Pickup車種以前喺車迷心目中，除咗係一架工程車之外，都係一架工程車！不過時移勢易，𠵱家揸架Pickup出街，已經唔係工程佬嘞，反而係又潮又有品味嘅outdoor友象徵。面對Pickup用家嘅改變，車廠都紛紛為旗下Pickup型號升級，好似Ford就為Ranger推出全新Master Edition，設備更齊更豪華，以迎合升格為潮車嘅身份。
內外設備升級
車價由早前XLT版$339,900提升至$359,900嘅Master Edition，車價貴咗兩萬，但新版本內外都加入唔少新設備，令Ranger更加豪華。新版加配附有LED日行燈嘅新頭燈組，尾斗上新款頂架加入頂置尾燈及尾斗照明，前泵把加入金屬保護底板，輪圈更升級至更有型嘅黑色17吋款式，而且配M+S全能車胎，使新版外型更具越野風味，加上Ranger本身強桿外形，就好似一位打扮過嘅大隻潮佬。
除咗外形，新版本亦大大提升車廂舒適性，前座包上原廠真皮並加入電動調校，冷氣升級為雙區獨立恆溫系統，中控台更加裝兩個USB充電插頭。除此之外，新版本中控台顯示屏幕升級至8吋TFT輕觸式，並加入SYNC 3藍牙聲控娛樂通訊系統，速度表板亦都改為單圈指針加左右彩色屏幕顯示，比貨van更高級，𠵱家嘅配備，已經完全脫離商用車嘅層次，自用一啲都唔失禮，畀多兩萬絕對超值。
中控台設計一啲都唔似商用車，感覺舒適又豪華！
新增嘅USB充電插頭，位於冷氣面板下方。
表板中央實體指針為速度計，左屏幕負責顯示音響娛樂，右屏幕負責顯示如引擎轉數等資訊。
除咗用實體按鈕控制雙區恆溫冷氣，亦可用全新8吋TFT輕觸式屏幕控制。
後座座墊厚而柔軟，乘坐感舒適，即使車尾用貨車懸掛，乘坐感直迫SUV。
駕駛席擁有八路方位調校，乘客位側有四路。天生越野功架
新版Ranger沿用3,198c.c.直五turbo柴油引擎配搭6速自動波箱，最大馬力200匹，峰值扭力達47.9kgm，配合傳統陣式車架以及可變四驅動力分佈，屬天生越野材料。駕駛Ranger感覺同外形一樣別具霸氣，踩一下油門，柴油引擎震動就會由腳掌傳到駕駛者身體，感覺好raw、好熱血，雖然加速反應比較遲緩，但力量深不可測，越野車，始終用柴油引擎是王道。不過Ranger以商用柴油車登記，只有15年壽命，呢點買車時要考慮。雖然ride qaulity好raw，但同行坐後座嘅攝影師表示，無論座位抑或懸掛表現，都比貨van舒適，雜音亦都控制得幾好（除咗引擎聲浪），舒服！
雖然Ranger感覺好raw，但都配備大量電子駕駛系統，例如斜坡起步系統（HLA）、緊急制動輔助系統（EBA）以及斜坡緩降輔助系統（HDC），另外仲有前後泊車感應，車身龐大都能夠輕鬆控制。
引擎47.9kgm峰值扭力喺1,750rpm開始釋放，不過運作聲浪唔細，係柴油車嘅特點。
6前速波箱提供+/-模式，不過只限將波棍推至S檔，以波棍進行升降波檔。
如以2H尾驅模式行駛，耗油只需11.4km/L，即係$0.7左右。
Spec.：Ford Ranger Master Edition
引擎：3,198c.c.直五turbo
馬力：200ps/3,000rpm
扭力：47.9kgm/1,750-2,500rpm
傳動：6前速自動，附+/-模式
車身：5,359×1,850×1,815（mm）
軸距：3,220mm
車重：2,290kg
耗油：11.4km/L
車價：$359,900
查詢：Future Motors（2820 4018）
終極大佬
Ford Ranger已經好強？少年你太年輕了！其實Ford仲有架更大更豪嘅F-150！2015年推出嘅第13代F-150，最強型號車長超六米，可配馬力412匹嘅5.0公升Ti-VCT V8引擎，即係Mustang GT用緊嗰副。加上車廂更豪，單係音響已用B&O，絕對係當今Pickup之王！
撰文：黃德禹
攝影：陳浩然
Ford Ranger Master Edition
