小妹發現香港人原來真係可以好乞人憎。
話說同姐姐過海出中環,回程既時候等左好耐車,終於等到喇~上車都唔夠十分鐘,司機叔叔突然剎車,小妹同大姐就差d 撞埋牆...
坐左响第一同第二排分別有三個阿太同一個阿婆,响司機剎車後就開始大聲講:
"有冇搞錯呀!架車咁樣剷埋黎!好在dup 得切啫~"阿太A話。
"咪係囉~邊有人咁楂車架!咁樣切線入都有既!"阿太B話。
"係咁樣剷埋黎,唔撞就奇啦~司機都唔係楂得快,咁樣點避呀?"阿太C話。
最厲害既都非阿婆莫屬,佢幾乎係全場講得最大聲嗰個,有晒三位阿太所講既意思,仲講到自己好似司機一樣,連架車有冇撞到,high 花左佢都知!仲話前面切線既貨車司機個樣兇神惡剎,自己唔啱仲想鬧我地個巴士司機。
巴士司機固然就落車同佢理論,仲大聲嗌話叫大家幫佢做證人,明明係個貨車司機剷埋黎...
部份坐樓上既乘客更走落黎湊熱鬧(呢d 咪香港人囉...),大家都一致話係個貨車司機唔啱。
大姐同我當然唔出聲:我地把聲冇人地咁大,加上我地根本唔知發生咩野事。
到警察到場,話我地知係交通意外,問左冇人受傷,就叫司機停埋一邊安排另一架車載我地走。
當其時阿太們同阿婆依然係你一言我一語咁...全車最嘈就係佢地@
當然,呢d事發生,巴士公司同警察都會好concern有冇目擊證人。
巴士司機其實係一個比較粗枝大葉既人,講野大大聲,粗聲粗氣,但又會睇得出其實佢只係唔太識表達而已...
司機安排大家落車,司機就一路話:
"大家有冇人可以幫我做證人?麻煩幫幫手啦~有冇人可以幫下手做個證人?"
結果,最最最大聲嗰四個,即刻收晒聲。
坐第二行嗰兩個女人完全當冇事發生過一樣,攞埋d 野跟住d人行落車,眼尾都唔望下個巴士司機;
阿婆即刻冇聲出,裝聾作啞,左望望右望望,完全置身事外;
佢隔離個女人最離譜-想唔出聲扮冇野落車,咁啱經過司機面前,司機依然一直叫大家幫忙留個電話做證人,邊個睇到件事發生麻煩幫幫手,佢居然望住司機話:
"下?睇唔到喎...."
....呢d 咪係香港人囉...
最搞笑係落車後,本身大家都好合作咁排成一行等車。由於當時係繁忙時間,可能巴士公司安排唔到另一架車黎接我地走,所以只好等下一班車到。
突然有個男人好似躁狂症咁,係咁鬧個巴士司機,話佢叫晒所有人落車,一陣佢地上到車冇位坐@ (你估而家個司機好想撞車架咩...)
司機雖然態度都麻麻架喇...但明白到佢又要落口供,又要打番公司,佢自己都好多野煩...個男人居然仲為左自己冇位坐而嘈到拆天咁...
司機話:"我都唔想架...我都冇辦法架喎..."
個男人即刻發脾氣:"咩野冇辦法呀?根本係你安排有問題呀!我比左錢你唔比位我坐!"
我同大姐已經忍唔住,在旁有意無意咁細細聲加把口:
"個個都係咁等架啦~你估司機突登撞車架咩..."
好在有個有點人性既哥哥仔,叫司機安排比我地呢批人上車先,至比响呢個站等車既人上車...雖然都唔保證個個都有番個位坐,但都不失為一個好辦法既...
個男人第一時間跟司機走去條隊既前面,然後咪就大條道理咁企左响前面囉~
(你早d 講係因為你自己要排到最後驚冇位咪算囉~講到自己好為全車乘客謀福利咁...如果當時你係排响最前面嗰個,小妹真係唔信你又會咁見義勇為叫司機安排後面乘客上車先...)
呢d 咪又係名副其實既香港人囉!
小妹仲好想同個大叔講,你咁講公平,又駛唔駛叫下班車到站時,叫車上乘客落晒車比你揀位先?
仲有頭先嗰幾個阿太,當然响前面高談闊論啦~我同大姐都諗定,唔好比我地上車見到佢幾個又响度大大聲呢樣嗰樣,我地一定會開口話佢地@
最終上到車,個男人當然有位坐,仲有個阿婆又坐响第一行(應該有人讓座比佢啦)雖然佢係老人家,但有時真係覺得唔公平...你要人讓座既時候就有人讓比你,但司機大哥要你幫手既時候你就唔理人,未免太自私吧?
老實講,香港有好多好人,但都有好多好自私既人。我唔明,佢地唔擔心有一日到佢地要人幫既時候冇人理佢時,自己會有咩野感受?
或者到時佢地又會大大聲咁話:呢d 咪香港人囉!
如果您喜歡這篇文章，請按「讚」或分享給您的朋友，以示鼓勵。
