娛頭:失豬女友數臭丁子高 情場老千千千嬅七年冇拖拍的楊千嬅，半年前秘密同細過她五年，曾是男子組合VRF 成員丁子高撻住，不但被傳媒影到千嬅揸車載住新歡現身跑馬地，丁子高更不避嫌晚晚出現千嬅演唱會，還坐正對方父母隔籬，儼如男主人。
演唱會後，兩人被踢爆同遊日本。烈女千嬅不計較兩人身份懸殊，亦無查清楚對方背景，就全情投入，點知丁子高在圈中原來臭名遠播，唔單只充有錢仔，更有鋪癮
完唱，又試過對女友動粗，臭史多籮籮。
甜品攻勢
現職公關公司的丁子高，跟樂壇天后楊千嬅姐弟戀消息傳出之後，兩人更被踢爆日本度假，享受十日甜蜜的二人世界。不過，有傳今次日本之旅，全程由疊水千嬅包起，講到明話補祝男友丁子高七月生日。
冧女有一手嘅丁子高今次獲得天后垂青，全賴他悉心部署的甜品攻勢奏效。
「佢識咗千嬅之後，知道對方鍾意食甜品，就成日響金鐘一帶嘅酒店買啲好靚嘅蛋糕送俾千嬅，知道佢鍾意食Tiramisu ，又會特登送去佢屋企。千嬅咁耐冇拍拖，有個男仔對佢咁細心，自然受落啦。」知情者說。
扮有錢仔
自稱老豆大把錢的丁子高，成日誇口自己是有錢仔，屋企大把，但這個「有錢仔」實則是個月入萬八的「上進青年」。其父丁永方雖然在上海經營皮具生意，但早年已跟丁子高母親離婚，另外再娶，已經沒有再照顧前妻一家。
九七年金融風暴後，因為父親生意一落千丈，丁子高更加要出來打工養自己，先後在港島區三間同志吧，包括H2O ，LAB 以及一間樓上鋪做調酒師。由於飲得又talk 得，丁子高因而結識了不少有米同志。「嗰陣佢同一個日本籍嘅同志好啱傾，成日出雙入對，對方仲不時送名貴禮物俾丁子高。」知情者說。
九九年，丁子高參加全球華人新秀歌唱入娛樂圈，後組成男子組合VRF ，以為可以做歌手賺錢，點知反應麻麻，出了兩張唱片就要散band 。雖然做唔成歌星，但因為愛蒲愛玩而結識不少名人，於是轉做公關。
唱女友失豬
冧女有技巧，原來「唱女」亦是丁子高的強項，○二年跟日本著名音樂人小室哲哉徒弟譚凱琪（Zoie ）分手後，丁子高曾向友人大爆前女友私隱：「Zoie 隻豬俾咗我。」其實在跟Zoie 拍拖期間，丁子高就先後跟李彩華、Cookies 成員蒲茜兒（Serena ）以及台灣歌手丁小芹傳過緋聞，第一次拍拖的Zoie ，當時亦因為受不住丁子高四圍溝女，最終患上抑鬱症。
對於前度男友惡行，Zoie 欲言又止。「我當時係有抑鬱症，因為聽到好多是非，搞到自己好混亂。（嗰時傳佢同Serena 拍拖？對方仲出錢請佢去日本玩？）我聽過佢哋嘅嘢，我都知道佢哋有一齊玩。（當時有冇問清楚佢？）我都唔敢問，俾我知道真相仲驚。（佢周圍同人講，你隻豬俾咗佢？）唔好講到咁核突，總之呢段係我初戀。其實當時自己都處理得唔好，成日亂諗，先搞到抑鬱。我哋依家仲係朋友，如果佢真係同千嬅拍拖，我都會祝褔佢哋。」
暴力傾向
溝女夠手段，但丁子高同時亦愛郁手郁腳，鍾意以武力解決問題。
「當年同Serena 拍拖嘅時候，有次Serena 當住一班朋友面前發脾氣掟嘢，丁子高即時好大力用雙手將Serena 成個人攃住，好惡咁叫佢唔好玩嘢，話自己唔受呢套，搞到Serena 震晒唔敢郁。
「其實佢對Zoie 都一樣，Zoie 知道佢同Serena 有路，打電話去鬧Serena ，後來俾丁子高知道咗，就同Zoie 發脾氣，仲響屋企大廈打爆大堂玻璃，搞到流血報警，之後報紙登晒出嚟，佢仲死撐話自己係飲大咗。其實佢好容易情緒激動，好似○二年平安夜同曾志偉個仔曾國祥響卡拉OK 打交，搞到上差館，都係大家睇對方唔順眼，根本就唔係有咩特別過節。」曾經同丁子高玩得好埋的朋友說。
急於公開
今次丁子高高攀楊千嬅，千嬅身邊朋友一面倒反對，全因對方聲名狼藉。
「上年佢俾記者影到同傅明憲一班有錢人響日本睇麥當娜演唱會，其實佢不過係跑腿，幫一班名人闊太訂機票訂酒店，純粹公事。平日同啲名人出去玩，佢都係出名靠黐，就算幫襯茶餐廳，都係避得就避唔埋單，為咗唔俾人識穿佢冇錢，佢成日強調話佢老豆好有錢，但唔俾佢亂使。」知情者說。
黐飲黐食事小，丁子高更喜歡借戀情做宣傳。「好似千嬅開演唱會，佢去足五場，擺明搏記者影相，好想外界知道佢哋係拍拖關係。」知情者說。
女友比自己名氣大，對做公關的丁子高來說無往而不利，難怪他急於公開與千嬅關係。不過，愈急愈易漏底，就算千嬅當局者迷，但旁觀者清。
情史多籮籮
丁子高
前組合VRF 成員之一丁子高（REAL ），緋聞多之餘仲個個都有番咁上下名氣，不是娛樂圈藝人便是名媛，堪稱情場老手！
06年被拍得與傅明憲同遊日本，十指緊扣睇麥當娜演唱會。同年9月亦被拍得與緋聞女友趙式平一同出席Dolce &Gabbana 上海外灘6號新店開幕禮及派對。
05年經常邀請佘詩曼到他有份投資的酒吧消遣，並到女方的香閨過夜。
04年與剛和霍啟剛分手的盧恬兒拍拖，經常帶女友到自己開的夜店消遣做生招牌，但三個月後閃電分手。
03年被拍得與李彩華拍拖食雪糕及經常同遊夜店。
02年與小室哲哉徒弟譚凱琪（Zoie ）拍拖，一年後因李彩華介入而分手，Zoie 更哭訴被撬牆腳。
楊千嬅
有「大笑姑婆」之稱的楊千女華，入行12年，緋聞少之又少，曾公開表示她對戀情十分認真專一，最廣為人知而且親口承認的只有和鄭中基的一段感情。
03年有傳與吳彥祖再次合作《新紮師妹2美麗任務》時，楊千嬅主動出擊，在上海為他準備了大量暖包。
02年與古天樂拍電影《乾柴烈火》而撻住，曾被記者拍到撐枱腳，但因古仔極有女人緣，所以「千古戀」只是曇花一現。
99年與鄭中基秘密拍拖，鄭中基以《2月3日》（楊千嬅的生日）一曲成功奪得芳心。經過多次的離離合合，終於還是分手。
94年華星年代，跟同門陳奕迅傳緋聞，95年尾楊千嬅被公司保送赴美四個月修讀音樂課程，從美返港後才知道陳奕迅已與徐濠縈拍拖。
貧富懸殊
被稱為圈中富婆的楊千嬅，上年以三千萬天后身價簽約林建岳的東亞唱片，閒閒地拍一部戲就有過百萬片酬收入，反觀打工仔丁子高，月入只有萬八蚊，就算顧得掂自己，都冇可能全天候照顧女友，貧富懸殊，今次兩人去日本玩，全程要千嬅做波士埋單，就係最好證明。
現受有線力捧的Zoie 02年跟丁子高拍拖時，因為對方爛滾令她患上抑鬱症。
千嬅：烈女不怕死!（設計對白）
咁就嚟啦!（設計對白）《壹本便利》/ 《蘋果日報》圖片
曾是三人組合VRF 成員的丁子高（第一排左二）跟楊千嬅（第二排左一）早已認識，二人00年出席電台記者會時已排排坐。（《蘋果日報》圖片）
有男友撐場，楊千嬅本月在演唱會時春風滿面，唱情歌時冧到震。
壹周刊第921期
