著數優惠交流網 » 影視、娛樂交流區 » 封面故事:劉嘉玲澳門銀　偉仔帶索女夜返新居

封面故事:劉嘉玲澳門銀　偉仔帶索女夜返新居

1^# 大中小 cheshire (IP: x.184.192.x) 發表於 2007-12-10 13:47 發短消息只看該作者

年初，劉嘉玲與台灣首富郭台銘打得火熱，枕邊人梁朝偉全程封嘴，更在金像獎頒獎禮拖實嘉玲手闢謠。
最後，嘉玲終於諗清楚，棄台保偉，更與偉仔細屋搬大屋，進駐自己以7千多萬購入的山頂和福道四千八百呎獨立屋，藉以箍實這段廿年情。
一直在女友面前純如綿羊的偉仔，殊不知一個屈尾十竟然偷偷作反。本周一（3日）晚，嘉玲到澳門威尼斯人酒店出席活動努力搲銀之時，本刊記者發現偉仔竟秘密帶一妙齡索女到山頂新居「暢遊」。周六（8日）便42歲生日的嘉玲，剛剛才讚男友：「佢年年都搵到啱我心水嘅小禮物。」唔知呢份生日禮物算唔算「意外」驚喜呢？
周一（3日）晚，劉嘉玲應邀到澳門威尼斯人出席「Grosse 100周年紀念晚宴及珠寶展」，與擔任星際酒店代言人的偉仔打對台，實行各自各過大海掘金。當晚穿著火紅Valentino *帶裙晚裝的嘉玲，適逢生日和喬遷之喜打孖嚟，特別風騷過人。被問到新居擺菠蘿陣，是否以求與偉仔生個金叵羅時，嘉玲不怒反笑說：「係咪呀？如果係，真係一個意外收穫喎！」對於偉仔將送甚麼生日禮物，她又胸有成竹表示：「佢年年都搵到啱我心水嘅小禮物。」對男友投以百分百信心。

本周一，由下午6時至9時，劉嘉玲穿上紅色低胸裙到澳門威尼斯人酒店出席「Grosse 100周年紀念晚宴及珠寶展」，賺取約50萬酬勞。
與嘉玲相似
表面上，看似被嘉玲治得貼貼服服的偉仔，在女友掘金的同一時間，竟然秘密帶一名外形與嘉玲有幾分相似的短髮索女，到位於山頂和福道的新居「遊覽」。當晚七時半，本刊發現偉仔的白色七人保母車停泊在新居門外，不到兩分鐘，身穿T-shirt 牛仔褲，一身casual 打扮的偉仔步出山頂新居，同一時間，一妙齡短髮索女亦步亦趨緊貼在偉仔後面。雖然新居被一排圍牆圍實，但為怕被人見到，二人出門口時，均有默契地耷低頭，急步走上泊在旁的七人車。
之後保母車直駛到偉仔和嘉玲昔日中半山舊居May Tower ，偉仔和索女雙雙步入豪宅後，直至凌晨時分亦未見二人蹤影。

02年，偉仔被拍得與一名短髮索女在中環ALIBI 餐廳門外，離開時在雨夜街頭態度親暱，她的外形與本周一拍得的索女有幾分相似。
鍾情短髮女
一向鍾情短髮女郎的偉仔，早於02年時已有「偷食𠝹女」紀錄。當時有周刊拍到偉仔在深夜時分，與一短髮女郎在中環夜蒲之後，擔遮在雨夜漫步，其間偉仔更主動用左手攬住對方纖腰。至於今次偉仔秘密帶返新居的索女，無論樣貌、髮型以至身形，和「雨夜女郎」均有七分相似，若兩女是同一人的話，偉仔除對嘉玲外，對這短髮索女亦同樣夠晒長情。

上周一（11月26日）原在河北趕拍《赤壁》的偉仔，為新屋裝修事宜漏夜返港，難怪嘉玲話偉仔每年都會送份好有心思的生日禮物給她。
生日前入住新竇
雖然偉仔背住嘉玲「作反」，不過在女友面前永無say no 的偉仔，即使要在河北趕拍《赤壁》火燒連環船的重頭戲，但嘉玲一句「想生日前搬屋！」偉仔亦要硬住頭皮請假，滾水淥腳仆到返港收拾細軟準備搬竇。而嘉玲和偉仔這個位於山頂和福道「愛的新居」，是嘉玲於06年以七千二百萬購入，由於新居有獨立大閘把關，另有一排排高聳圍牆遮擋，再加屋外兩部閉路電視，私隱度頗高。據知由搵屋到成交，都是嘉玲一手包辦，偉仔無得話事。
雖然偉仔連戲都唔拍，趕返港打點一切，不過就本刊記者連日從外觀察所見，新居莫講話大部分傢俬電器均未到，就連牆身和地板亦未髹未鋪，要趕及嘉玲生日（本月8日）前搬屋，未免太倉卒。
8萬5全鋼雪櫃
日前工人花了兩小時，將一部巨型雪櫃*入屋。這是美國出名品牌Sub-Zero 632型號全鋼雪櫃，售價達8萬5千元，內置自動製冰機。
6千蚊乾衣機
嘉玲在大宅2樓的工人房放置了一部價值$5,600，出產自波蘭的金章牌乾衣機，女傭亦已開始使用。
雖然有偉仔打點，但近日嘉玲都有到新居視察裝修進度，不過就未曾見二人一起出現。
全天候監視
大宅外除了設有大閘，屋外還有兩個可轉動的攝錄機，保安工夫做足，私隱度甚高。
菠蘿好意頭
嘉玲在家中放了用紅繩包住的菠蘿，被指有求生仔作用。嘉玲表示它是由印度帶回來，只求好意頭。
搬屋唔去金馬
嘉玲生日當天，剛巧撞正台灣金馬獎，而很大機會憑《色，戒》嗱硬影帝的偉仔，事前卻響晒口話因忙於拍《赤壁》而不會出席當晚頒獎禮，不過偉仔自從在上周六（1日）返港後一直在港，不是搬屋便是到澳門搲銀，根本並非如他所說的趕返內地拍戲。偉仔之所以以拍戲為藉口缺席金馬獎，據知全因在《色，戒》露蛋一事有關。一位知情人士透露，自《色，戒》上映後，由於偉仔幾場床戲極之大膽震撼，引起外界極大迴響，令偉仔承受不少壓力。「其實偉仔拍呢幾場戲都有晒心理準備，不過估唔到出嚟反應係負面居多，話晒佢犧牲咁大，點知喺威尼斯又嗱唔到獎，雙重打擊咪搞到佢同李安有少少心病囉，如果出席金馬獎咪盞眼冤。」
啱嘅，新居入伙已經有排忙，加上金馬影帝早早已經嗱過，偉仔唔去金馬獎都未嘗冇道理！

梁朝偉雖然忙為《赤壁》埋尾，但有錢搵的活動依然照去。上周四（11月29日），出席澳門星際酒店活動的他，心不在焉，連環球小姐伸手與他握手，偉仔都看不見。由於拍戲常戴頭套，他搞到頭面兩截色（左下圖）。
互玩互撐
偉仔與嘉玲拍拖18年，其間二人多次傳出「各有各玩」新聞，不過偉仔和嘉玲均採取「積極不干預政策」，即使另一半出去玩，亦用語言和行動力撐對方，自己才是正印。
偉仔
偉仔和張曼玉02年拍《花樣年華》時被指撻著，年前張離婚，又傳與偉仔有關。
劉嘉玲為此回應：「我哋從來唔會為緋聞問題鬧交。大家相處咁多年，應該要做番自己，有私人嘅空間，我從來唔會去check 佢嘅行蹤，最緊要思想可以溝通。」對男友投以無限信心。

04年擔任金馬獎頒獎禮司儀的林志玲，當眾與梁朝偉抱抱而傳出緋聞。
劉嘉玲回應：「我有睇，呢一部分嘅收視係百分之九十九點九，噱頭嚟啫，好有意思。」對偉仔緋聞處之泰然。
嘉玲
劉嘉玲和胡軍04年合作電視劇《一江春水向東流》而傳出緋聞，更長達兩年之久。06年有指嘉玲和胡軍在上海出席活動時忽然雙雙失蹤，後被發現同住在上海靜安希爾頓酒店。
梁朝偉回應：「係咁㗎啦！你唔覺得依家啲娛樂雜誌係咁嘅咩？是但啦！」當作笑料一則看待。

去年劉嘉玲在上海出席老友王菲所舉行的嫣然天使基金籌款晚會，與郭台銘雙雙拖手進場，郭當晚更以五百萬元買下梁朝偉所捐的古董玉缽，其後劉嘉玲被拍得坐對方私人飛機同遊海南島。郭再發表擇偶宣言，講明對劉嘉玲的感情絕對認真，明剃偉仔眼眉。
對於女友與郭台銘打得火熱，偉仔由始至終都保持緘默。