一向有觀眾緣的楊怡，出道7年未奸過，今次響新劇《建築有情天》入面竟然夠膽死學人做第三者，撬伍詠薇牆腳搶走型佬方中信。
根據師奶界不成文規定，做狐狸精永冇好下場，即管睇吓楊怡今鋪可唔可以打破狐狸宿命？
《建築有情天》
翡翠台 星期一至五 晚上八時半
接近3年冇幫無線拍劇嘅「港版李察基爾」方中信，一貫以型佬姿態於新劇飾演天才建築師鍾國強，威到連球場公廁設計都被人讚巧奪天工創意爆棚。
楊怡響劇中非常崇拜天才建築師方中信，明知佢係好朋友伍詠薇男友，都情不自禁叉隻腳埋去。喂！乜個角色咁似《溏心》水擘擘？好自為之。
車撞狐狸
方中sir 又靚仔又有才華梗多女仔爭。本來佢同拍拖7年嘅伍詠薇一直好恩愛，仲去到談婚論嫁階段，可惜第三者楊怡出現，令方中信臨門縮沙連婚都唔結，同楊怡做偷情男女。前車可鑑，楊怡見《溏心風暴》飾演水擘擘嘅蒙嘉慧下場咁慘，當然努力淡化狐狸精形象：「我都唔算第三者啊，其實我都唔想hurt 到伍姑娘，而且最後我同方中信都冇一齊！」
女人爭嘢從來心狠手辣，楊怡同伍姑娘爭仔搞到由好友變仇人，互摑互鬧不特止，伍姑娘仲狼到用車撞低狐狸精不顧而去，一於你死你事！
嗱分師奶
楊怡做狐狸賭形象，伍詠薇就努力吸納師奶觀眾，為咗要入型入格做草根中年肥師奶，伍姑娘仲要在劇中用深圳A 貨手袋同著娘爆花花裙，靚太形象放埋一邊，分分鐘幫佢嗱番啲觀眾緣。
伍詠薇甘願做方中信背後嘅小女人，仲差啲結埋婚，可惜方中信一見到嫩口楊怡即刻流晒口水，連糟糠都唔要。咁花心，型佬大晒呀！
狐狸必死
做第三者幾時都冇好結果，即使只係響戲入面做狐狸精，狐狸之名分分鐘跟足你一世，網友圍插事小，出街被路人指住鬧先大鑊！奉勸各位女星，演狐狸精前要三思。
周嘉玲（卓羚）
要數經典第三者，周嘉玲一定有份。當年佢響《再見亦是老婆》搞到姜大偉拋妻棄子背叛陳秀雯，事隔13年，依然被人認定係狐狸精。
陳法拉（Angela ）
新一代「姣精」陳法拉，在《師奶兵團》勾引葉童老公郭政鴻，更令佢染上性病離婚收場。難怪陳法拉話當時出街會被師奶怒睥，好在法拉響《溏心風暴》做善良細妹嗱番分，繼續長撈長有。
蒙嘉慧（水擘擘）
響《溏心風暴》入面拆散程亮同常在心的水擘擘，由於角色唔討好犯眾憎，令觀眾緣大減，連廣告商都唔敢搵佢，蒙嘉慧荷包大縮水。
楊怡於劇中同伍詠薇爭型佬方中信都未夠，上週二（27日）幫《建》劇宣傳時繼續貪玩抽住伍詠薇隻腳，好在你人緣好，唔係好易俾師奶圍攻㗎！
自動獻身
偷食男女
幸福廚房
