本月初，有傳媒收到署名「胡定欣密友」的匿名電郵，內容指有人因不忿吳浩康與女模新歡莊思敏(Jacquline)拍拖，警告要找人強姦莊思敏，更「叮囑」獵物要小心人身安全。
姦殺令爆出接近半個月，莊思敏日日提心*膽，皆因除了姦殺電郵，近日她還不斷受到神秘電話及具恐嚇性的短訊騷擾。莊思敏說唔排除是情敵所為，更口震震眼濕濕話:「我好驚俾人跟，連街都唔敢出！」
「姦殺令」傳出後，莊思敏一直冇覺好訓，她說其實自去年7月開始，便不斷收到騷擾電話。「凌晨4、5點打嚟唔出聲，玩足3個月，隔幾個月之後又繼續玩，而家就會早啲打嚟，不過真係俾佢搞到冇覺好訓。」
短訊「問候」
該封署名為「胡定欣密友」的姦殺電郵，內容大致是叮囑莊思敏要出入小心，又表明會派人強姦她。莊思敏表示自己雖未收過該封電郵，但月前就收過具恐嚇成分的SMS 。「第一個SMS 叫我去Volar （蒲場）門口等佢，另一個就叫我『小心啲』。我惟有當佢關心我！」
事件傳出後，日日擔驚受怕的莊思敏話自己連街都唔敢出。上週六（8日），她到將軍澳接受本刊訪問，期間四處張望。「我好驚俾人跟，其實免得過我都唔出街，我驚遲啲真係要睇精神科。」
情敵互數
既然驚青，但事發半月以來莊思敏竟沒有報警。她解釋她已請教過孖生胞妹莊晴、莊寧的金牌大狀契爺清洪，又請教過當警察的uncle ，一致認為報警冇用。「佢哋叫我慳番，因為警方唔夠證據做嘢。」
吳浩康跟胡定欣04年開始拍拖，去年3月突然傳出被出身富裕家庭的莊思敏介入，三人拖拉至去年6月，吳浩康才正式宣布跟胡定欣分手。所以當姦殺令傳出後，矛頭便直指胡定欣。
本月1日胡定欣出席活動時被問到情敵的姦殺令，她表現淡定，更反指自己也曾被騷擾。「咁大整蠱呀？咁樣會嚇親對方（Jacquline ），又中傷我。我都冇做過，清者自清……其實我都曾經受過電話騷擾，俾人狂X 唔收線。」
男友懶理
男友吳浩康唔止唔擔心，更半取笑說：「邊有人打劫前會張揚畀全世界知？朋友立場我都關心Jacquline ，多一事不如少一事。」連吳浩康都闊佬懶理，睇怕莊思敏最好都係摺埋一排，唔好四圍去喇！
煙韌行街
去年6月，吳浩康公開宣布同胡定欣分手，但早於去年5月，他已被偷拍到與Jacquline 行街買電腦。事後Jacquline 大方承認有上過吳浩康屋企。而數月前吳浩康母親病逝，Jacquline 亦一直陪伴男友，但二人仍唔認拍拖。
兩年玩完
曾幾何時吳浩康與胡定欣感情一致被睇好，連吳浩康藏毒被捕一案時都不離不棄，可惜拍拖2年多便分手收場。
曾經喺馬來西亞學過詠春嘅Jacquline ，揚言近日會加緊練習；不過面對職業所需，經常以性感姿態示人，Jacquline 表示為咗要做當紅model ，著少啲衫都冇計。
44吋腿神
身材平日冇乜睇頭嘅Jacquline ，為了上位不惜經常著三點式拍照，更落足工夫谷胸。「我知我嘅優點唔係喺個胸度，但我唔會整容。」先天已經擁有44吋美腿，唔使賣胸都夠殺啦！
江湖姦殺令因禍得福
99年張栢芝的父親「鬍鬚勇」，與另一黑道中人因追債發生爭執，對方即下令要搵其女兒（張栢芝）出來，並落下「姦殺令」，栢芝隨即在當時的經理人朱永龍陪伴下舉行記招（左圖），並聲淚俱下表示自己無辜。事件後來經江湖猛人擺平，栢芝才鬆一口氣。
同樣受「姦殺令」影響的Jacquline ，雖聲言自己唔會出街，但過去兩星期她卻頻頻接騷，由以往兩星期才有份行1至2次天橋，增至每星期3至4個，單計上週她已經出席了5個活動（右圖），真係因禍得福。
慳錢搬屋
吳浩康早前為醫母親的病而用盡積蓄，結果放棄租住九龍塘又一村高尚住宅。上週六，他收工後便返回他新租的將軍澳新都城單位，再到藍田麗港城父親的家中休息。
明星夢
現年27歲，家住市值8千萬半山獨立屋的莊思敏（Jacquline ），父親莊寶從事地產生意，母親則是前麗的藝員江玉珠。渴望成為名模兼明星的Jacquline 為做model 不惜跟屋企人鬧翻。她早年更簽約給近年官非纏身的Ba 叔（陳志達）成為旗下藝人，客串過電影《龍咁威2》、《戀上你的床》及《甜絲絲》後星途仍未有起色，惟有繼續做model 。
索模莊思敏
擁有白滑靚背脊的Jacquline ，全程搏到盡，三點式、大露背，通通照做，本地model 來講，Jacquline 都算拼搏。
模擬圖片
模擬圖片
問候短訊G 上週六本來心情勁靚嘅Jacquline ，一提到不明來歷嘅SMS ，即時口震震，更忍唔住眼濕濕。
