楊千嬅為了今次一連十一場跨年演唱會閉關狂操三個月，果然有成效，今次千嬅心囗唔係有個「勇」字，而係個「V」字。一連幾套戰衣都打開心口，一向係微波族嘅佢，上半場本來平平無奇iPad胸，點知臨到尾聲，千嬅換上一套黑色低胸晚裝，𠌥低身唧出三吋事業事，當堂有啲料到！
千嬅𠌥低身，成功夾出事業線。
囝囝打氣
一開場千嬅著住銀色戰衣連唱三首快歌熱身，V字開到落肚臍，但心口依然冇乜肉地。之後千嬅突然感觸話：「好多謝大家成就我呢個夢想，呢個夢想好耐喇！跨年對我嚟講特別有意義。」
當晚老公丁子高帶埋囝囝Torres同外父外母，拉大隊到場支持。六歲大的Torres戴住headphone，揮動bon bon棒落力幫媽咪打氣，見記者影相仲醒目高舉V字手勢，十分得意。演唱會唔少得洋葱位，一提到個仔，千嬅即刻眼濕濕：「雖然佢坐喺度，但佢應該唔知媽咪做緊乜，我覺得做任何嘢都要及時，要孝順父母，好好對你嘅下一代。」
Torres戴住headphone，坐定定幫媽咪打氣。
一連幾套戰衣都打開心口，大騷iPad胸。
臨尾賣大包
好戲在後頭！今次千嬅專程搵嚟電影美指文念中為她設計晚裝，去到encore部分，千嬅換上一條黑色低胸晚裝，連唱《煉金術》、《野孩子》、《少女的祈禱》等經典歌。其間千嬅大笑姑婆上身，笑到𠌥低身，心囗突然唧出深坑，好有驚喜喎！
為咗個唱，千嬅染咗一頭金髮，好有新鮮感。
快歌環節，千嬅又踢腿，又側手翻，落力演出。
第二晚千嬅再換新戰衣。
千嬅閉關操練三個月，務求以最弗狀態見fans。
撰文、攝影、攝錄：娛樂組
千嬅開騷晒變幻球驚現深坑
