陳凱琳昨穿高踭鞋耍雙節棍，透露父親是李小龍忠實粉絲。
歐錦棠大前日為音樂劇《馬丁路德》客串演出時，不慎跌斷左手；但身為李小龍忠實粉絲的他，昨日仍負傷與陳凱琳出席航空公司HK Express的「小龍」客機命名活動，向偶像李小龍致敬。
包住左手的阿棠，即場示範單手耍雙節棍，以單手耍棍的他仍揮灑自如，之後他還教陳凱琳擺李小龍甫士。問阿棠耍雙節棍可有整親？他說：「唔會，雙節棍係我身體嘅一部份，我9歲已經開始玩，當時用地拖棍自製，整爛屋企好多燈，又打到自己起咗好多瘤。」
歐錦棠雖然跌斷左手，但單以右手耍雙節棍仍揮灑自如。
歐錦棠（左二）負傷與陳凱琳（右二）出席客機命名活動，向一代武打巨星李小龍致敬。
自嘲住老人院
談到傷勢，阿棠說：「前日出事，噚日睇咗骨科，照咗冇碎骨，唔使做手術，醫生幫我換咗玻璃纖維托，輕身啲，3個星期後可以拆，之後再做物理治療。」問阿棠下月公演的舞台劇《男女PK大作戰（激笑版）》可有受影響時，他表示前日已開始綵排，幸好動作不多，但原本要做的打觔斗動作則要取消，近日的一個廣告工作亦要押後。
阿棠又笑指自己似住安老院說：「沖涼要靠老婆，我鍾意着窄腳褲，又係靠老婆，每日佢幫兩隻貓清潔完之後，跟住幫我抹，今次教訓我平時要對老婆好，男人污糟邋遢唔緊要，但唔可以唔着褲出街！」
賴慰玲年尾生得
此外，同場的陳凱琳被問到前晚與男友鄭嘉穎跟賴慰玲等好友食飯，她說：「噚晚一齊煮咗泰式晚餐，慶祝吓，佢（賴慰玲）年尾生得。」她指男友並非首次出席自己朋友飯敍，嘉穎跟自己朋友也相當熟絡。
採訪：黃曉妍
攝影：陳慧安
from:
http://hk.apple.nextmedia ... 170920/20157967
