曹仁超-投資者日記(20/10/2007)-A股基民搶購QDII基金

10月19日，周五。是日重陽兼1987年股災二十周年。油價一度見90美元一桶，因70％投資者相信10月31日美元利率將減四分一厘，至四厘半；加上土耳其國會已清除出兵入侵伊拉克北部法律障礙，即係話土耳其軍隊一年內可隨時進入伊拉克北部產油區；一旦上述事件出現，將阻止伊拉克石油出口。產油國10月底開會，可能取消之前打算11月1日起每天減產五十萬桶石油決定，仲有G7會議對美元價後市亦有影響。金價亦升至1980年1月以來最高，一度見771.1美元，向1980年1月最高價850美元邁進。日經平均指數今天表現甚差，跌1.71％，收16814點；由2007年2月26日起日經平均指數已進入一浪低於一浪走勢【圖】。中國夢未完

周五滬深A股微跌，後市展望仍唔清晰，因愈來愈多A股投資者認為炒A股不如認購QDII基金。

1950、60年代係美國夢（America Dream）。戰後美國經濟由1949年至1966年進入高速發展期。接係香港夢，香港經濟由1967年至1997年長達三十年高速成長期。今天係中國夢（China Dream），因中國經濟進入黃金時代，企業股價每年以一倍速度上升。2001年起至今中國對石油需求，將全球油價由10美元一桶推高至90美元，令全球油公司賺大錢；商品價格由銅到鋅、由水泥到煤、由玉米到小麥、由鋁到鈾都在狂升。中國企業雖然存在好多弱點，例如員工唔誠實、管理層貪污、「煙酒煙酒」習慣、國企官僚作風等等，都係應該注意不利因素。但經濟高速發展大潮流下，上述污點阻不了股價上升趨勢。當然你可以撓埋雙手睇住Ｄ國企、紅籌股升完可以再升，當佢地冇到，又或者好似我老曹咁，動用投資資金30％去沖個中國泡泡浴。

油價、資源價經過2001年到2007年上升，後市展望升幅有限，相信係近日畢非德減持中石油（857）理由。未來思維係點樣在高能源價、高資源價環境下制訂2008年投資策略？相信高能源價、高資源價呢種客觀環境仍會存在一大段日子，廉價資源時代早已過去，而且內地廉價工資時代亦漸漸過去。換言之，過去中國經濟所擁有優勢漸漸失去，情況有如1970年代日本未來必須依賴高科技去維持GDP高增長！

美銀行股宜避開

美國銀行公布第三季純利減少32％，花旗股價跌至四年低位，房地產按揭公司MGIC再跌1％（過去十二個月內股價下跌36％；公司宣布第三季每股虧損2.3美元，事前雷曼兄弟估計第三季每股仍賺65美仙）；收市後Washington Mutual股價又跌3.5％。9月份新屋合約再跌10.2％，令人相信10月31日聯儲局將再減息四分一厘。1990年代美國金融機構曾叫日本金融機構進行一刀切（將房地產呆壞賬一次過清理），依家美國金融機構面對同樣問題，卻唔肯一次過清理，忘記長痛不如短痛道理。但美國唔可能推行零利率政策，因為美國外債太多，唔似日本擁有大量外儲備。睇落後市美元價都幾麻煩。次按問題仍在影響美國金融業及地產業，此兩大行業股份仍須避開。上述因素亦令美元價保持弱勢，但有利港股及本港房地產。

美國戰後嬰兒進入退休期，人數高達七千八百萬或每天有八千人退休，形成美股及房地產長期受壓（退休人士唔再供款，而係由退休金中取款使用；或賣出市區住宅，改為到小鎮買樓）。美國唔再係經濟高增長國，唔似1980年代開始時美國戰後嬰兒進入三十到四十歲高收入期，令美國經濟出現二十多年繁榮期（股市2000年見頂、房地產2006年）。美股自2000年起進入退潮（雖然近期道指創新高），美國房地產自去年8月起亦加入退潮，未來時間十分長；甚至美元亦自2002年起出現弱勢。1990年係Sell Japan、1997年係Sell HK、2000年係Sell America期，1990年至今仍是Buy China時期。

我老曹亦係戰後嬰兒，亦面對退休問題。較其他人幸運係，我老曹一早已發現財富獲得唔係來自辛勤工作，而係來自聰明投資策略。Work hard,work smart我老曹已講三十年。在1970年代曾被人指責教壞後生仔，但各位思想一下，中國人勤勤力力工作，財富反而唔及美國人，點解？勤力工作只可用作累積原始資本。1967年至1970年我老曹同時打三份工（到證券行做事、到洋行同人打英文信、替人家子女補習英文），但收入唔多。1970年起改為專注理財，今天來自理財收益十倍於薪金收入。

A、H股互換謠言，令周四港股上升、滬深A股回落。經澄清後，周五A股回升、周一港股點樣反應？仍木宰羊。因為內地唔少有「恐高症」基民一方面瘋狂搶購QDII基金，另一方面亦贖回A股基金，令QDII基金一再出現超額認購。

機制設計有助訊息暢通

中國9月份CPI上升6.2％（8月份升6.5％），主因係豬肉價回落11％。政府話仍會加息，因為至今內地存款仍是負利率（利率唔及CPI升幅）。估計內地通脹高潮將漸成過去。

2007年諾貝爾經濟學獎頒畀三位機制設計理論者。何謂機制設計？簡單D講，就係制度安排可影響訊息傳遞。良好制度令傳遞訊息失真較低，經濟運行亦因此成本低；反之，唔好制度令訊息傳遞唔暢順，經濟運行成本急升。由於人有偏好，令訊息好難完全透明及暢通。以企業為例，出現問題訊息需要幾耐才能傳到決策層而作出相應措施？如訊息唔暢通（例如下層唔敢向上司提出企業內部存在缺點，便會令運行成本上升而不自知，最終因效率低而令公司純利下降或不及其他企業競爭而被淘汰出局），影響並非即時可見，但長年累月影響十分大。企業浮沉受純利影響，決策層或遲或早知道企業內部有問題。但作為政府，評審標準係點？1960年代大躍進，中國經濟明明搞到一塌糊塗，但領導層收到訊息卻是「大豐收」，最後全國出現過千萬人餓死，領導層才收到正確訊息，就係因為當年中國政府機制設計唔好。再以香港為例，過去機制良好，社會透明度高，訊息傳遞好快，使決策層可作出相應措施，在事情未惡化前處理。但1997年回歸後特區政府，因面對貧富兩極化，作為政府必須維持一個公平社會，追求公平同時便會犧牲大量效率。財富再分配過程中，亦產生唔同利益階層博弈關係（例如應先解決天水圍家庭問題，還是多照顧全港老人？），結果產生社會取捨問題（例如保護皇后碼頭定係解決交通問題？誰更優先呢？）。又例如哪一個標準收入才可享受住公屋？制訂最低工資線後有冇足夠機制配合？會否令窮人更難搵工？設計有效機制並唔容易，尤其係中國經濟在迅速轉變，更應吸收呢方面知識（香港政府亦一樣，以免出現近十年內進退失據情況）。

例如德國以往有良好福利制度，在經濟發展期，福利制度照顧窮人唔多，社會和諧；但1990年起來自東德窮人大幅增加，令福利制度不勝負荷，到2005年16％德國人生活在貧窮線之下。當一千四百萬德國人或人口16％生活在貧窮線之下（德國貧窮線係月入1280美元而獨自生活，即月入不足10000港元者被視為貧窮，可獲每月500美元補貼），此制度將政府推向破產邊沿。上述制度同時令德國漸失去高技術工人，產生大量低技術青年（因收入不足1280美元一個月者可獲政府每月500美元補貼，懶人自然唔再努力學習新技術！），結果一個良好的福利制度卻拖垮了德國近十七年！

福利制度拖垮德國經濟

2005年德國政府被迫修改法例：任何人失業一年以上不獲上述福利保障。上述福利制度原先目的係令所有德國人都可舒適地生活，唔使被迫從事自己唔喜歡工作，結果卻是拖垮整個德國經濟。地獄之路往往由良好意願鋪出來，例子數不勝數（例如1997年7月特區政府八萬五房屋政策）！

資本主義制度在發展初期係百花齊放，在呢個階段人人愛上資本主義制度；但發展到中期係汰弱留強，大企業由於資本雄厚，自然獲較優秀員工，銀行貸款甚多，甚至可上市集資，結果市場佔有率自然不斷上升，侵吞中小企生存空間，例如超市淘汰士多、連鎖飲食集團淘汰茶餐廳……。大企業繼續欣欣向榮，即資本主義制度到中期，而中小企業生存空間不斷減小，例如1990年後日本、1997年後香港。最後資本主義制度進入寡頭壟斷，即一個行業由少數大企業所佔據，別人無法入侵此行業。發展至此，便進入醜陋資本主義制度時代，如1920年代美國。美國政府通過立法去阻止寡頭壟斷出現（例如石油公司曾被拆開為七間公司、電話公司被拆為三間，美國銀行不能跨州經營等），以及開放市場引入外資企業去競爭。

以報業為例，1973年《信報》可以用40萬元起家，1987年《經濟日報》需要4000萬元資本開始。今天要經營一份報紙，要幾多資本開始？以施永青《am730》為例，以1億元資本開始，聽講最近才收支平衡，但冇幾多人有1億元資本去創業？辦報已非資本密集型行業，更何況其他行業例如房地產，早已出現寡頭壟斷。能夠小本經營而獲利不菲者，只有靠天才（talent），例如歌星、明星、運動員等，其餘得個做字。