身為「陰謀情人」鄭子誠太太的劉倩怡，大爆老公每逢她生日或結婚周年都會送卡。攝影：仇志德
【《蘋果》專訪】鄭子誠既是「完美奸人」、「音樂情人」，也是「陰謀情人」，面對住他結婚14年的太太劉倩怡，鄭子誠雖未有經常有陰謀地製造浪漫驚喜，但每逢生日、結婚周年或情人節，鄭子誠都有冧招。劉倩怡說：「如果10分滿分，佢中間位6分啦！總之每一次佢都有卡，寫一啲情深嘅說話。」
採訪：戴彩煥
劉倩怡是港台DJ，也是無綫前藝員，但最為人熟悉的，是她的鄭子誠太太身份。劉倩怡在90年代與鄭子誠合作主持港台節目《今夜真情》結緣，拍拖8年後，於2003年結婚。多年來，劉倩怡都會孖住鄭子誠出席活動，是他人眼中的恩愛夫妻，但原來劉倩怡對「恩愛夫妻」這四個字有點抗拒。近日有團體邀請他們一起出席分享活動，活動海報本計劃印上二人經常一起出席活動十分恩愛之類字眼，但劉倩怡要求將相關字眼刪走。
鄭子誠與劉倩怡雖未有生小朋友，但二人視家中寶貝狗為子女。
劉倩怡夫婦結婚以來最愛旅行享受人生。
大部份時間劉倩怡會在西貢生活館看舖一腳踢。
重視節日送卡
劉倩怡日前在她於西貢經營的小店笑着解釋說：「因為我唔想咁表面，就算我哋恩愛，對其他人嚟講又有乜意義呢？有人問我『佢（鄭子誠）把聲好好聽喎，你係咪每日都好冧？』但兩個人生活唔係靠把聲，唔係佢把聲靚，我就生活得開心啲，我哋唔可以睇得咁表面。兩個人生活係非常人性，可能有啲細節嘅嘢大家都會唔高興、吵架，唔好恩愛就概括晒所有嘢。至於我哋經常一齊出席公開活動又有乜重要性呢？我哋唔係社交好活躍嘅人，如果佢有活動，我有時間咪陪吓佢，等佢有個伴，但呢個唔係代表晒我哋一年365日婚姻生活就係嗰個moment裏面嘅嘢。」
鄭子誠被封「陰謀情人」，究竟在劉倩怡眼中，鄭子誠又是怎樣的一個情人？又可曾經常有陰謀地製造浪漫驚喜？劉倩怡說：「浪漫呢樣嘢好主觀，係咪candle light dinner？不過佢好重視節日，每一次節日佢都會有預備啲嘢，禮物會買，另外樣嘢佢一定做，就係卡，生日卡、結婚周年卡、情人節卡一定有，而佢一定係用心挑選，自己寫滿晒字。如果10分滿分，佢中間位6分啦！總之每一次佢都有卡，寫一啲情深嘅說話。」
冇計劃生小孩
相比起老公，劉倩怡絕對大頭蝦，試過一年鄭子誠在內地拍劇兼過生日，她竟然記錯日子，她說：「我5月26日打畀子誠祝佢生日快樂，點知原來老公係5月21日生日，好在結婚咁多年嚟自己只試過一次。」
結婚14年，可曾計劃過生小朋友？劉倩怡說：「我好鍾意小朋友，但結婚嗰陣年紀都相對大，佢結過婚，有仔㗎喇。嗰陣時我心態係既然佢都有（兒子），我又年紀大咗，如果因為生小朋友而出現乜嘢問題，無論小朋友或者我自己嘅健康，我又唔係好想，所以我就放下咗冇諗。」
from:
http://hk.apple.nextmedia ... 170726/20101216
