周三凌晨世盃4強法國硬撼比利時，有「新亨利」之稱嘅法國前鋒基利安麥巴比，無可避免會同現任比利時助教嘅正版亨利比較，而麥巴比要同師兄睇齊，首先要喺今屆世盃奪冠。
麥巴比點解叫做「新亨利」，因為佢同呢位傳奇射手有太多相似嘅地方。首先，2人都曾在法國足總嘅克萊楓丹青訓基地接受培訓，年輕時同樣喺摩納哥踢翼鋒崛起，並協助摩軍勇奪法甲冠軍一炮而紅。
踢法方面，兩人都以極速爆破見稱，臨門一腳又冷靜到暈，麥巴比喺16強用速度硬爆阿根廷防線，仲梅開二度添，堅有亨利影子。就連同亨利做過隊友嘅法國主帥迪甘斯都話：「我不嬲都唔鍾意搵2個唔同年代嘅球員做比較，但佢哋嘅速度及把握能力太似喇，一樣咁高效率。」
雖然麥巴比至今法國披甲20次入7球，同入咗51粒嘅亨利梗係冇得比喇，但睇番呢位「高盧雞」史上士哥王，喺單屆世盃最多都係入3粒(1998及2006年)，麥巴比喺今屆已經有3球進帳，拍得住師兄。不過，1998年只得20歲嘅亨利，首次參加世盃即攞冠軍，麥巴比想配得起「新亨利」呢個朵，就要喺今屆捧盃而回，到底呢位19歲嘅未來球王，可否複製師兄嘅成就呢？要先過4強、由亨利輔助嘅比利時呢關。
http://football.on.cc/cnt ... amp;whichpage=2
