被喻為無綫台慶頒獎禮前哨戰的《TVB馬來西亞星光薈萃頒獎典禮》，上週六在雲頂舉行，本來以為可以繼新加坡頒獎禮再下一城的王浩信，輸俾臨時帶老婆戚美珍出現的三哥苗僑偉。
「最佳男主角」大熱倒灶，失獎王浩信幾乎全程黑面，好彩有緋聞女友蔡思貝出招呵番，在台上大講冧話，齊齊標尾會攞「最佳電視劇」。
攞「最佳劇集」，蔡思貝上台即講唔停，失落視帝的王浩信依然笑容欠奉。
三哥帶老婆戚美珍出席頒獎禮，跟拍檔宣萱齊封視帝視后。
宣布三哥得獎，王浩信有風度攬對方，明知有鏡頭對住自己，即露出全晚最燦爛笑容。
失落三連冠
本來有望三連冠的王浩信，憑電視劇《踩過界》跟三哥以及陳展鵬爭視帝，事前被一致看好的他，亦信心十足，不過到得知三哥三嫂雙雙出席頒獎禮，即傳出視帝人選有變。
「三哥本來話唔會出現，但臨時現身，大家都估到好大機會俾佢，其實宣萱都一樣，佢咁多年冇返公司拍劇，而家又肯飛過去馬來西亞出席頒獎禮，唔通淨係去坐吓咩？」工作人員說。
當晚姚子羚奪「最佳女配角」，她有感而發講述去年差點毀容，被迫停工半年，算是頒獎禮最感人一幕。
胡定欣雖失落視后，不過中門大開晚裝卻獲不少掌聲。
自言不知是否再有機會攞獎的陳山聰，在台上感謝拍拖四年的另一半，以及屋企人。
影響社會
雖然失獎，不過緋聞女友蔡思貝好識做，當宣布《踩過界》獲「最佳電視劇」，她上台即爭住講：「呢套劇集令觀眾關注弱勢社群，可以生命影響生命，好開心可以做到演員。」雖然同在台上的王浩信依然冇乜笑容，但蔡思貝一番話，將孭重飛劇集推高一個層次，超出演技影響社會，王浩信應該順番條氣。
宣萱上台攞視后，唐詩詠在台下猛影相，王浩信則無乜表情。
頒獎禮後，一班同事幫李佳芯慶祝生日，無得冧庄視后的李佳芯依然好開心。
撰文：娛樂組
攝影：何子洋、蕭敬漁
失獎王浩信黑面頹爆蔡思貝出招呵番
