非常精采，我好多謝佢提到『飯局』兩字，幫我賣廣告，好正面。其實子華同詹sir 係兩個唔同文化風格嘅表演，唔可以相提並論，我都唔介意佢（詹瑞文）咁講TVB 同我，我今次錯失咗詹sir 個騷，1月會再捧佢場。」
詹瑞文同期開騷，用屎影射無線節目，自度「向屎眼出發」、「屎尿傳真機」和「屙屎閒情」。
你識扮志雲，我都識寸人。今次子華棟篤笑除寸盡政府高官之餘，更大講粗口gag ，話自己阿爺「情願打膠爛啲碗，一世都唔出去食飯」。
陳志雲只撐子華場，擺明落詹瑞文面，加上有兩位高大男助手護駕，難怪他當晚心情勁靚。
子華以往表演只是一套西裝到尾，但今次佢就漂了一頭白髮，換了兩套衫。強敵詹瑞文當前，梗係要多花心思啦。
