宣傳攻勢鋪天蓋地嘅威尼斯人度假村，論派頭人氣，全部贏晒。佔地1,040萬呎，坐擁55萬呎全世界最大賭場，單日入場人次高達十萬，絕對是城中熱話。人人都響嗰句︰你去咗未？未？我帶你試玩一次，現場直擊親身感受澳門的威尼斯人究竟掂唔掂，記者於開幕第三天入住，等了又等，人山人海，幾經迷路後，疲倦的雙腳完全感受到全亞洲最大度假村的威力，真係行足幾日都行唔晒！只可以用一個字形容：巨！金碧輝煌背後，細節位仍然有待改善，趕頭趕命趕開張的威尼斯人運作尚未暢順，出現種種蝦碌場面，未至於好嬲，但，實在好笑。
賭場一望無際
54萬6千呎一層過，一望無際絕無誇大！3,400架老虎機，870張賭枱，百家樂、番攤、魚蝦蟹、三公、廿一點、大細、輪盤等，睇都睇到眼花。四個區域︰帝王殿、赤龍殿、金鱗殿和鳳凰殿，只係顏色和*燈等略有分別，確實，有點迷宮feel 。我不愛賭，所以，場內傳來的葉麗儀、鄧麗君、鄺美雲等等名曲格外搶耳。中世紀威尼斯裝潢配中港台八十年代金曲，全球只此一家了吧！
房未執好
威尼斯人酒店的最大賣點，大，3,000間房間間係套房，最細都700呎！公開俾非VIP 以外大眾預訂嘅只有較細的兩級，記者成功以$1,088網上訂購最平的700多呎房，連稅只需$1,251，新簇簇，抵到爛，家陣特價優惠梗係完咗啦。
我們比official check in 時間3pm 早咗三個鐘到達，正值退房時間，大部分櫃位只照顧check out 客人！等到發呆，甚至等到發脾氣的客人實在好普遍。試想像，十幾個櫃位同時handle 三千間房，唔出事就奇！真係出事。拎了鎖匙打開大門，我們的房間竟然仍未執拾，鼎鼎大名五星級威尼斯人喎，咁都得？！好彩各方職員第一時間補救，猛say sorry 兼派人上來換房，氣都順啲。
退房時又有蝦碌事件，話說三個職員輪流提議我用express check out 唔使排隊，我堅持排隊，但，壞printer ，收據都印唔到張。種種細微細眼細節位，亂晒龍！
九月房間已經全部爆滿，想住最快要等十月，房價飄忽㗎，最平房間十月頭最高升至$2,388，十月中$1,888，十月尾回落至$1,488，愈早訂愈著數，或者，直接打去酒店問邊日最平罷啦。
讚
1.酒店房夠大感覺超豪華。2.房價合理。3.職員親切有禮。
彈
1.房景避不了地盤景。2.沒有果盤、開床等五星級貼心服務。3.酒店不包早餐，要叫room service 或俾錢去Cafe Deco 食。4.訂房電話駁通電話錄音卻久久無人接聽。
訂房電話︰853-28828822
網址︰www.venetianmacao.com
Check In 搞足個半鐘
住客意見
嘉（左）︰「我哋一點check in ，三點先有房，間房好大好靚，不過個景好差。」
汶（右）︰「商場好靚，但係感覺好空，爭啲音樂，如果船夫會大聲唱威尼斯feel 嘅歌就更加好。」
配套解構
威尼斯人出名配套夠完善，酒店、賭場、飲食、shopping 、spa 、泳池等等一條龍，一家大細三日兩夜唔出酒店半步都玩唔晒。集合我們親眼目睹親耳所聞，奉勸各位︰穿舒適鞋子、與認路本領上佳的朋友同往、帶備輕鬆觀光及大量現鈔，否則，行到腳攰、迷路、失散，唔係講玩的。
貴價spa
以為V Spa 會有Venetian 的風格氣派，結果，平實不過的裝修令人沒趣，比泰國spa 差很遠，也不及香港五星級的高貴，又沒有靚steam room 等設備，幸好泰國師傅笑容可掬手勢一流挽回分數，但係，facial 最平埋單八百幾，貴到暈。
索拉奇藝坊開show
場內有大型綜合館Venetian Arena 及08年初開幕的劇院Venetian Theater 。綜合館可坐15,000人，十月將舉辦NBA 籃球賽及十一月有森柏斯、費達拿網球對戰。劇院更請來索拉奇藝坊長駐表演。
地盤襯泳池
由房行去泳池足足十分鐘，要先到南翼（酒店分南北兩翼）搭𨋢到五樓，再行幾分鐘轉𨋢
去一樓！一大三細泳池，近睇唔錯，但舉目地盤起重機……無沙塵滾滾算好好喇。
讚
1.300萬片共一噸金箔打造金碧輝煌環境，豪華瑰麗。2.唔賭都啱玩，節目睇頭十足。3.樓底高，有人食煙空氣亦流通。4.出入賭場不用過金屬探測器或放低行李，方便得多。
彈
1.酒店大堂已被自由行攻佔，坐滿一地。2.指示牌多，但迷路的客人更多。3.四圍很多地盤。4.播放的八十年代中文歌娘極。5.十八歲以下不能入賭場，帶著小朋友的要兜路行。
$120十五分鐘貢多拉
100萬呎shopping mall ，350幾間鋪，照計，夠行三日三夜。現階段只開了三分一（三條運河只開了Grand Canal 一條），重點，梗係遊貢多拉河，室外的暫未開放，現只有室內Grand Canal 一處。
運河長490呎，遊一次成人每位$120、小童$80，來回一轉咁大把，十五分鐘搞掂。當然，收得你咁貴，唔會逼你三唔識七坐埋一條船，亦有專人出盡力唱意大利情歌你聽。可惜，當日所見來來去去十個船夫，最正係陽光feel 鬼仔，其餘只係親切拉丁中年或女船夫，一個真正意大利靚仔都無。詭異的是，船夫唔使點划，貢多拉照樣快如水上飄，細看之下，原來船底裝有小摩打。老實講，我會揀慳番百二蚊，皆因最靚景的聖馬可廣場同鐘樓，唔使錢一樣有歌聽有街頭表演睇。
讚
1.藍天白雲天幕，威尼斯場景逼真度極高。2.將引入多間從未在亞洲開店的品牌。3.店鋪種類多，珠寶手錶等名店以外，威尼斯人紀念品、影音、中藥都有。
彈
1.貢多拉遊太貴，仲要排長龍。2.LV 、Gucci 等熱門店欠奉，時裝較弱，又無便利店。3.街頭演奏時間不長，場內只播放梅姐、城城等攝時間。
遊客意見
陳小姐︰「我響澳門住，嚟行吓，呢度好大好靚，但係$120遊貢多拉真係唔值。」
餐廳大檢閱
行勻威尼斯人已經夠攰，仲要撲出市中心食飯，盞辛苦自己。留守威尼斯人，就預了高消費，場內約30間餐廳，中西日有齊，現階段未開晒，首選金沙大老闆都捧場嘅Morton's of Chicago ，牛排一早賣到出晒名。要型，有上海過江龍Blue Frog ；仲有威尼斯人主理的貴價中菜喜粵，最令人期待的則是英倫名店Roka 日菜。有錢，絕對有好嘢食，係要鬥早訂位之嘛。
就算賭場內的茶樓點心，亦比鴻星美心貴，幸好，食物合格有餘。最平選擇是Food court ，有熟口熟面的池記、Te 、富臨門等等，一千個座位，三四十蚊有交易。
Three Prime Cheeseburgers $98(Morton's)
主打USDA 頂級牛扒以外，酒吧小食亦甚有睇頭，迷你芝士漢堡以三安士牛肉餅加車打芝士、羅馬番茄等做餡，肉汁多，滋味十足。
讚
1.選擇多，平中貴、中西日都有。2.餐廳散布四周，總有一間響左近。
彈
1.沒有米芝蓮星級大廚撐場。2.價錢比澳門市價貴得多，拍得住香港。
遊客意見
梁小姐︰「我搵咗好耐先搵到入口，指示唔夠清楚，好在感覺豪華，連food court 都幾靚。」
澳門名店絕地反擊
威尼斯人一開，焦點全部轉移，皇冠、星際、永利等等對手如何招架？當然係推出新意新計劃啦，唔通靠機件故障唔賠錢咩！
皇冠主打六星級優雅
同威尼斯人有得揮的，先數位於冧仔的皇冠酒店，搵到發哥做代言人，大賣六星級服務，就知佢sell 豪sell 尊貴。
酒店大堂響38樓，居高臨下落地玻璃無敵靚景，勢，贏晒。Check in 時有專人帶你入房，216間房又係落地玻璃，望到冧仔橋、旅遊塔、新葡京、MGM 一列靚景，房間約六百呎，空間感十足，裝修modern ，單係五十幾個電視台都有排你睇。
泳池、健身室一樣坐擁海景，加上infinity pool 設計，開揚舒服。一般的spa 房裝修普通，VIP 房靚得多，可惜，唔係填張表申請就做到VIP ，要事先經過篩選。賭場感覺豪華有格調，行出行入職員用英文同你打招呼，餐廳侍應又係同你講英文，怪係怪咗啲，總好過要用普通話對答。皇冠同威尼斯人絕對是兩回事，屬於正常高貴五星級酒店，感覺，類似香港嘅文華咁啦。
中法日四大餐廳
皇冠主打的四間餐廳都係咁豪，粵菜帝影樓巴閉到用黑毛豬做叉燒；天婦羅專門店天政是日本以外唯一分店；吉良鐵板燒賣懷石料理；法國菜奧羅拉連自助早餐都做得精彩。
奧羅拉供應傳統法菜，魚子醬、鵝肝、鴨腿是招牌菜，用料靚之外，餐具，一樣靚，全套Hermes 刀叉連皮枱墊，細節位顯出六星級地位。吉良日本菜少不了A11級的和牛、藍鯨拖羅等等靚貨，當然，價錢也是六星級的。
澳門皇冠酒店
地址︰冧仔廣東大馬路
電話︰853-28868888
房價︰$1,990起
古堡酒店西班牙名廚坐鎮
澳門其他酒店紛紛反擊，以古堡風情的聖地牙哥大變身最令人欣賞。房間一律兩間打通變套房，大咗新咗靚咗，地板用真皮鋪、蒸氣浴Jacuzzi ，大部分仲有望海露台，價錢，當然亦貴咗。
唔過夜，都要去啱啱開嘅西班牙餐廳La Paloma 食番餐，大廚Oscar 曾於被譽為全球最佳餐廳的西班牙El Bulli 做過一年，亦係巴塞隆拿希爾頓的副行政總廚，來頭勁。他炮製的傳統西班牙菜，多款tapas 、海鮮麵、凍湯等等，水準一流，平均消費五百蚊，非常合理。
聖地牙哥古堡酒店
地址：西灣民國大馬路
電話：853-28378111或香港熱線800969153
房價：$5,800起
星際開高級日菜
星際不停upgrade 自己，泳池改裝完成，更引入日本名店稻菊（香港IFC 店勁受歡迎），日本師傅炮製招牌天婦羅之外，梗有時令魚生，前菜精緻到不得了，全部保持水準，是全澳門少有的高級正宗日本料理。
稻菊
地址：新口岸友誼大馬路星際酒店5樓
電話：853-2908668
$48,888永利浮誇遊
永利不停贊助盛事搶鏡，最新有音樂劇《CATS 》，12月尾響澳門文化中心演出。另一方面，酒店繼續sell 豪，推出$48,888超豪package ，搭直升機、勞斯萊斯來回，住有獨立賭場的豪華suite 、包spa 、包剪髮，香檳早餐等等浮誇至極。
地址：外港填海區仙德麗街
電話：853-9869966或香港熱線800966963
大三巴巷南歐餐廳
市中心反擊代表，大三巴旁的舊式葡國建築，內部改建成餐廳、二樓將開設畫廊，天台更會開酒吧，有大三巴做背景。率先上場的南歐餐廳Corner's ，以希臘、意大利等地方菜為主，水準不錯，risotto 做得頗正宗，價錢親民，平均二三百蚊落樓，是酒店餐廳以外的好選擇。
Corner's
地址大三巴巷3、5及7號
電話853-28482848
開幕日，仿照威尼斯面具節，靚女不停穿梭。
瑰麗堂的壁畫依照威尼斯總督府而畫，是全場中心點，必經之路。
酒店大堂的渾天儀。
全場共51艘貢多拉。
